कोलंबो : भारत आणि श्रीलंका यांच्यातील दुसऱ्या कसोटी सामन्यात पावसाने पुन्हा एकदा व्यत्यय आणला. त्यामुळे चौथ्या दिवसाचा खेळ निर्धारित वेळेआधीच थांबवावा लागला. फॉलोऑननंतर श्रीलंकेने दुसऱ्या डावात दिवसअखेर ६ बाद २२९ धावा केल्या असून, भारताविरुद्ध त्यांच्याकडे १६ धावांची आघाडी आहे. चौथ्या दिवशी भारतीय संघाने श्रीलंकेचा पहिला डाव २९० धावांत गुंडाळला. त्यामुळे भारताला २१३ धावांची मोठी आघाडी मिळाली. त्यानंतर कर्णधार शुभमन गिलने श्रीलंकेला पुन्हा फलंदाजीसाठी पाचारण केले. मात्र, श्रीलंकेच्या फलंदाजांनी दुसऱ्या डावात चांगली झुंज देत सामन्यात रंगत निर्माण केली. (India vs Sri Lanka)
कामिंदू मेंडिसच्या ५५ धावांच्या संयमी खेळीसह पसिंदू सूरियाबंदराने ९२ धावांची शानदार खेळी केली. या दोघांच्या दमदार फलंदाजीमुळे भारताला अपेक्षेप्रमाणे चौथ्याच दिवशी सामना संपवता आला नाही. आता पाचव्या आणि अखेरच्या दिवशी भारतासमोर श्रीलंकेचे उर्वरित चार फलंदाज लवकर बाद करून विजय मिळवण्याचे आव्हान असेल.
श्रीलंकेच्या दुसऱ्या डावाची सुरुवात भारतासाठी चांगली झाली. वेगवान गोलंदाज मोहम्मद सिराजने लाहिरू उदाराला अवघ्या ३ धावांवर बाद करत भारताला पहिले यश मिळवून दिले. त्यानंतर रवींद्र जडेजाने कामिल मिशाराला ३२ धावांवर माघारी पाठवत श्रीलंकेची अवस्था आणखी कठीण केली. मात्र, त्यानंतर पसिंदू सूरियाबंदरा आणि कामिंदू मेंडिस यांनी डाव सावरला. दोघांनी तिसऱ्या गड्यासाठी तब्बल ११५ धावांची भागीदारी करत भारतीय गोलंदाजांचा चांगलाच सामना केला. अखेर प्रसिद्ध कृष्णाने ही महत्त्वपूर्ण भागीदारी मोडली. त्याने कामिंदू मेंडिसला ५५ धावांवर बाद केले. त्यानंतर युवा फिरकीपटू मानव सुथारने प्रभावी गोलंदाजी करत श्रीलंकेचा कर्णधार धनंजया डी सिल्वा आणि शतकापासून अवघ्या ८ धावांनी दूर राहिलेल्या पसिंदू सूरियाबंदराला बाद केले. सूरियाबंदराने ९२ धावांची महत्त्वपूर्ण खेळी केली. यानंतर सारांश जैनने यष्टीरक्षक-फलंदाज निरोशन डिक्वेलाला बाद करत भारताला सहावे यश मिळवून दिले. (India vs Sri Lanka)
पावसामुळे चौथ्या दिवसाचा खेळ थांबवण्यात आला, तेव्हा श्रीलंकेने ६ गडी गमावून २२९ धावा केल्या होत्या. सोनल दिनुशा ७ धावांवर, तर केशरा नुवांथा ३ धावांवर नाबाद होते. भारताच्या पहिल्या डावातील धावसंख्येच्या तुलनेत श्रीलंकेकडे सध्या १६ धावांची आघाडी आहे. त्यामुळे पाचव्या दिवशी भारताला प्रथम श्रीलंकेचे उर्वरित चार फलंदाज बाद करावे लागतील आणि त्यानंतर मिळणाऱ्या लक्ष्याचा पाठलाग करावा लागेल.
भारताच्या विजयाच्या मार्गात श्रीलंकेचे उर्वरित फलंदाज आणि पावसाचा व्यत्यय हे दोन प्रमुख अडथळे असणार आहेत. श्रीलंकेने आणखी काही धावा जोडल्यास भारतासमोरील आव्हान वाढू शकते. त्यातच पावसामुळे खेळाचा वेळ कमी झाला, तर भारताच्या विजयाच्या संधींवर परिणाम होण्याची शक्यता आहे. मालिकेत आघाडी घेण्यासाठी भारताला अखेरच्या दिवशी निर्णायक कामगिरी करावी लागणार आहे. त्यामुळे पाचव्या दिवसाचा खेळ दोन्ही संघांसाठी अत्यंत महत्त्वाचा ठरणार आहे. (India vs Sri Lanka)