Namibia T20I Tri-Series : दक्षिण आफ्रिकेचा झिम्बाब्वेवर सात गडी राखून दणदणीत विजय

नवी दिल्ली : झिम्बाब्वेला सात गडी राखून पराभूत करून दक्षिण आफ्रिकेने तिरंगी मालिकेत आपले आव्हान कायम ठेवले आहे. नामिबियाकडून झालेल्या मागील पराभवानंतर त्यांनी या दणदणीत विजयासह जोरदार पुनरागमन केले. प्रथम फलंदाजी करताना झिम्बाब्वेने आठ गडी गमावून १४४ धावा केल्या. डेवाल्ड ब्रेव्हिसच्या ३२ चेंडूंतील नाबाद ७५ धावांच्या जोरावर प्रोटीज संघाने १३.४ षटकांतच हे लक्ष्य गाठले. ब्रेव्हिसच्या या खेळीत सात चौकार आणि सहा षटकारांचा समावेश होता.

प्रथम फलंदाजी करताना झिम्बाब्वेचा एकही फलंदाज जास्त वेळ टिकू शकला नाही. सलामीवीर ब्रायन बेनेटने ३५ चेंडूंमध्ये ३४ धावा करून सर्वाधिक धावा केल्या. त्याच्या या खेळीत एक षटकार आणि चार चौकारांचा समावेश होता. खालच्या फळीत, ताडीवानाशे मारुमानीने १३ चेंडूंमध्ये ३० धावांची धडाकेबाज खेळी केली. यात एका चौकाराचा आणि तीन षटकारांचा समावेश होता. इतर फलंदाजांमध्ये, बेन करनने १२ चेंडूंमध्ये चार चौकार आणि एका षटकारासह २३ धावा केल्या. इतर कोणीही २० धावांचा टप्पा गाठू शकले नाही. दक्षिण आफ्रिकेचा डुआन यान्सन हा सर्वात यशस्वी गोलंदाज ठरला, त्याने ४५ धावांत तीन बळी घेतले. प्रेनेलन सुब्रायनने दोन बळी घेतले.

प्रत्युत्तरात, लुहान ड्रे प्रिटोरियस (२२) आणि जॉर्डन हरमन (२०) या सलामीच्या जोडीने जलद धावा करण्याचा प्रयत्न केला. त्यांनी पहिल्या विकेटसाठी ३२ धावांची भागीदारी केली. ब्रेव्हिसच्या आगमनाने धावगती वाढली आणि दक्षिण आफ्रिकेने सहाव्या षटकात ६१ धावा केल्या. मात्र, याच धावसंख्येवर ड्रे प्रिटोरियस बाद झाला. टोनी डी जॉर्जी केवळ १५ धावाच करू शकला. पण ब्रेव्हिसने आपले सलग दुसरे अर्धशतक झळकावत एकहाती संघाला लक्ष्य पार करून दिले. त्याने २८ ऑगस्ट रोजी नामिबियाविरुद्धच्या पहिल्या सामन्यातही अर्धशतक झळकावले होते, पण तेव्हा तो संघाला विजय मिळवून देऊ शकला नव्हता.