मूर्तिकार आशिष पाटकर यांनी साकारलेला 'न्यू जर्सीचा राजा' अमेरिकेत विराजमान
मुंबई : सागरी सफरीचा महिनाभराचा टप्पा पार करत मुंबईहून अमेरिकेत पोहोचलेल्या 'न्यू जर्सीच्या राजा'ची नुकतीच अत्यंत दिमाखात आणि विधिवत प्राणप्रतिष्ठापना करण्यात आली. गावदेवी येथील नामांकित मूर्तिकार आशिष पाटकर यांनी घडवलेली ही १४ फूट उंच, देखणी आणि अनोखी गणेशमूर्ती सध्या न्यू जर्सीतील भाविकांच्या आकर्षणाचा केंद्रबिंदू ठरली आहे.
फोल्डेबल फायबर मूर्तीचे तंत्रज्ञान
परदेशात गणेशमूर्ती सुरक्षित पोहोचवणे हे मोठे आव्हान असते. यावर मात करत मूर्तिकार आशिष पाटकर यांनी अत्यंत कल्पकतेने ही मूर्ती पूर्णपणे फोल्डेबल स्वरूपात तयार केली आहे. मूर्तीचा पोटाखालील भाग, पोटावरील भाग आणि उर्वरित रचना अशा तीन स्वतंत्र भागांत ही मूर्ती फायबरपासून घडवण्यात आली आहे. लोखंडी अँगलचा भक्कम गाभा तयार करून 'मेल-फिमेल' जोडणी पद्धतीने हे तिन्ही भाग एकत्र जोडले जातात, ज्यामुळे १४ फूट उंच मूर्ती अगदी सहजरीत्या उभी राहते. ही मूर्ती साकारण्यासाठी पाटकर यांना सुमारे दोन महिने लागले. प्रथम मातीतून मुख्य रचना तयार करून तिचा साचा बनवण्यात आला. त्यानंतर फायबरमध्ये भाग ढालून अत्यंत बारकाईने फिनिशिंग, पॉलिशिंग आणि पेंटिंगचे काम पूर्ण करण्यात आले.
अमेरिकेत ९ वर्षांची परंपरा
तीन पिढ्यांचा समृद्ध वारसा
गेल्या २५ वर्षांपासून मूर्तिकलेच्या क्षेत्रात कार्यरत असणाऱ्या पाटकर कुटुंबाला या कलेचा मोठा वारसा लाभला आहे. "हा आमचा पिढीजात व्यवसाय आहे. मुंबईतील प्रसिद्ध 'जीएसबी'चा (GSB) महागणपती मी आणि माझे बंधू अविनाश पाटकर गेल्या तीन पिढ्यांपासून पारंपरिक पद्धतीने शाडू मातीपासून स्वतः घडवतो," अशी माहिती आशिष पाटकर यांनी आवर्जून दिली.
पिरियन भाईंचा पुढाकार आणि उत्सवाचा उत्साह
न्यू जर्सीत मूर्ती कार्गो जहाजाद्वारे दाखल झाल्यानंतर तेथील स्थानिक पारसी नागरिक 'पिरियन भाई' अत्यंत आत्मीयतेने पुढाकार घेतात. पुरोहितांच्या हस्ते रीतसर पूजा-अर्चा करून एका मोठ्या सभागृहात या गणरायाची स्थापना केली जाते. यानंतर अमेरिकेतील सर्व हिंदू बांधव एकत्र येऊन मोठ्या भक्तिभावाने आणि उत्साहात गणेशोत्सव साजरा करतात. सध्या 'न्यू जर्सीच्या राजा'च्या दर्शनासाठी तेथील सभागृहात भाविकांची प्रचंड गर्दी होत आहे.
