Jalgaon Accident News : जळगाव तालुक्यातील जळगाव–ममुराबाद रस्त्यावर म्हाळसादेवी मंदिराजवळ सोमवारी सायंकाळी झालेल्या भीषण अपघातात कावड यात्रेत सहभागी झालेल्या १० वर्षीय मुलाचा जागीच मृत्यू झाल्याची दुर्दैवी घटना घडली आहे. चोपड्याकडे किराणा माल घेऊन जाणाऱ्या आयशर वाहनाने मुलाला जोरदार धडक दिल्याने हा अपघात झाला. या घटनेनंतर संतप्त झालेल्या जमावाने अपघातास कारणीभूत ठरलेल्या आयशर वाहनाला थेट आग लावल्याने परिसरात काही काळ तणावाचे वातावरण निर्माण झाले.
नेमकी घटना काय ?
शनिपेठ परिसरातील गवळीवाड्यातून कावड यात्रा म्हाळसादेवी मंदिराच्या दिशेने गेली होती. यात्रा आटोपल्यानंतर भाविक परतीच्या मार्गावर असताना जळगावकडून चोपड्याकडे किराणा माल घेऊन जाणाऱ्या एमएच २०/ईजी ३५९३ क्रमांकाच्या आयशर वाहनाने यात्रेत सहभागी असलेल्या मुलाला धडक दिली. धडक एवढी जोरदार होती की, वाहनाने मुलाला काही अंतरापर्यंत ओढत नेल्याचे प्रत्यक्षदर्शींनी सांगितले. या दुर्घटनेत मुलाचा जागीच मृत्यू झाला. अपघाताची माहिती मिळताच मुलाचे नातेवाईक, कावड यात्रेतील भाविक आणि नागरिक मोठ्या संख्येने घटनास्थळी जमा झाले. चिमुकल्याच्या मृत्यूमुळे संतप्त झालेल्या नागरिकांनी रस्ता अडवत चालकाला तातडीने ताब्यात घेऊन कठोर कारवाई करण्याची मागणी केली. कारवाई होईपर्यंत मृतदेह घटनास्थळावरून हलवू देणार नसल्याची भूमिका जमावाने घेतली. (Jalgaon Accident News )
संतप्त जमावाने वाहन पेटवले
दरम्यान, संतप्त जमावातील काही जणांनी किराणा मालाने भरलेल्या आयशर वाहनाला आग लावली. वाहन पेटल्याने परिसरात काही काळ भीतीचे वातावरण निर्माण झाले होते. परिस्थिती नियंत्रणात आणण्यासाठी पोलिसांनी तातडीने मोठा बंदोबस्त तैनात केला. जमावाला शांत करण्याचा प्रयत्न करताना तालुका पोलीस ठाण्याचे निरीक्षक शशिकांत पाटील यांनाही किरकोळ धक्काबुक्की झाल्याचे सांगण्यात येत आहे. या घटनेमुळे जळगाव–ममुराबाद मार्गावरील वाहतूक सायंकाळी सुमारे पाच ते साडेसात वाजेपर्यंत ठप्प झाली होती. रस्त्याच्या दोन्ही बाजूंना वाहनांच्या लांबच लांब रांगा लागल्या होत्या. परिस्थिती नियंत्रणात आणण्यासाठी पोलीस अधीक्षक श्रीकांत धिवरे, अपर पोलीस अधीक्षक संदीप गावित, उपविभागीय पोलीस अधिकारी नितीन गणापुरे यांच्यासह मोठा पोलीस फौजफाटा घटनास्थळी दाखल झाला.(Jalgaon Accident News )
आयशर चालक ताब्यात
पोलीस अधिकाऱ्यांनी नागरिकांशी चर्चा करून परिस्थिती शांत केली. पोलीस अधीक्षक श्रीकांत धिवरे यांनी नागरिकांची समजूत घातल्यानंतर मुलाचा मृतदेह उत्तरीय तपासणीसाठी जळगाव येथील शासकीय वैद्यकीय महाविद्यालय व रुग्णालयात रवाना करण्यात आला. दरम्यान, पोलिसांनी आयशर चालकाला ताब्यात घेतले असून त्याच्यावर पुढील कायदेशीर कारवाई सुरू आहे. या दुर्घटनेमुळे कावड यात्रेत सहभागी भाविकांमध्ये हळहळ व्यक्त होत असून, निष्पाप बालकाच्या मृत्यूला जबाबदार असणाऱ्यांवर कठोर कारवाई करण्याची मागणी नागरिकांकडून होत आहे.