Simhastha Kumbh Mela : आगामी सिंहस्थ कुंभमेळ्याच्या पार्श्वभूमीवर नाशिक जिल्ह्यातील महिला बचत गट आणि एकल महिलांसाठी रोजगाराच्या नव्या संधी उपलब्ध करून देण्याचा प्रशासनाचा प्रयत्न आहे. कुंभमेळ्यादरम्यान लागणारे पूजा साहित्य, भेटवस्तू, शोभेच्या वस्तू तसेच विविध उपयोगी साहित्य तयार करण्याची जबाबदारी महिला बचत गटांकडे सोपविण्यात येत आहे. (Nashik Simhastha Kumbh Mela)
सिंहस्थात महिलांना रोजगाराची मोठी संधी
सिंहस्थ कुंभमेळ्यात तीनपेक्षा अधिक पर्वण्या होणार असून, या काळात देश-विदेशातून मोठ्या संख्येने भाविक आणि पर्यटक नाशिकमध्ये दाखल होणार आहेत. गोदावरीत अमृतस्नान केल्यानंतर दीपदानासह विविध धार्मिक विधी करण्याची भाविकांची परंपरा आहे. याशिवाय नाशिक आणि त्र्यंबकेश्वर येथे गोदा आरतीचे आयोजनही करण्यात येणार आहे. या धार्मिक कार्यक्रमांसाठी आवश्यक असलेल्या पूजेच्या थाळ्या आकर्षक पद्धतीने तयार करण्याचे काम पेठ, हरसूल आणि त्र्यंबकेश्वर परिसरातील बचत गटांना देण्यात आले आहे. या थाळ्यांमध्ये कुंकू, हळद, कापूर, पंचगव्य आणि कापसाच्या वाती यांसारखे पूजासाहित्य महिलांकडून तयार केले जाणार आहे. भाविकांच्या गरजेनुसार या थाळ्या लहान आणि मोठ्या अशा दोन्ही आकारांत उपलब्ध करून देण्यात येणार आहेत. (Nashik Simhastha Kumbh Mela)
बांबूपासून आकर्षक भेटववस्तूंचे नियोजन
कुंभमेळ्यासाठी मंत्री, लोकप्रतिनिधी, प्रशासकीय अधिकारी तसेच अतिमहत्त्वाच्या व्यक्ती मोठ्या संख्येने नाशिकमध्ये येणार आहेत. त्यांच्या स्वागतासाठी प्रशासनाकडून बांबूपासून तयार केलेल्या आकर्षक भेटवस्तू देण्याचे नियोजन करण्यात आले आहे. त्यासाठी हरसूल परिसरात क्लस्टर उभारण्यात येत असून, बचत गटातील महिलांना बांबूपासून विविध शोभेच्या वस्तू तयार करण्याचे प्रशिक्षण दिले जात आहे. कुंभपर्व पावसाळ्यात होत असल्याने भाविक आणि पर्यटकांच्या गरजा लक्षात घेऊन छत्री, रेनकोट यांसह विविध वस्तू तयार करण्याचे कामही हाती घेण्यात आले आहे. पर्यावरणाचे संरक्षण आणि प्लास्टिकचा वापर टाळण्यासाठी कापडी पिशव्या तयार करण्यावरही भर दिला जात आहे. (Nashik Simhastha Kumbh Mela)
१० हजारांहून अधिक महिलांना रोजगार
कुंभमेळ्याच्या काळात नाशिक आणि त्र्यंबकेश्वर येथे महिला बचत गटांनी तयार केलेल्या शोभेच्या वस्तू, खाद्यपदार्थ आणि नैसर्गिक उत्पादनांचे प्रदर्शनही भरविण्यात येणार आहे. त्यामुळे विशेषतः आदिवासी महिलांना स्थानिक पातळीवर रोजगार आणि त्यांच्या उत्पादनांना बाजारपेठ मिळण्याची संधी उपलब्ध होणार आहे. या उपक्रमात जिल्ह्यातील तब्बल नऊ हजारांहून अधिक बचत गट सहभागी होत असून, त्यातून दहा हजारांपेक्षा अधिक महिलांना रोजगाराच्या संधी मिळण्याची अपेक्षा आहे. सिंहस्थ कुंभमेळा हा जगभरातील भाविकांसाठी मोठा धार्मिक उत्सव असला, तरी त्यासोबतच स्थानिक महिलांसाठी आर्थिक सक्षमीकरणाची संधीही ठरणार आहे.