London : लंडनमधील सर्वात उंच इमारत असलेल्या ‘द शार्ड’ (The Shard) च्या बाहेर तमिळनाडूचे मुख्यमंत्री सी. जोसेफ विजय यांची एक झलक पाहण्यासाठी शेकडो चाहते एकत्र आले होते. मात्र, सुरक्षेच्या कारणास्तव लंडनच्या मेट्रोपॉलिटन पोलिसांच्या हस्तक्षेपानंतर हा नियोजित कार्यक्रम रद्द करण्यात आला.(Thalapathy Vijay)
कार्यक्रमात पोलिसांचा हस्तक्षेप आणि चाहत्यांचा हिरमोड
कार्यक्रमात मोठी गर्दी जमल्यामुळे सुरक्षेचा प्रश्न निर्माण झाला. शेवटी पोलिसांच्या सूचनेनुसार मुख्यमंत्र्यांच्या टीममधील एका सदस्याने लाउडस्पीकरवरून घोषणा करत सांगितले की, "लोकांच्या सुरक्षेचा विचार करून आम्ही हा कार्यक्रम रद्द करत आहोत, कारण सुरक्षेच्या कारणास्तव आम्हाला त्यासाठी परवानगी मिळालेली नाही." या निर्णयामुळे अनेक चाहते निराश झाले, ज्यापैकी काही जण तासनतास रांगेत उभे होते. अभिनेत्यातून राजकारणी बनलेल्या विजय यांच्या भेटीची वाट पाहत असलेल्या एका तरुण चाहत्याने सांगितले की, "सुरक्षेच्या दृष्टीने हा निर्णय योग्य असला, तरी अनेक जण तासनतास वाट पाहत होते. तमिळनाडूतील गर्दीसारखी ही गर्दी नसली तरी, मुख्यमंत्री विजय येथे राज्यासाठी गुंतवणूक आकर्षित करण्यासाठी आले आहेत."(London Vijay event cancelled)
दौऱ्यात १२,३०० कोटी रुपयांची मोठी गुंतवणूक
मुख्यमंत्री कार्यालयाने दिलेल्या माहितीनुसार, या यूके दौऱ्यादरम्यान मुख्यमंत्र्यांच्या शिष्टमंडळाने अनेक महत्त्वाच्या सामंजस्य करारांवर (MoUs) स्वाक्षऱ्या केल्या आहेत. याद्वारे तमिळनाडूमध्ये सुमारे १२,३०० कोटी रुपयांची प्रस्तावित गुंतवणूक येणार आहे. या ऐतिहासिक करारांमुळे तमिळनाडूला आशियातील एक प्रमुख प्रगत उत्पादन (Manufacturing) आणि तंत्रज्ञान केंद्र बनवण्याच्या प्रयत्नांना मोठे बळ मिळणार आहे. तसेच, याद्वारे ९,४०० हून अधिक उच्च-मूल्य रोजगार संधी निर्माण होऊ शकतात, अशी माहिती अधिकाऱ्यांनी दिली आहे. आपला यूके दौरा यशस्वीरित्या पूर्ण करून मुख्यमंत्री विजय बुधवारी भारतात परतणे अपेक्षित आहे.(Thalapathy Vijay)
