Simhastha Kumbh Mela : सिंहस्थ कुंभमेळ्याच्या निमित्ताने नाशिकच्या ब्रँडिंगसाठी व्यापक आराखडा तयार करा; ब्रिजेश सिंह यांचे निर्देश

डिजिटल, सोशल मीडिया आणि आंतरराष्ट्रीय माध्यमांच्या माध्यमातून नाशिक-त्र्यंबकेश्वरची ओळख जागतिक स्तरावर पोहोचवण्यावर भर

नाशिक : पुढील वर्षी नाशिक-त्र्यंबकेश्वर येथे होणाऱ्या सिंहस्थ कुंभमेळ्याच्या माध्यमातून नाशिकची धार्मिक, सांस्कृतिक आणि पर्यटनविषयक ओळख देशासह जागतिक पातळीवर पोहोचवण्यासाठी व्यापक माध्यम आराखडा तयार करावा, असे निर्देश माहिती व जनसंपर्क महासंचालनालयाचे प्रधान सचिव तथा महासंचालक ब्रिजेश सिंह यांनी दिले. (Simhastha Kumbh Mela)

नाशिक-त्र्यंबकेश्वर कुंभमेळा प्राधिकरणाच्या सभागृहात माध्यम आराखड्यासंदर्भात आयोजित आढावा बैठकीत ते बोलत होते. यावेळी पोलीस आयुक्त डॉ. संदीप कर्णिक, कुंभमेळा प्राधिकरणाचे आयुक्त शेखर सिंह, माहिती व जनसंपर्क विभागाचे संचालक डॉ. किशोर गांगुर्डे यांच्यासह विविध विभागांचे वरिष्ठ अधिकारी उपस्थित होते. (Simhastha Kumbh Mela)

डिजिटल माध्यमांसह सोशल मीडिया मोहिमेवर भर

नाशिक-त्र्यंबकेश्वर येथे १२ वर्षांनंतर कुंभमेळा होत असल्याने त्याचे प्रभावी जागतिक ब्रँडिंग करण्यासाठी पारंपरिक माध्यमांसोबतच डिजिटल, सोशल मीडिया आणि दृक्-श्राव्य माध्यमांचा समन्वयित वापर करावा, अशी सूचना ब्रिजेश सिंह यांनी केली.

कुंभमेळ्याची धार्मिक परंपरा, ऐतिहासिक व सांस्कृतिक वारसा, गोदावरी नदी आणि प्रमुख तीर्थस्थळांची माहिती देश-विदेशातील भाविक व पर्यटकांपर्यंत पोहोचवण्यासाठी नियोजनबद्ध प्रचारमोहीम राबवावी, असे त्यांनी सांगितले. (Simhastha Kumbh Mela)

नाशिकची स्वतंत्र पर्यटन ओळख निर्माण करण्यावर भर

कुंभमेळ्याच्या निमित्ताने नाशिक-त्र्यंबकेश्वरची स्वतंत्र पर्यटन ओळख निर्माण करण्यासाठी अध्यात्मिक स्थळे, स्थानिक कला-संस्कृती, खाद्यपरंपरा, वारसा स्थळे आणि पर्यटनस्थळांचे प्रभावी सादरीकरण करावे. विविध माध्यमांसाठी स्वतंत्र आशय तयार करून सोशल मीडिया मोहिमेचे सूक्ष्म नियोजन करण्याच्या सूचनाही त्यांनी दिल्या. (Simhastha Kumbh Mela)

कुंभमेळ्याच्या पार्श्वभूमीवर जिल्ह्यात सुरू असलेल्या दीर्घकालीन पायाभूत सुविधांच्या विकासकामांची माहितीही नागरिकांपर्यंत पोहोचवावी. तसेच चुकीची माहिती आणि अफवांचे तातडीने खंडन करण्यासाठी प्रभावी यंत्रणा कार्यान्वित ठेवावी, असे सिंह यांनी स्पष्ट केले. (Simhastha Kumbh Mela)

कुंभमेळा आयुक्त शेखर सिंह यांनी प्राधिकरणामार्फत सुरू असलेल्या विविध विकासकामांची माहिती दिली. बैठकीनंतर ब्रिजेश सिंह यांनी रामकुंड परिसराची पाहणी करून भाविकांसाठीच्या सुविधा, प्रमुख स्थळांचे माध्यमीय सादरीकरण आणि प्रसिद्धीच्या दृष्टीने आवश्यक बाबींचा आढावा घेतला. (Simhastha Kumbh Mela)