Rybakina vs Sabalenka Final : एलेना रायबाकिनाचे अमेरिकन ओपनवर नाव; अंतिम सामन्यात आर्यना सबालेन्काचा पराभव करत पटकावले विजेतेपद

न्यूयॉर्क: अमेरिकन ओपन टेनिस स्पर्धेच्या अंतिम फेरीत एक अत्यंत रोमहर्षक सामना पाहायला मिळाला. सलग तिसऱ्यांदा अमेरिकन ओपनचे चॅम्पियन बनण्याचे आर्यना सबालेन्काचे स्वप्न कझाकस्तानच्या एलेना रायबाकिनाने धुळीस मिळवले. रायबाकिनाने एका अतिशय चुरशीच्या सामन्यात बेलारूसच्या सबालेन्काचा ६-४, ५-७, ६-२ असा पराभव करत आपले पहिलेवहिले अमेरिकन ओपन महिला एकेरीचे विजेतेपद पटकावले आहे.(Rybakina vs Sabalenka Final)

अटीतटीचा अंतिम सामना

या अंतिम सामन्यात दोन्ही खेळाडूंनी शानदार खेळ प्रदर्शन केला. पहिल्या सेटमध्ये रायबाकिनाने ६-४ अशी बाजी मारत दणक्यात सुरुवात केली. मात्र, पराभव मान्य नसलेल्या सबालेन्काने दुसऱ्या सेटमध्ये जोरदार पुनरागमन करत ७-५ ने विजय मिळवला आणि सामना निर्णायक तिसऱ्या सेटपर्यंत नेला. अखेरच्या व निर्णायक सेटमध्ये रायबाकिनाने उत्कृष्ट संयम आणि आक्रमक खेळाचे प्रदर्शन घडवत ६-२ असा विजय मिळवला आणि विजेतेपदावर आपले नाव कोरले.

सबालेन्काला पराभवानंतर अनावर झाला राग

सलग तिसरे अमेरिकन ओपन विजेतेपद जिंकण्याचे सबालेन्काचे ध्येय होते. मात्र, ऐन अंतिम टप्प्यावर झालेला पराभव आणि ९९ आठवडे राखलेले जागतिक क्रमवारीतले अव्वल स्थान गमावल्यामुळे तिला तीव्र मानसिक धक्का बसला. सामना संपताच तिचा राग आणि निराशा स्पष्टपणे दिसून आली. तिने जोरात आपली रॅकेट कोर्टवर आपटली. एवढेच नव्हे तर, जवळच तिच्या भावना कॅमेऱ्यात टिपण्याचा प्रयत्न करणाऱ्या एका कॅमेरामॅनवर ती ओरडल्याचेही पाहायला मिळाले.

पराभवानंतर सबालेन्काची सकारात्मक प्रतिक्रिया

सुरुवातीला राग आणि नैराश्याची भावना असली, तरी सामन्यानंतर झालेल्या संवादामध्ये सबालेन्काने हा पराभव अत्यंत सकारात्मकतेने स्वीकारल्याचे दिसून आले. आपल्या कामगिरीबाबत बोलताना ती म्हणाली, "मला वाटते की, मी दाखवलेल्या खेळामुळे मी एकंदरीत आनंदी असायला हवे. या संपूर्ण स्पर्धेतून शिकण्यासारखे बरेच काही आहे." अनुभवावर भर देत सबालेन्काने पुढे सांगितले की, "या अनुभवाने पुन्हा एकदा सिद्ध केले आहे की मी नेहमीच अधिक मजबूत होऊन कमबॅक करते. या संपूर्ण सीझनमधून मिळालेल्या शिकवणींनी मला आधीच अधिक कणखर बनवले आहे, आणि हाच आत्मविश्वास मला पुढील वर्षी आणखी चमकदार कामगिरी करण्यासाठी नक्कीच प्रेरित करेल."(Rybakina vs Sabalenka Final)