Nashik MHADA Scam : नाशिकमधील बहुचर्चित म्हाडा भूखंड फसवणूक प्रकरणात अखेर महसूल प्रशासनाने कारवाईचा बडगा उगारला आहे. या प्रकरणात बेकायदेशीरपणे काम केल्याचा ठपका ठेवत एका मंडळ अधिकाऱ्यासह तीन तत्कालीन तलाठ्यांना निलंबित करण्यात आले आहे. या कारवाईमुळे नाशिकच्या महसूल विभागात मोठी खळबळ उडाली असून, या प्रकरणातील आणखी कोणावर कारवाई होणार, याकडे लक्ष लागले आहे.
एसआयटी चौकशीत दोष सिद्ध
म्हसरूळ, गंगापूर आणि नाशिक शहर-१ या भागांतील तत्कालीन तलाठी आणि अधिकाऱ्यांवर ही कारवाई करण्यात आली आहे. म्हाडा भूखंड फसवणूक प्रकरणाच्या चौकशीसाठी विभागीय आयुक्तांच्या अध्यक्षतेखाली विशेष तपास पथक अर्थात एसआयटी स्थापन करण्यात आली होती. या एसआयटीकडून संबंधित अधिकाऱ्यांच्या कार्यकाळातील कार्यालयीन दप्तराची सखोल तपासणी करण्यात आली. कागदपत्रांची छाननी आणि चौकशीदरम्यान संबंधित अधिकारी दोषी आढळून आल्यानंतर निवासी उपजिल्हाधिकाऱ्यांकडून त्यांच्या निलंबनाचे आदेश जारी करण्यात आले. (Nashik MHADA Scam)
Nashik : पावसाने काहीशी उघडीप घेतली असली, तरी नाशिक शहरात सध्या ऊन-पावसाचा खेळ नागरिकांच्या आरोग्यासाठी त्रासदायक ठरत आहे. बदलते वातावरण, ठिकठिकाणी ...
कागदोपत्री फेरफार केल्याचा आरोप
नियमांनुसार, एक एकरपेक्षा अधिक क्षेत्रावर बांधकाम असलेल्या काही गृहप्रकल्पांमध्ये ठरावीक घरे म्हाडाला हस्तांतरित करणे विकासकांसाठी बंधनकारक असते. ही घरे म्हाडाच्या माध्यमातून सर्वसामान्य नागरिकांना तुलनेने कमी दरात उपलब्ध करून दिली जातात. मात्र, नाशिकमधील या प्रकरणात एक एकरपेक्षा अधिक क्षेत्रावर बांधकाम झालेले असतानाही कागदोपत्री फेरफार करून प्रकल्पाचे क्षेत्रफळ एक एकरपेक्षा कमी असल्याचे दाखवण्यात आल्याचा आरोप आहे. या फेरफारामुळे संबंधित प्रकल्प म्हाडाच्या नियमांच्या कक्षेबाहेर दाखवण्यात आला आणि म्हाडाला मिळणारी घरे हडप करण्यात आल्याचे तपासातून समोर आले आहे. (Nashik MHADA Scam)
बांधकाम व्यावसायिकांसह अधिकाऱ्यांवरही गुन्हे
या प्रकरणात यापूर्वीच अनेक बड्या बांधकाम व्यावसायिकांसह शासकीय अधिकाऱ्यांवर गुन्हे दाखल करण्यात आले आहेत. एसआयटीच्या तपासातून संबंधित अधिकाऱ्यांनी केलेल्या कथित बेकायदेशीर कामांचा उलगडा झाल्यानंतर आता प्रशासनाने निलंबनाची कारवाई सुरू केली आहे. या कारवाईमुळे महसूल विभागात खळबळ उडाली असून, म्हाडा भूखंड फसवणूक प्रकरणातील तपासाची व्याप्ती आणखी वाढण्याची शक्यता आहे. आगामी काळात या प्रकरणात आणखी कोणत्या अधिकारी किंवा बांधकाम व्यावसायिकांवर कारवाई होते, याकडे नाशिककरांचे लक्ष लागले आहे.