DRI Gold Smuggling Seizure : DRI ची मोठी कारवाई! ६५ कोटींच्या सोन्याच्या तस्करीचा पर्दाफाश; ४२ किलोहून अधिक परदेशी सोने जप्त

नवी दिल्ली : देशभरात सुरू असलेल्या सोन्याच्या तस्करीविरोधातील कारवाईला वेग देत डायरेक्टोरेट ऑफ रेव्हेन्यू इंटेलिजन्स (DRI) ने मोठी कारवाई केली आहे. विविध ठिकाणी करण्यात आलेल्या गुप्त माहितीवर आधारित कारवायांमध्ये ४२ किलोहून अधिक परदेशी बनावटीचे सोने आणि सुमारे १० किलो चांदी जप्त करण्यात आली आहे. या मौल्यवान धातूंची एकूण किंमत ६५ कोटी रुपयांहून अधिक असल्याचे सांगण्यात आले आहे. या कारवाईत २५ जणांना अटक करण्यात आली असून, त्यामध्ये पाच परदेशी नागरिकांचा समावेश आहे. (DRI Gold Smuggling Seizure)

DRIने कोलकाता, मुंबई, केरळ, गुवाहाटी, तामिळनाडू तसेच भारत-बांगलादेश सीमेवरील विविध भागांमध्ये या कारवाया केल्या. सोन्याची तस्करी करण्यासाठी वाहनांमध्ये तयार करण्यात आलेल्या विशेष पोकळ्या, शरीरात लपवणे, विमानतळावरील ट्रान्झिट प्रवासी आणि कर्मचाऱ्यांचा वापर तसेच जमीन आणि समुद्रमार्गाचा आधार घेतला जात असल्याचे तपासातून समोर आले आहे. (DRI Gold Smuggling Seizure)

मुंबई विमानतळावर ६.८५ किलो सोने जप्त :

२८ आणि २९ ऑगस्ट रोजी DRIने मुंबईतील छत्रपती शिवाजी महाराज आंतरराष्ट्रीय विमानतळावर मोठी कारवाई केली. दुबई, बँकॉक आणि माले येथून मुंबईमार्गे प्रवास करणाऱ्या परदेशी नागरिकांचा एका संघटित तस्करी टोळीशी संबंध असल्याचे तपासात आढळले. तस्करीचे सोने विमानतळावरून गुप्तपणे बाहेर काढण्यासाठी एका विमानतळ कर्मचाऱ्याचीही मदत घेतली जात असल्याचा संशय आहे. कारवाईदरम्यान २४ कॅरेट सोन्याच्या धुळीच्या वॅक्स स्वरूपातील १६ कॅप्सूल जप्त करण्यात आल्या. त्यांचे एकूण वजन ६.८५ किलो होते. (DRI Gold Smuggling Seizure)

या प्रकरणात पाच परदेशी नागरिक आणि एका विमानतळ कर्मचाऱ्यासह सहा जणांना अटक करण्यात आली.

कोलकात्यातही मोठी कारवाई :

२९ ऑगस्ट रोजी कोलकाता येथील नेताजी सुभाषचंद्र बोस आंतरराष्ट्रीय विमानतळावर DRIने दोन स्वतंत्र कारवाया केल्या. दुबईहून आलेल्या दोन प्रवाशांकडून कपडे आणि अंतर्वस्त्रांमध्ये लपवलेले ४.८७ किलो सोने जप्त करण्यात आले. सोन्याची पेस्ट वितळवून त्यापासून सोन्याच्या बारच्या स्वरूपात सोने काढण्यात आले. याच दिवशी बँकॉकहून आलेल्या प्रवाशाकडून ३.३६ किलो परदेशी बनावटीचे सोने जप्त करण्यात आले. हे सोने ११ कच्च्या साखळ्यांच्या स्वरूपात होते. दुसऱ्या प्रवाशाने हे सोने त्याच्याकडे दिल्याचा संशय असून, ग्रीन चॅनेलमधून ते बाहेर नेण्याचा प्रयत्न करण्यात आला होता. (DRI Gold Smuggling Seizure)

नादिया जिल्ह्यातील बानपूर गावात BSFच्या जवानांनी केलेल्या कारवाईत एका महिलेच्या घरातून १५.६१ किलो वजनाचे १२५ परदेशी सोन्याचे बार जप्त करण्यात आले. DRIच्या चौकशीत महिलेने तस्करीत सहभागी असल्याची कबुली दिल्याचे सांगण्यात आले असून, तिला अटक करण्यात आली. (DRI Gold Smuggling Seizure)

केरळमध्येही तस्करीचा पर्दाफाश :

केरळमध्ये २९ ऑगस्ट रोजी दोन स्वतंत्र कारवाया करण्यात आल्या. कोचीन आंतरराष्ट्रीय विमानतळावर रास अल खैमाह येथून आलेल्या प्रवाशाकडून शरीरावर लपवलेले १.७८ किलो सोने जप्त करण्यात आले. तर कालिकत आंतरराष्ट्रीय विमानतळावर जेद्दाहहून आलेल्या एका प्रवाशाच्या लोखंडी बॉक्समध्ये खास तयार करण्यात आलेल्या पोकळीत लपवलेले ५४९ ग्रॅम २४ कॅरेट परदेशी सोने आढळले. दोन्ही प्रकरणांमध्ये संबंधित प्रवाशांना अटक करण्यात आली. (DRI Gold Smuggling Seizure)

सीमा आणि समुद्रमार्गानेही तस्करी :

२६ आणि २७ ऑगस्ट रोजी DRIने BSFच्या समन्वयाने भारत-बांगलादेश सीमेवरही कारवाई केली. दोन स्वतंत्र प्रकरणांत ९३५ ग्रॅम आणि १.७४ किलो परदेशी सोने जप्त करण्यात आले असून, प्रत्येकी एका व्यक्तीला अटक करण्यात आली. कोलकात्यात चार जणांकडून शरीरात लपवलेल्या कॅप्सूलमधून १.४८ किलो परदेशी सोने जप्त करण्यात आले. हे सोने थायलंडमधून तस्करी केल्याचा संशय आहे. या प्रकरणात चार व्यक्ती आणि त्यांच्या एका सूत्रधाराला अटक करण्यात आली. (DRI Gold Smuggling Seizure)

गुवाहाटीमध्ये त्रिपुरा सेक्टरमधून भारत-बांगलादेश सीमेच्या मार्गाने तस्करी करण्यात आल्याचा संशय असलेले ३.८४ किलो सोन्याचे बार जप्त करण्यात आले. या प्रकरणात एका महिलेसह दोघांना अटक करण्यात आली. तामिळनाडूतील रामनाथपुरम येथे श्रीलंकेमार्गे समुद्रातून तस्करी केल्याचा संशय असलेले १.३६० किलो परदेशी सोने आणि ९.९९ किलो परदेशी चांदी जप्त करण्यात आली. या प्रकरणात तीन जणांना अटक करण्यात आली. (DRI Gold Smuggling Seizure)

DRIच्या या गुप्त माहितीवर आधारित आणि समन्वयाने करण्यात आलेल्या कारवायांमुळे सोन्याच्या तस्करीच्या नेटवर्कवर मोठा आघात झाला आहे. देशात बेकायदेशीरपणे मौल्यवान धातू आणण्याच्या साखळीतील विविध टप्प्यांवर कारवाई करून तस्करी रोखण्याचे प्रयत्न सुरू असल्याचे DRIने स्पष्ट केले आहे. (DRI Gold Smuggling Seizure)