Jalgaon : दहीहंडी उत्सवात सात थर लावून जीवाची बाजी लावणाऱ्या गोविंदांच्या हातात बक्षिसाच्या नावाखाली अवघे 5 हजार 100 रुपये दिल्याने जळगावात मोठा वाद निर्माण झाला आहे. आयोजकांनी प्रसारमाध्यमांमधून 51 हजार रुपयांचे बक्षीस जाहीर केले होते, असा दावा गोविंदा पथकाने केला आहे. मात्र, हंडी फोडल्यानंतर आयोजकांनी पूर्ण रक्कम देण्यास नकार दिल्याचा आरोप करण्यात आला आहे. जळगाव शहरातील सुभाष चौक मित्र मंडळाच्या दहीहंडी उत्सवात हा प्रकार घडला.
जाहीर केले 51 हजार, दिले फक्त 5,100
यंदाच्या उत्सवासाठी उच्च थर लावणाऱ्या गोविंदा पथकांसाठी मोठ्या बक्षिसांची घोषणा करण्यात आली होती. हीच घोषणा पाहून गोपाळ पेठ मंडळाच्या गोविंदांनी तब्बल 7 थर लावत दहीहंडीला सलामी दिली. सात थरांचा सराव करण्यासाठी गेल्या महिनाभरापासून मेहनत घेतल्याचं गोविंदांचं म्हणणं आहे. या दरम्यान अनेक गोविंदा जखमीही झाल्याचा दावा त्यांनी केला. त्यामुळे सलामीनंतर जाहीर केल्याप्रमाणे 51 हजार रुपयांचे बक्षीस मिळेल, अशी त्यांची अपेक्षा होती. मात्र, सलामी दिल्यानंतर आयोजकांनी 51 हजार रुपये देण्यास नकार देत केवळ 5 हजार 100 रुपये देण्याचा प्रयत्न केल्याचा आरोप गोविंदा पथकाने केला.
Dharmavir Fort : छत्रपती संभाजी महाराजांच्या शौर्याची आणि बलिदानाची साक्ष देणाऱ्या अहिल्यानगर जिल्ह्यातील ऐतिहासिक धर्मवीर गडाला मोठा सन्मान मिळाला आहे. ...
गोविंदांचा दहीहंडीखालीच ठिय्या
यामुळे संतप्त झालेल्या गोविंदांनी आयोजकांविरोधात थेट नाराजी व्यक्त केली. "ही आमची उघड फसवणूक आहे. जीव धोक्यात घालून सात थर लावले, मग जाहीर केलेली रक्कम देण्यास नकार का?" असा सवाल गोविंदांनी उपस्थित केला. एवढंच नाही, तर जाहीर केलेली संपूर्ण 51 हजार रुपयांची रक्कम मिळावी, या मागणीसाठी गोविंदांनी थेट दहीहंडीखालीच ठिय्या मांडला आणि रस्ता रोको आंदोलन सुरू केलं.
रस्त्यावर वाहनांच्या लांबच लांब रांगा
अचानक झालेल्या या आंदोलनामुळे सुभाष चौक परिसरातील वाहतूक काही काळ ठप्प झाली. रस्त्यावर वाहनांच्या लांबच लांब रांगा लागल्या. घटनेची माहिती मिळताच पोलिसांनी घटनास्थळी धाव घेतली आणि परिस्थिती नियंत्रणात आणण्याचा प्रयत्न केला. मात्र, पूर्ण बक्षिसाची रक्कम मिळाल्याशिवाय आंदोलन मागे घेणार नाही, असा इशारा गोविंदा पथकाने दिला आहे.आता आयोजक खरंच 51 हजार रुपयांचे बक्षीस देणार का? की जाहीर केलेल्या बक्षिसाच्या रकमेवरून सुरू झालेला हा वाद आणखी चिघळणार, हे पाहणं महत्त्वाचं ठरणार आहे
