The One Movie : ४०० वर्षांचं गूढ अन् जंगलातील रहस्य; सिद्धार्थ-तमन्नाच्या ‘द वन’चा ट्रेलर प्रदर्शित

मुंबई : अभिनेता सिद्धार्थ मल्होत्रा आणि तमन्ना भाटिया यांच्या आगामी ‘द वन: फोर्स ऑफ द फॉरेस्ट’ या बहुप्रतीक्षित चित्रपटाचा ट्रेलर प्रदर्शित झाला आहे. भारतीय लोककथा, फँटसी आणि सुपरनॅचरल थ्रिलरचा मिलाफ असलेल्या या चित्रपटामुळे प्रदर्शनापूर्वीच उत्सुकता निर्माण झाली आहे. चित्रपटाचे दिग्दर्शन दीपक कुमार मिश्रा यांनी केले असून, सिद्धार्थ आणि तमन्नासोबत सुनील ग्रोवर, मनीष पॉल यांच्यासह अन्य कलाकार महत्त्वाच्या भूमिकेत आहेत. (The One Movie)

वनदेवीच्या मंदिराभोवती फिरणार कथा

चित्रपटाची कथा बिहारमधील पटण्याजवळ असलेल्या प्राचीन वनदेवी मंदिराशी संबंधित लोककथेपासून प्रेरित असल्याचे समोर आले आहे. जवळपास ४०० वर्षे जुन्या मंदिराशी आणि त्याभोवतालच्या जंगलाशी जोडलेल्या रहस्यमय कथांचा आधार चित्रपटाच्या कथानकाला मिळाला आहे. (The One Movie)

ट्रेलरमध्ये जंगल, स्थानिक श्रद्धा, गूढ घटना आणि अलौकिक शक्तींची झलक पाहायला मिळते. सिद्धार्थ मल्होत्राचे पात्र स्थानिकांच्या जंगलाबाबतच्या इशाऱ्यांकडे दुर्लक्ष करून या रहस्यमय विश्वात प्रवेश करते. त्यानंतर घडणाऱ्या घटनांमुळे कथा अधिक गूढ आणि थरारक होत जाते. (The One Movie)

तमन्ना साकारणार सिद्धार्थच्या पत्नीची भूमिका

चित्रपटात तमन्ना भाटिया सिद्धार्थच्या पत्नीच्या भूमिकेत दिसणार आहे. कथानकात त्यांच्या नात्यासोबतच जंगलाशी आणि तेथील प्राचीन रहस्यांशी संबंधित घटनांना महत्त्वाचे स्थान असल्याचे ट्रेलरवरून दिसते.

चित्रपटात पुनर्जन्म, प्राचीन श्रद्धा आणि अलौकिक शक्तींशी संबंधित संकेतही पाहायला मिळतात. त्यामुळे हा केवळ हॉररपट न राहता भारतीय लोककथा आणि फँटसीचा वेगळा अनुभव देण्याचा प्रयत्न असल्याचे दिसते. (The One Movie)

चित्रपटात छठ पूजेलाही महत्त्व

‘द वन’मध्ये बिहारच्या संस्कृतीचा महत्त्वाचा भाग असलेल्या छठ पूजेचा कथानकाशी संबंध जोडण्यात आला आहे. अलीकडे चित्रपटातील ‘छठी मैया’ हे गाणेही प्रदर्शित झाले असून, त्यात तमन्ना पारंपरिक रूपात छठ पूजेच्या विधींमध्ये सहभागी होताना दिसते. निर्मात्यांनी छठ पूजेला केवळ पार्श्वभूमी न ठेवता कथेशी जोडण्याचा प्रयत्न केला आहे. (The One Movie)

२५ सप्टेंबरला चित्रपटगृहात

बालाजी मोशन पिक्चर्स आणि TVF मोशन पिक्चर्सच्या निर्मितीतील ‘द वन: फोर्स ऑफ द फॉरेस्ट’ हा चित्रपट २५ सप्टेंबर २०२६ रोजी देशभरातील चित्रपटगृहांमध्ये प्रदर्शित होणार आहे. भारतीय लोककथा, फँटसी, साहस, रहस्य आणि अलौकिक घटकांचा संगम असलेल्या या चित्रपटाकडून प्रेक्षकांना वेगळ्या प्रकारच्या सिनेमॅटिक अनुभवाची अपेक्षा आहे. (The One Movie)