मुंबई : मुंबईच्या दादरमधील टिळक पुलाजवळ रविवारी सायंकाळी एक संतापजनक घटना समोर आली आहे. रस्त्यावर ट्रॅफिक जाम असताना बसला पुढे जाऊ देण्यावरून झालेल्या वादातून एका कारचालकाने BEST बसच्या चालकाला कथितपणे मारहाण केल्याची माहिती समोर आली आहे. या संपूर्ण प्रकारचा एक व्हिडिओ सोशल मीडियावर जोरदार व्हायरल होत असून, यामुळे प्रवाशांच्या सुरक्षेचा प्रश्न पुन्हा एकदा ऐरणीवर आला आहे. (Dadar Bus Driver)
Nashik Crime News : दिंडोरी तालुक्यातील लखमापूर येथे ७० वर्षीय वृद्ध महिलेचा खून झाल्याची धक्कादायक घटना समोर आली आहे. घराजवळील तळ्यात महिलेचा मृतदेह आढळून ...
नेमकी घटना कशी घडली ?
बेस्ट प्रशासनाला मिळालेल्या अहवालानुसार, ही घटना रविवारी (६ सप्टेंबर) रात्री साडेसात वाजण्याच्या सुमारास घडली. वेट लीज (Wet Lease) अंतर्गत चालवली जाणारी बस क्रमांक ८२१५ (रूट C-40/33) ही शिवडी बस स्थानकातून दिंडोशीच्या दिशेने निघाली होती. बस वडाळा डेपोची होती. दादरच्या व्यस्त टिळक पुलाजवळ प्रचंड ट्रॅफिक जाम असल्यामुळे बस तिथेच अडकली होती. यादरम्यान मागून येणाऱ्या एका कारचालकाला बसने वाट दिली नाही, या कारणावरून कारचालक प्रचंड संतापला. त्याने आपली कार पुढे नेऊन थेट बसच्या समोर उभी केली आणि रागाच्या भरात बसमध्ये शिरून चालकाला जाब विचारत मारहाण केली.
व्हायरल व्हिडिओमधील धक्कादायक दृश्य
सोशल मीडियावर व्हायरल झालेली ही क्लिप अंगावर काटा आणणारी आहे. व्हिडिओमध्ये स्पष्ट दिसते की, बस चालकाच्या आसनाजवळ तीन तरुण उभे आहेत. त्यातील एका व्यक्तीने चालकाला कानशिलात लगावली, तर दुसऱ्याने त्याला गंभीर धमक्या दिल्या. यावेळी बस प्रवाशांनी खसाखस भरलेली होती. आश्चर्याची गोष्ट म्हणजे, चालकाला मारहाण सुरू असताना बसमधील एकाही प्रवाशाने त्याला वाचवण्यासाठी किंवा मध्यस्थी करण्यासाठी पुढे न येणे आश्चर्यकारक होते. बसचा कंडक्टर सुरुवातीला शांत उभा होता, पण नंतर त्याने त्या लोकांना बसमधून खाली उतरण्यास सांगितले. त्यानंतर ते तिघेही जण बसमधून खाली उतरून निघून गेले. (Viral video)
चालकाची पोलिसांत तक्रार; आज होणार पुढील तपास
या धक्क्यातून सावरल्यानंतर पीडित BEST चालकाने थेट शिवाजी पार्क पोलीस ठाणे गाठले आणि घडलेल्या प्रकारची अधिकृत तक्रार नोंदवली. चालकाच्या तक्रारीची गंभीर दखल घेत पोलिसांनी त्याला सोमवारी सकाळी १० वाजता पुन्हा पोलीस ठाण्यात बोलावले आहे. पोलीस आता याप्रकरणी पुढील कायदेशीर कारवाई करत असून, व्हायरल व्हिडिओच्या आधारे त्या अरेरावी करणाऱ्या कारचालक आणि त्याच्या सोबत्यांचा शोध घेतला जात आहे. (BEST Bus Driver Assault)