Chandrakant Patil : डॉ. बाबासाहेब आंबेडकरांच्या धम्मदीक्षेशी संबंधित दुर्मिळ दस्तऐवजांचा नवीन खंड २० ऑक्टोबर रोजी होणार प्रकाशित

Mumbai : भारतरत्न डॉ. बाबासाहेब आंबेडकर यांनी नागपूर येथे घेतलेल्या ऐतिहासिक बौद्ध धम्मदीक्षेशी संबंधित दुर्मिळ पत्रव्यवहार, कागदपत्रे आणि महत्त्वपूर्ण दस्तऐवज संकलित करून त्यांचा नवीन खंड प्रकाशित करण्याचा निर्णय घेण्यात आला आहे. उच्च व तंत्रशिक्षण मंत्री चंद्रकांतदादा पाटील यांच्या अध्यक्षतेखाली मंत्रालयात पार पडलेल्या बैठकीत यासंदर्भातील सूचना देण्यात आल्या.(Chandrakant Patil)

या बैठकीला उच्च व तंत्रशिक्षण विभागाचे अपर मुख्य सचिव बी. वेणुगोपाल रेड्डी, उच्च शिक्षण संचालक डॉ. शैलेंद्र देवळाणकर, तंत्रशिक्षण विभागाचे संचालक डॉ. प्रमोद नाईक, उपसचिव अशोक मांडे, उपसचिव प्रताप लुबाळ, सहसंचालक डॉ. अर्चना बोऱ्हाडे यांच्यासह समितीचे इतर सदस्य उपस्थित होते.(Chandrakant Patil)

डॉ. आंबेडकरांच्या धम्मदीक्षेच्या ऐतिहासिक पार्श्वभूमीवर उपलब्ध असलेला दुर्मिळ पत्रव्यवहार आणि कागदपत्रे जतन करून हा ऐतिहासिक ठेवा सर्वांसमोर आणण्याच्या दृष्टीने हे पाऊल उचलण्यात आले आहे. हे काम अधिक वेगाने पूर्ण करून आगामी २० ऑक्टोबर २०२६ रोजी दसऱ्याच्या मुहूर्तावर हा नवीन खंड प्रकाशित करण्याचे निर्देश मंत्री चंद्रकांतदादा पाटील यांनी संबंधित अधिकाऱ्यांना दिले आहेत.(Dr Babasaheb Ambedkar)

डॉ. बाबासाहेब आंबेडकर यांच्या विचारांचा आणि सामाजिक परिवर्तनाच्या कार्याचा इतिहास पुढील पिढ्यांपर्यंत पोहोचवण्यासाठी अशा दुर्मिळ साहित्याचे संकलन आणि संवर्धन अत्यंत महत्त्वाचे ठरणार आहे. या प्रकाशनयोजनामुळे नागपूर येथील ऐतिहासिक धम्मदीक्षा सोहळ्याशी संबंधित अनेक मोलाचे संदर्भ अभ्यासक, संशोधक आणि सर्वसामान्य नागरिकांसाठी उपलब्ध होणार आहेत.(Chandrakant Patil)