Food- Drug Administration Action: अन्न- औषध प्रशासनाची राज्यभर धडक कारवाई, मुंबई- पुण्यातील अनेक अस्थापनांची परवाने निलंबित

मुंबई: ऐन गणेशोत्सवाच्या काळामध्ये अन्न- औषध प्रशासनाने मुंबई आणि पुण्यामध्ये हॉटेल आणि रेस्टॉरंटवर धडक कारवाई करत परवाने निलंबित केले आहे. यामुळे पुन्हा एकदा हॉटेल आणि रेस्टॉरंट चालकांचे धाबे दणाणले आहेत. राज्यात एकूण ३० लिटर दूध, ४,१३८.७ किलो दुग्धजन्य आणि मिठाई साठा शिवाय, खवा, पनीर, तूप, पेढा, हलवा, श्रीखंड बटर आणि मिल्क पावडर इत्यादीचाही साठा जप्त केला आहे. अन्न- औषध प्रशासनाने मारलेल्या धडक कारवाईतील साठ्याची एकूण किंमत १५,५८,०७२ रूपये इतकी किंमत आहे. तर, जालना जिल्ह्यात प्रतिबंधित अन्नपदार्थांविरुद्ध अन्न व औषध प्रशासनाची धडक कारवाई करत १ कोटी ३५ लाख रुपयांचा मुद्देमाल जप्त केला आहे. मुंबईमध्ये मोठ्या प्रमाणावर गणेशोत्सव साजरा केला जातो. सणानिमित्त मिठाई, खवा, पनीर, तूप, खाद्यतेल, फरसाण, रवा, बेसन, मैदा, सुकामेवा यांसह आदी खाद्यपदार्थांमध्ये भेसळ होण्याची शक्यता असते. हीच शक्यता लक्षात घेत अन्न- औषध प्रशासनाने राज्यामध्ये धडक कारवाईचा सपाटा लावला आहे. अन्नपदार्थाच्या उत्पादकांपासून ते किरकोळ विक्रेता दुकानांची सुद्धा एफडीएकडून तपासणी केली जात आहे. ज्या आस्थापनांमध्ये तरतुदींचे उल्लंघन होत असल्याचे आढळून येईल, त्यांच्यावर कडक कारवाई करण्यात येणार असल्याचा इशारा अन्न व औपध प्रशासनाकडून देण्यात आला आहे. मुंबईमध्ये तब्बल ३८ अन्न अस्थापनांच्या तपासण्या करत ४७ खाण्याच्या गोष्टींचे सॅम्पल गोळा केले. निकृष्ट दर्जाचा संशय असलेल्या ठिकाणीच एफडीएने कडून कारवाई करण्यात आली आहे. हजारो किलोंचा मुद्देमाल जप्त करत फुड सॅम्पल विविध ठिकाणी तपासणीसाठी पाठवण्यात आले आहे. अनेक अस्थापनांमध्ये, सैल स्वरूपामध्ये अन्नाची विक्री, अयोग्य साठवणूक, अपूरे लेबलिंग आढळल्यामुळे, निकृष्ठ दर्जाचे अन्नपदार्थ यांसह अनेक वेगवेगळ्या कारणामुळे एफडीएने कारवाई केलेली आहे. दुग्धजन्य पदार्थांशिवाय, एफडीएकडून गुटखा, पान मसाला, सुंगधित तंबाखू, सुंगधित सुपारीसह अन्य वेगवेगळ्या पदार्थांवरही कारवाई करण्यात आली. या धडक कारवाईतही करोडो रूपयांचा माल हस्तगत करण्यात आला आहे. गणेशोत्सवानंतर पुढेही अनेक सणांची रेलचेल असणार आहे. त्यामुळे सणांच्या पार्श्वभूमीवर ही कारवाई करण्यात येत असल्याची माहिती एफडीएकडून देण्यात आली आहे.