ॲमस्टेलवीन : भारतीय महिला हॉकी संघाने FIH महिला हॉकी विश्वचषक २०२६मध्ये शानदार कामगिरी करत पाचव्या स्थानावर स्पर्धेचा शेवट केला. पाचव्या स्थानासाठी झालेल्या सामन्यात भारताने जागतिक क्रमवारीतील बलाढ्य जर्मनीचा ३-१ असा पराभव करत ऐतिहासिक विजय नोंदवला. १९७४च्या पहिल्या विश्वचषकात चौथं स्थान मिळवल्यानंतर भारताची ही विश्वचषकातील सर्वोत्तम कामगिरी ठरली आहे. नेदरलँड्समधील ॲमस्टेलवीनच्या वागेनर स्टेडियमवर झालेल्या या सामन्यात सुरुवातीला दोन्ही संघांकडून सावध खेळ पाहायला मिळाला. पहिल्या दोन क्वार्टरमध्ये एकही गोल झाला नाही. मात्र, सामन्याच्या तिसऱ्या क्वार्टरमध्ये भारतीय संघाने आक्रमक खेळ करत सामन्याचं चित्रच बदलून टाकलं.
भारतासाठी इशिकाने ४३व्या मिनिटाला गोल करत संघाचं खातं उघडलं. त्यानंतर अवघ्या काही मिनिटांत भारताने जर्मनीवर आणखी दोन गोल केले. नवनीत कौरने ४४व्या आणि ४७व्या मिनिटाला सलग दोन गोल करत भारताची आघाडी ३-० अशी मजबूत केली. तीन गोलच्या पिछाडीनंतर जर्मनीने जोरदार पुनरागमन करण्याचा प्रयत्न केला. अखेर लिन क्रिंग्जने ५९व्या मिनिटाला जर्मनीसाठी एक गोल केला. मात्र भारतीय बचावफळीने शेवटच्या क्षणी कोणतीही मोठी चूक होऊ दिली नाही आणि सामना ३-१ असा जिंकला.
या संपूर्ण विश्वचषक मोहिमेत भारताने सातत्यपूर्ण कामगिरी केली. संघाने केवळ एक सामना गमावला, तर चीन, इंग्लंड आणि ऑस्ट्रेलियाविरुद्ध सामने बरोबरीत राखले. दक्षिण आफ्रिकेविरुद्ध भारताने ६-१ असा मोठा विजय मिळवला, तर यजमान आणि ऑलिम्पिक विजेत्या नेदरलँड्सकडून भारताला ०-२ असा पराभव स्वीकारावा लागला. विशेष म्हणजे, भारतीय संघात ११ विश्वचषक पदार्पण करणाऱ्या खेळाडूंचा समावेश होता. त्यामुळे या युवा आणि अनुभवी खेळाडूंच्या मिश्रणाने मिळवलेलं पाचवं स्थान विशेष महत्त्वाचं ठरतं. आता भारतीय संघाचं लक्ष पुढील महिन्यात होणाऱ्या आशियाई क्रीडा स्पर्धेकडे असेल. विश्वचषकातील या ऐतिहासिक कामगिरीमुळे भारतीय महिला हॉकी संघाचा आत्मविश्वास नक्कीच वाढला आहे. भारताने पुन्हा एकदा जागतिक हॉकीच्या मंचावर आपली ताकद दाखवून दिली आहे.