Maharajganj Shocker Video : जमिनीच्या वादातून संतापलेली तरुणी हातात बंदूक घेऊन पोलीस चौकीत शिरली अन् थेट...उत्तर प्रदेशातील धक्कादायक घटना

उत्तर प्रदेश : उत्तर प्रदेशातील महाराजगंज (Uttar Pradesh Maharajganj)  जिल्ह्यातील धरमौली गावात वडिलोपार्जित जमिनीच्या वादातून एक भलताच प्रकार समोर आला आहे. सोमवारी दुपारी एका तरुण महिलेने हातात थेट परवानाधारक दुहेरी नळीची बंदूक घेऊन परतावल पोलीस चौकीत प्रवेश केला. हातात भरलेली बंदूक घेऊन आलेल्या तरुणीला पाहताच तेथील पोलीस कर्मचाऱ्यांची एकच धावपळ उडाली. श्यामदेउरवा पोलीस ठाण्याच्या हद्दीत घडलेल्या या घटनेमुळे परिसरात काही काळ प्रचंड भीतीचे वातावरण निर्माण झाले होते.

चौकीत रडत रडत न्यायाची मागणी

Uttar Pradesh Viral Video : "आधी न्याय द्या, मगच बंदूक देईन!" परवानाधारक शस्त्र घेऊन तरुणीचा पोलीस चौकीत राडा; व्हिडिओ व्हायरल
.
.#uttarpradesh #viralvídeo #policestation #prahaarnewsline #prahaarshorts pic.twitter.com/Ea4E6kLolX

— Prahaar Newsline (@PrahaarNewsline) September 8, 2026

सोमवारी दुपारी अडीच वाजेच्या सुमारास ही महिला प्रचंड संतापलेल्या आणि भावूक अवस्थेत रडत पोलीस चौकीत दाखल झाली. जमिनीच्या वादातून कुटुंबातील लोकांनीच आपल्याला मारहाण केल्याचा गंभीर आरोप करत तिने पोलिसांकडे न्यायाची मागणी केली. सुरक्षेचा धोका लक्षात घेऊन पोलिसांनी आधी तिच्या हातातील बंदूक ताब्यात घेण्याचा प्रयत्न केला. मात्र, "आधी माझी तक्रार ऐका आणि न्याय द्या," असा पवित्रा घेत तिने सुरुवातीला शस्त्र देण्यास स्पष्ट नकार दिला.

'डायल-११२' आणि वरिष्ठ पोलिसांचा हस्तक्षेप

परिस्थितीचे गांभीर्य ओळखून तातडीने 'डायल-११२' ची आपत्कालीन टीम आणि वरिष्ठ पोलीस अधिकारी घटनास्थळी दाखल झाले. पोलिसांनी अत्यंत मुत्सद्दीपणे तरुणीशी संवाद साधून तिची समजूत काढली आणि तिला शांत केले. त्यानंतर तिची बंदूक सुरक्षितपणे ताब्यात घेऊन तिला चौकीत बसवण्यात आले आणि तिच्या कुटुंबातील इतर सदस्यांना तातडीने तेथे पाचारण करण्यात आले.

कौटुंबिक जमिनीची वाटणी वादाच्या मुळाशी

स्थानिक गावकऱ्यांनी दिलेल्या माहितीनुसार, या सर्व प्रकारामागे कौटुंबिक जमिनीच्या मालकी हक्काचा वाद आहे. वडिलोपार्जित जमिनीतील स्वतःचा हिस्सा आपल्या नावावर व्हावा, अशी या तरुणीची मागणी होती. याच मुद्द्यावरून घरातील नातेवाईकांसोबत तिची बाचाबाची झाली आणि पुढे त्याचे रूपांतर हाणामारीत झाले. या मारहाणीमुळे संतापलेल्या तरुणीने घरात ठेवलेली बंदूक उचलली आणि थेट पोलीस ठाणे गाठले.

बँक गार्डच्या नावावर नोंदणीकृत बंदूक

तपासात समोर आले की, ही दुहेरी नळीची बंदूक तिचे नातेवाईक रामानंद यादव यांच्या नावावर नोंदणीकृत आहे. रामानंद यांनी यापूर्वी अनेक सरकारी बँकांमध्ये सुरक्षारक्षक (सिक्युरिटी गार्ड) म्हणून सेवा बजावली आहे. मात्र, परवानाधारक शस्त्र तरुणीच्या हातात कसे आले आणि ती ते घेऊन थेट सार्वजनिक ठिकाणी कशी आली, या गंभीर मुद्द्यावर पोलीस आता लक्ष केंद्रित करत आहेत.

पोलीस तपासाला वेग

सध्या पोलीस या प्रकरणाच्या दोन्ही बाजूंचा सखोल तपास करत आहेत. एकीकडे जमिनीचा वाद आणि मारहाणीची तक्रार, तर दुसरीकडे परवानाधारक शस्त्राचा असा गैरवापर. परतावल पोलीस चौकीचे प्रभारी आलोक राय यांनी सांगितले की, "हा पूर्णपणे कौटुंबिक आणि जमिनीशी संबंधित वाद आहे. सर्व बाबींची चौकशी केली जात असून, कुटुंबातील सदस्यांचे जवाब नोंदवल्यानंतर नियमानुसार कडक कायदेशीर कारवाई केली जाईल."