Bangladesh tank blast : बांगलादेशमध्ये युद्धसरावात थरार! टँकमधून फायरिंग करताच अचानक स्फोट; २ जवानांचा मृत्यू

ढाका : बांगलादेशमध्ये सैन्याच्या फील्ड फायरिंग सरावादरम्यान भीषण दुर्घटना घडली आहे. चटगावमधील हाटहजारी फील्ड फायरिंग रेंजमध्ये टँकमधून गोळीबार सुरू असताना अचानक अपघात झाला. या दुर्घटनेत बांगलादेश लष्करातील दोन जवानांचा मृत्यू झाला असून एक अधिकारी गंभीर जखमी झाला आहे. बांगलादेशच्या इंटर-सर्व्हिसेस पब्लिक रिलेशन्स अर्थात ISPRने बुधवारी या घटनेची अधिकृत माहिती दिली. मिळालेल्या माहितीनुसार, हाटहजारी फील्ड फायरिंग रेंजमध्ये लष्करी सराव सुरू होता. यावेळी एका टँकमधून गोळीबार केला जात असताना अचानक दुर्घटना घडली. या घटनेनंतर परिसरात मोठी खळबळ उडाली. टँकमध्ये असलेल्या दोन सैनिकांचा या दुर्घटनेत मृत्यू झाला, तर एका लष्करी अधिकाऱ्याला गंभीर दुखापत झाली.(Bangladesh tank blast)

दुर्घटनेनंतर जखमी अधिकाऱ्याला तातडीने वैद्यकीय मदत देण्यात आली. त्यांची प्रकृती गंभीर असल्याने त्यांना हेलिकॉप्टरद्वारे ढाक्यातील Combined Military Hospital (CMH) येथे पुढील उपचारांसाठी हलवण्यात येत आहे. त्यांच्या प्रकृतीबाबत अधिकृतपणे यापेक्षा अधिक माहिती अद्याप देण्यात आलेली नाही. दरम्यान, सोशल मीडियावर या घटनेचा कथित व्हिडिओ मोठ्या प्रमाणावर व्हायरल होत आहे. काही माध्यमांच्या वृत्तांमध्ये दुर्घटनेतील टँक चिनी बनावटीचा Type 59 असल्याचे म्हटले आहे; मात्र बांगलादेशच्या ISPRच्या अधिकृत निवेदनात टँकचा प्रकार किंवा स्फोटाचे नेमके कारण नमूद केलेले नाही. त्यामुळे या तपशीलाची स्वतंत्र अधिकृत पुष्टी होणे बाकी आहे.

स्फोट नेमका कशामुळे झाला, टँकमध्ये तांत्रिक बिघाड झाला होता का किंवा गोळीबाराच्या प्रक्रियेत कोणती समस्या निर्माण झाली, याबाबत सध्या अधिकृत निष्कर्ष समोर आलेला नाही. दुर्घटनेचे कारण शोधण्यासाठी चौकशी सुरू करण्यात आली आहे, अशी माहिती ISPRने दिली आहे. मृत जवान आणि जखमी अधिकाऱ्यांची ओळखही अद्याप सार्वजनिक करण्यात आलेली नाही. चौकशी पूर्ण झाल्यानंतर दुर्घटनेमागील नेमके कारण आणि इतर तपशील स्पष्ट होण्याची शक्यता आहे. या दुर्घटनेमुळे लष्करी प्रशिक्षणादरम्यान वापरल्या जाणाऱ्या शस्त्रसामग्री आणि सुरक्षा प्रक्रियांबाबतही प्रश्न उपस्थित झाले आहेत. मात्र तपास पूर्ण होण्यापूर्वी कोणत्याही विशिष्ट कारणाला जबाबदार धरणे घाईचे ठरेल.(Bangladesh tank blast)

अधिकाऱ्याची प्रकृती गंभीर

या घटनेमुळे एकच गोंधळ उडाला. तातडीने जखमी जवानांना हेलिकॉप्टरच्या मदतीने रुग्णालयात दाखल करण्यात आलंय. या दुर्घटनेमध्ये एक अधिकारी सुद्धा गंभीर जखमी झाला आहे. या अधिकाऱ्यावर उपचार सुरू आहे. ढाका येथील सैन्याच्या रुग्णालयात जखमींना दाखल केलं असून उपचार सुरूआहे. बागलादेशच्या सैन्याकडून याबद्दल अद्याप जवानांची ओळख प्रसिद्ध करण्यात आली नाही. या प्रकरणी चौकशीचे आदेश देण्यात आले आहे. चौकशी केल्यानंतर अधिकृत माहिती दिली जाणार आहे. या घटनेचा व्हिडीओ सोशल मीडियावर मात्र व्हायरल झाला आहे.