मुंबई : बॉलिवूड अभिनेता अजय देवगण पुन्हा एकदा विजय साळगावकरच्या आयकॉनिक भूमिकेतून प्रेक्षकांच्या भेटीला येणार आहे. 'दृश्यम' फ्रँचायझीच्या तिसऱ्या भागाचे चित्रीकरण सुरू झाले असून, या चित्रपटाचे नाव 'दृश्यम: द कन्क्लुजन' असे ठेवण्यात आले आहे. (Ajay Devgan)
चित्रपटाचे पहिले पोस्टरही समोर आले आहे. अजय देवगणच्या पोस्टरवर 'माझे सत्य, माझा हक्क, फक्त माझे कुटुंब' अशी टॅगलाइन पाहायला मिळते. त्यामुळे विजय साळगावकर पुन्हा एकदा आपल्या कुटुंबाला वाचवण्यासाठी कोणती चाल खेळणार, याची उत्सुकता वाढली आहे. (Drishyam 3 The Conclusion)
तब्बू, श्रिया सरन आणि रजत कपूरही परतणार
'दृश्यम'च्या तिसऱ्या भागात मागील चित्रपटातील अनेक कलाकार पुन्हा आपल्या भूमिकेत दिसणार आहेत. तब्बू पुन्हा मीरा देशमुखच्या भूमिकेत, तर श्रिया सरन नंदिनी साळगावकरच्या भूमिकेत दिसणार आहे. रजत कपूरही महेश देशमुखची भूमिका साकारणार आहे.
दरम्यान, चित्रपटाच्या स्टारकास्टमध्ये जयदीप अहलावतची एन्ट्री झाली आहे. यापूर्वी अक्षय खन्ना पोलीस अधिकाऱ्याच्या भूमिकेत दिसणार असल्याच्या चर्चा होत्या. मात्र, आता ही भूमिका जयदीप अहलावत साकारणार असल्याचे समोर आले आहे. प्रकाश राज यांचाही चित्रपटात समावेश आहे. ( Bollywood Update)
'दृश्यम 2'नंतरची कथा पुढे जाणार
'दृश्यम: द कन्क्लुजन'ची कथा 'दृश्यम 2'नंतर पुढे जाणार आहे. विजयने आपल्या चातुर्याने कुटुंबाला संकटातून वाचवले असले, तरी त्याच्यावरील संशय पूर्णपणे संपलेला नव्हता. आता नव्या भागात साळगावकर कुटुंबासमोर कोणते संकट उभे राहणार आणि विजय पुन्हा एकदा पोलिसांना चकवा देणार का, हे पाहणे महत्त्वाचे ठरणार आहे. (Drishyam 3 Announcement)
या चित्रपटाचे दिग्दर्शन अभिषेक पाठक करणार आहेत. पटकथा अभिषेक पाठक, आमिल कियान खान आणि परवेझ शेख यांनी लिहिली आहे.
'दृश्यम: द कन्क्लुजन' 2 ऑक्टोबर 2026 रोजी चित्रपटगृहात प्रदर्शित होणार असल्याचे सांगितले जात आहे. त्यामुळे विजय साळगावकरच्या कथेला अखेरचा ट्विस्ट काय मिळणार, याची प्रेक्षकांना उत्सुकता लागली आहे. ( Entertainment News)