मुंबई : मालाडच्या एव्हरशाईन नगर परिसरातील एका बँकेत चोरी करण्याचा प्रयत्न केल्याची घटना समोर आली असून, बांगूर नगर पोलिसांनी या प्रकरणातील आरोपीला अवघ्या २४ तासांत अटक केली आहे. प्रदीप रामचंद्र माने असे अटक करण्यात आलेल्या आरोपीचे नाव आहे. पोलिसांच्या माहितीनुसार, आरोपीने बँकेचे कुलूप तोडून आत प्रवेश केला. त्यानंतर कॅश लॉकरपर्यंत पोहोचण्याचा प्रयत्न करताना त्याने बँकेतील सर्व्हरशी संबंधित वायरिंग आणि सेन्सर्सचे नुकसान केले. मात्र, कॅश लॉकरपर्यंत पोहोचण्यात त्याला यश आले नाही.
ही घटना २० ऑगस्टच्या सायंकाळपासून २१ ऑगस्टच्या सकाळपर्यंतच्या कालावधीत घडल्याचे सांगण्यात येत आहे. सकाळी बँकेचे कर्मचारी शाखेत पोहोचले असता त्यांना काहीतरी संशयास्पद आढळून आले. बँकेतील दिवे सुरू होते, तर कॅश रूमच्या दरवाजाशी छेडछाड झाल्याचे निदर्शनास आले. तपासणीदरम्यान सीसीटीव्ही कॅमेऱ्यांना नुकसान झाल्याचेही आढळले. तसेच बँकेतील काही ड्रॉवर उघडलेले दिसून आले. त्यामुळे बँकेत चोरीचा प्रयत्न झाल्याचा संशय कर्मचाऱ्यांना आला आणि त्यांनी तातडीने बांगूर नगर पोलिसांना माहिती दिली.
घटनेची माहिती मिळताच पोलिसांनी तपास सुरू केला. परिसरातील उपलब्ध तांत्रिक पुरावे आणि इतर माहितीच्या आधारे पोलिसांनी संशयिताचा शोध घेतला. अखेर २४ तासांच्या आत प्रदीप माने याला अटक करण्यात पोलिसांना यश आले. पोलिसांच्या चौकशीत बँकेत चोरी करण्याच्या उद्देशाने प्रवेश केल्याचे आरोपीने सांगितल्याचे वृत्त आहे. या प्रकरणात आरोपीच्या पूर्वइतिहासाचीही पोलिसांकडून चौकशी सुरू आहे. दरम्यान, बँकेत दिवसा सुरक्षा रक्षक तैनात असला तरी रात्रीच्या वेळी सुरक्षा रक्षक नसल्याची माहिती समोर आली आहे. त्यामुळे बँकेच्या रात्रीच्या सुरक्षा व्यवस्थेवरही प्रश्न उपस्थित झाले आहेत. या घटनेनंतर बांगूर नगर पोलिसांकडून पुढील तपास सुरू असून, आरोपीने यापूर्वी अशाच प्रकारच्या घटनांमध्ये सहभाग घेतला होता का, याचीही पडताळणी केली जात आहे.