वॉशिंग्टन डीसी : अमेरिका आणि इराणमधील वाढत्या राजकीय तणावाच्या पार्श्वभूमीवर राष्ट्राध्यक्ष डोनाल्ड ट्रम्प यांनी तेहरानला मदत करणाऱ्या देशांवर कारवाई करण्यास सुरुवात केली आहे.अमेरिकेचे अर्थमंत्री स्कॉट बेसेंट यांनी इराणला आर्थिकदृष्ट्या एकाकी पाडण्यासाठी सोमवारी ‘ऑपरेशन इकॉनॉमिक आउटकास्ट’ची घोषणा केली. त्यानंतर ट्रम्प प्रशासनाने इराणकडून पेट्रोलियम आणि पेट्रोकेमिकल उत्पादनांची आयात केल्याप्रकरणी भारतातील चार कंपन्यांवर निर्बंध लादले आहेत. इराणसाठी संभाव्य महसुलाचे स्रोत रोखण्याच्या उद्देशाने अमेरिकेने हे नवे निर्बंध लागू केले आहेत. तसेच, इतर देशांनीही इराणसोबतचे आर्थिक संबंध तोडावेत, असे अमेरिकेने आवाहन केले असून, तसे न केल्यास कारवाईचा इशारा दिला आहे.अमेरिकेच्या परराष्ट्र विभागाने सांगितले की, या कारवाईच्या कक्षेत भारतातील कस्टम ड्युटी ब्रोकर पोर्टईज पार्टनर्स एलएलपी तसेच त्यांचे भागीदार इंदरीसमिया अशरफमिया शेख आणि हरीश रामचंद्र रंगी यांचा समावेश आहे. या व्यक्तींनी इराणमधून पेट्रोकेमिकल उत्पादनांच्या अनेक खेपांची आयात करण्यास मदत केली होती. (Donald Trump)
रिपोर्टनुसार, निर्बंधांच्या कक्षेत आलेल्या इतर कंपन्यांमध्ये सदाशिव ओव्हरसीज लिमिटेड, पीपी सॉफ्टटेक प्रायव्हेट लिमिटेड आणि प्रकृतिस इन्फ्रा इम्पेक्स प्रायव्हेट लिमिटेड यांचा समावेश आहे. पीपी सॉफ्टटेकचे संचालक प्रशांत गर्ग यांच्यावरही कारवाई करण्यात आली आहे. निवेदनानुसार, शेख, रंगी आणि गर्ग हे तिघेही भारतीय नागरिक आहेत. सदाशिव ओव्हरसीजने सुमारे ६.९ कोटी डॉलर किमतीच्या इराणी पेट्रोलियम उत्पादनांची आयात केली. तर पीपी सॉफ्टटेक आणि प्रकृतिस इन्फ्रा यांनी प्रत्येकी सुमारे २.५ कोटी डॉलर किमतीच्या पेट्रोलियम उत्पादनांची आयात केली. इराणकडून पेट्रोलियम किंवा पेट्रोलियम उत्पादनांची खरेदी, अधिग्रहण, विक्री, वाहतूक किंवा विपणनाशी संबंधित महत्त्वाच्या व्यवहारांमध्ये जाणूनबुजून सहभागी झाल्याच्या आरोपावरून या कंपन्यांना निर्बंधांच्या यादीत टाकण्यात आले आहे. अमेरिकेच्या परराष्ट्र विभागाचे प्रवक्ते टॉमी पिगॉट यांनी निवेदनात म्हटले, “इराणी राजवटीच्या अस्थिरता निर्माण करणाऱ्या कारवायांना मदत करणाऱ्या अनेक संस्था, व्यक्ती आणि जहाजांविरोधात अमेरिकेने व्यापक कारवाई केली आहे.”दरम्यान, इराणने मध्यपूर्वेतील आपल्या शेजारी देशांना अमेरिकेसोबत मिळून इराणविरोधातील आर्थिक युद्धात सहभागी न होण्याचा इशारा दिला आहे. (Donald Trump)
इराणच्या सर्वोच्च राष्ट्रीय सुरक्षा परिषदेचे नेते मोहसिन रजाई यांनी म्हटले की, अमेरिकेचे राष्ट्राध्यक्ष डोनाल्ड ट्रम्प यांनी कोणतेही पाऊल उचलल्यास इराण त्याला इतका तीव्र आणि मोठा प्रत्युत्तर देईल की सर्वांनाच त्याचा धक्का बसेल.त्यांनी स्पष्ट इशारा दिला की, शेजारी देशांनी इराणच्या अर्थव्यवस्थेला नुकसान पोहोचवण्यासाठी अमेरिकेला मदत केली, तर इराण फारसच्या आखातातून जाणाऱ्या जहाजांच्या मार्गांना बंद करू शकतो किंवा त्यांना लक्ष्य करू शकतो. दरम्यान, राष्ट्राध्यक्ष डोनाल्ड ट्रम्प यांनी सोशल मीडियावर जाहीर केले होते की, अमेरिका इराणविरोधात इतिहासातील सर्वात कठोर आणि मोठी आर्थिक कारवाई करण्याच्या तयारीत आहे.ट्रम्प यांनी म्हटले की, तेल तस्करी, पैशांचे हस्तांतरण किंवा बनावट कंपन्यांच्या माध्यमातून इराणला कोणत्याही प्रकारची मदत करणाऱ्या देशांना अमेरिकेच्या गंभीर परिणामांना सामोरे जावे लागेल.अमेरिकेच्या राष्ट्राध्यक्षांनी या कारवाईला ‘आर्थिक युद्ध’ असे संबोधले असून, आपल्या मित्रदेशांना इराणला पूर्णपणे एकाकी पाडण्यासाठी अमेरिकेला सहकार्य करण्याचे आवाहन केले आहे. (Donald Trump)