नांदेड : नांदेड जिल्ह्यातील (Nanded News) लोहा तालुक्यातील एका गावात माणुसकीला काळीमा फासणारी संतापजनक घटना उघडकीस आली आहे. अवघ्या तीन वर्षांच्या निष्पाप चिमुकलीला चॉकलेटचे आमिष दाखवून तिच्यावर अत्याचार करण्यात आला. या दुर्दैवी घटनेने संपूर्ण नांदेड जिल्हा हादरला असून परिसरात तीव्र संतापाची लाट पसरली आहे. पीडित बालिकेवर सध्या नांदेडच्या शासकीय रुग्णालयात उपचार सुरू असून तिची प्रकृती सध्या स्थिर आहे. याप्रकरणी पोलिसांनी गुन्हा दाखल केला असून फरार आरोपीच्या शोधासाठी पोलीस पथके रवाना करण्यात आली आहेत.
चॉकलेटचे आमिष अन् क्रूर कृत्य
सोमवारी संध्याकाळच्या सुमारास ही चिमुकली आपल्या घरासमोरील अंगणात खेळत होती. त्याच वेळी शेजारीच राहणाऱ्या एका नातेवाईक व्यक्तीने तिला जाळ्यात ओढले. मुलीचा विश्वास संपादन करून तिला चॉकलेट देण्याच्या बहाण्याने तो सोबत घेऊन गेला. सुमारे वीस ते पंचवीस मिनिटांनंतर आरोपी मुलीला पुन्हा घरासमोर सोडून पसार झाला. मुलगी सतत रडत असल्याचे पाहताच तिच्या आईला शंका आली. आईने मायेने विचारपूस केली असता चिमुकलीने तिच्यासोबत घडलेला प्रकार सांगितला. अत्यंत धक्कादायक बाब म्हणजे, ती चिमुकली नात्याने त्या आरोपीला 'बाबा' अशी हाक मारायची; त्याच विश्वासाचा फायदा घेत या नराधमाने हे अमानुष कृत्य केले.
तत्पर वैद्यकीय मदत आणि पोलीस कारवाई
चिमुकलीला दुखापत झाल्याचे लक्षात येताच पालकांनी क्षणाचाही विलंब न करता तिला नांदेड येथील विष्णूपुरी शासकीय रुग्णालयात उपचारासाठी दाखल केले. घटनेचे गांभीर्य ओळखून सोनखेड पोलीस ठाण्याचे सहाय्यक पोलीस निरीक्षक भागवत नागरगोजे यांनी पथकासह तातडीने घटनास्थळी धाव घेत पंचनामा केला. पीडितेच्या आईने दिलेल्या तक्रारीच्या आधारे पोलिसांनी मंगळवारी पहाटेच्या सुमारास संशयित आरोपीविरुद्ध पोक्सो (POCSO) कायद्यासह इतर गंभीर कलमांनुसार गुन्हा नोंदवला आहे.
परिसरात तीव्र रोष आणि कठोर कारवाईची मागणी
घटनेनंतर संशयित आरोपी फरार झाला असून, पोलीस त्याचा कसून शोध घेत आहेत. राज्यात लहान मुलांवरील अत्याचाराच्या घटनांमध्ये होणारी वाढ अत्यंत चिंताजनक असून, निष्पाप बालकांच्या सुरक्षेचा प्रश्न पुन्हा एकदा गंभीर बनला आहे. अशा विकृत मानसिकतेच्या गुन्हेगाराला तात्काळ अटक करून कठोर शिक्षा द्यावी, अशी तीव्र मागणी स्थानिक ग्रामस्थांमधून केली जात आहे.