Nashik Crime : आगामी सिंहस्थ कुंभमेळा २०२६च्या पार्श्वभूमीवर आरोग्य आणि पॅरामेडिकल क्षेत्रात मोठ्या प्रमाणावर मनुष्यबळाची आवश्यकता भासणार आहे. याच संधीचा फायदा घेत शासकीय भरती असल्याचा बनाव करून बेरोजगार तरुणांची फसवणूक करण्याचा प्रयत्न करणाऱ्या एका टोळीचा पंचवटी पोलिसांनी पर्दाफाश केला आहे.
सिंहस्थाच्या नावाने बनावट भरतीचा डाव !
‘बंपर कुंभमेळा भरती २०२६-२०२७’ या नावाने सोशल मीडियावर बनावट जाहिरात प्रसारित करून ही भरती थेट शासन किंवा आरोग्य विभागाकडून होत असल्याचा आभास निर्माण करण्यात आला होता. या प्रकरणी पंचवटी पोलीस ठाण्यात तीन संशयितांविरोधात माहिती तंत्रज्ञान कायद्यान्वये गुन्हा दाखल करण्यात आला आहे. सचिन रतन शिंदे, वय २९, रा. देवळा, जि. नाशिक, हा या संस्थेचा अध्यक्ष असून त्याचा व्यवसाय ॲम्बुलन्स चालकाचा आहे. निलेश बबन घोलप, वय २२, रा. ओतूर, ता. कळवण, हा संस्थेचा सचिव असून तो मेडिकल सर्व्हेअर म्हणून काम करतो. तर विक्रांत विजय सूर्यवंशी, वय ३०, रा. तांबे मळा, पेठ रोड, हा संस्थेचा उपाध्यक्ष असल्याचे पोलिस तपासात समोर आले आहे. (Nashik Crime News)
बनावट भरतीची जाहिरात तयार केली अन्...
या तिघांनी ‘हिलफोर्स फाऊंडेशन मल्टिसर्व्हिसेस’ या संस्थेच्या माध्यमातून ही बनावट भरतीची जाहिरात तयार केली होती. व्हॉट्सॲप आणि इंस्टाग्रामसह विविध सोशल मीडिया प्लॅटफॉर्मवर ही जाहिरात मोठ्या प्रमाणावर व्हायरल करण्यात आली. या प्रकरणातील मुख्य संशयित हा ॲम्बुलन्स चालक असल्याची माहिती समोर आली आहे. वैद्यकीय क्षेत्रातील दैनंदिन कामाच्या अनुभवातून आगामी सिंहस्थ कुंभमेळ्याच्या काळात आरोग्य कर्मचारी आणि पॅरामेडिकल स्टाफची मोठ्या प्रमाणावर गरज भासणार असल्याची त्याला कल्पना होती. याच माहितीचा गैरफायदा घेत त्याने आपल्या दोन मित्रांना सोबत घेत ही संस्था सुरू केल्याचा आरोप आहे.
पंचवटीतील आरटीओ कार्यालयासमोरील एका हॉस्पिटलजवळ असलेल्या कॉम्प्लेक्समध्ये भाड्याने कार्यालय घेऊन या संस्थेचे काम सुरू करण्यात आले होते. खासगी रुग्णालयांना पॅरामेडिकल मनुष्यबळ उपलब्ध करून देण्याचे काम या संस्थेमार्फत केले जात होते. मात्र, कोणतीही शासकीय परवानगी नसताना आणि कोणत्याही अधिकृत शासकीय भरती प्रक्रियेशी संबंध नसतानाही ‘सिंहस्थ कुंभमेळा’ या नावाचा वापर करून स्वतःच्या आर्थिक फायद्यासाठी बनावट भरतीची जाहिरात तयार करण्यात आली. ही जाहिरात थेट शासकीय किंवा आरोग्य विभागाचीच असल्याचा आभास निर्माण करून बेरोजगार उमेदवारांना आकर्षित करण्याचा प्रयत्न करण्यात आला. (Nashik Crime News)
पंचवटी पोलीस ठाण्यात तक्रार दाखल
दरम्यान, ही जाहिरात सोशल मीडियावर व्हायरल होताच आरोग्य क्षेत्रात खळबळ उडाली. संदर्भ सेवा रुग्णालयाचे डॉ. योगेश चित्ते, रा. चेतना नगर, यांनी याची गंभीर दखल घेत थेट पंचवटी पोलीस ठाण्यात (Panchavati Police Station) धाव घेत तक्रार दाखल केली. या तक्रारीनंतर पोलिसांनी २७ ऑगस्ट रोजी संशयितांविरोधात माहिती व तंत्रज्ञान अधिनियमाअंतर्गत गुन्हा दाखल केला आहे. या प्रकरणाचा पुढील तपास पोलीस निरीक्षक सुनील पवार करत आहेत. महत्त्वाची बाब म्हणजे, या टोळीने बनावट भरतीची जाहिरात सोशल मीडियावर मोठ्या प्रमाणावर प्रसारित केली असली, तरी सुदैवाने आतापर्यंत कोणत्याही उमेदवाराची प्रत्यक्ष आर्थिक फसवणूक झालेली नसल्याचे तपासात समोर आले आहे.
अफवांना बळी पडू नका !
दरम्यान, सिंहस्थ कुंभमेळ्याशी संबंधित कोणतीही अधिकृत भरती प्रक्रिया ही केवळ शासनाच्या अधिकृत संकेतस्थळांवर, संबंधित विभागाच्या अधिकृत माध्यमातून किंवा अधिकृत निविदा प्रक्रियेद्वारेच जाहीर केली जाते. त्यामुळे सोशल मीडियावर व्हायरल होणाऱ्या ‘कुंभमेळा भरती’, ‘शासकीय भरती’ किंवा ‘आरोग्य विभागातील नोकरी’ अशा जाहिरातींची खातरजमा केल्याशिवाय कोणत्याही उमेदवाराने त्यावर विश्वास ठेवू नये. व्हॉट्सॲप मेसेज, इंस्टाग्राम पोस्ट किंवा खासगी एजन्सींकडून मिळणाऱ्या नोकरीच्या आमिषाला बळी पडू नये, असे आवाहन पोलिस प्रशासन आणि आरोग्य विभागाकडून करण्यात आले आहे.