मुंबई : मुंबईतून एक धक्कादायक घटना समोर आली आहे. गजानन देवकाते नावाच्या कंत्राटदाराने आत्महत्या केल्याची घटना घडली असून, या घटनेमुळे व्यावसायिक वर्तुळात खळबळ उडाली आहे. प्राथमिक माहितीनुसार, काम पूर्ण करूनही थकीत बिलांचे पैसे वेळेवर न मिळाल्याने ते आर्थिक अडचणीत सापडले होते. या आर्थिक तणावातून त्यांनी टोकाचा निर्णय घेतल्याचे सांगितले जात आहे. (Mumbai Contractor Suicide)
देवकाते यांनी केलेल्या कामाचे बिल प्रलंबित असल्याने ते संबंधित कार्यालयात सातत्याने पाठपुरावा करत होते. मात्र, वारंवार कार्यालयाच्या फेऱ्या मारूनही थकीत रक्कम मिळत नसल्याने त्यांच्यावर आर्थिक दबाव वाढत असल्याची माहिती समोर आली आहे. (Mumbai Contractor Suicide)
वर्षभरापूर्वी कार्यकारी अभियंत्यांना पत्र :
थकीत बिलांच्या समस्येबाबत देवकाते यांनी सुमारे वर्षभरापूर्वी कार्यकारी अभियंत्यांना पत्र लिहिल्याची माहिती आहे. काम पूर्ण केल्यानंतरही बिलांची रक्कम वेळेत मिळत नसल्याने कंत्राटदारांना आर्थिक अडचणींचा सामना करावा लागत असल्याचे त्यांनी या पत्रातून मांडले होते. तसेच, बिल मिळवण्यासाठी संबंधित कार्यालयात तब्बल १० वेळा चकरा माराव्या लागत असल्याचा उल्लेखही पत्रात करण्यात आल्याची माहिती आहे. त्यामुळे त्यांच्या आत्महत्येच्या घटनेनंतर प्रलंबित बिलांचा मुद्दा पुन्हा चर्चेत आला आहे. (Mumbai Contractor Suicide)
महाराष्ट्र राज्य कंत्राटदार महासंघाची पत्रकार परिषद :
दरम्यान, गजानन देवकाते यांनी प्रलंबित बिलांच्या तणावातून टोकाचे पाऊल उचलल्याच्या पार्श्वभूमीवर महाराष्ट्र राज्य कंत्राटदार महासंघ आक्रमक झाला आहे. शासन आणि प्रशासनाला जाब विचारण्यासाठी महासंघाच्या वतीने पत्रकार परिषदेचे आयोजन करण्यात आले आहे. या घटनेमुळे कंत्राटदारांची प्रलंबित बिले, त्यांना होणारा आर्थिक त्रास आणि शासकीय कार्यालयांकडून होणाऱ्या विलंबाचा मुद्दा ऐरणीवर आला आहे. या प्रकरणाचा पुढील तपास पोलीस करत असून, देवकाते यांच्या टोकाच्या निर्णयामागील नेमकी कारणे आणि संबंधित बाबी तपासानंतर स्पष्ट होणार आहेत. (Mumbai Contractor Suicide)