मुंबई : मुंबईतील जगप्रसिद्ध 'लालबागचा राजा'च्या (Lalbuagcha Raja 2026) दरबारात गणेशोत्सवाच्या काळात देशभरातून व्हीआयपी आणि भाविकांचा ओघ सुरूच आहे. शुक्रवारी सकाळी भारताचे उपराष्ट्रपती सी. पी. राधाकृष्णन यांनी लालबागच्या राजाच्या मंडपात हजेरी लावून बाप्पाचे भक्तिभावाने दर्शन घेतले. यावेळी लालबागचा राजा सार्वजनिक गणेशोत्सव मंडळाचे सरचिटणीस सुधीर साळवी, अध्यक्ष बाळासाहेब कांबळे आणि इतर प्रमुख पदाधिकाऱ्यांनी उपराष्ट्रपतींचे पारंपरिक पद्धतीने स्वागत केले.
'लालबागचा राजा हा मुंबईच्या सांस्कृतिक वारशाचे प्रतीक' : उपराष्ट्रपती
Had the divine darshan of Lalbaugcha Raja and offered prayers to Ganpati ji in Mumbai today.
Lalbaugcha Raja stands as a cherished symbol of Mumbai’s vibrant cultural heritage, deep devotion and strong sense of community. Prayed to Vighnaharta for the well-being, peace and… pic.twitter.com/JazkZf5uzU
— Vice-President of India (@VPIndia) September 18, 2026
दर्शन घेतल्यानंतर उपराष्ट्रपतींच्या अधिकृत सोशल मीडिया अकाऊंटवरून (X - पूर्वीचे ट्विटर) या भेटीचे सुंदर फोटो पोस्ट करण्यात आले. उपराष्ट्रपतींनी आपल्या संदेशात लिहिले की, "लालबागचा राजा हा केवळ गणेशोत्सव नाही, तर तो मुंबईचा महान सांस्कृतिक वारसा, भाविकांची अढळ श्रद्धा आणि सामाजिक एकतेचे जिवंत प्रतीक आहे." यावेळी त्यांनी संपूर्ण देशात शांतता, आरोग्य आणि समृद्धी लाभावी यासाठी विघ्नहर्त्या गणरायाच्या चरणी नतमस्तक होऊन प्रार्थना केली.
उपराष्ट्रपतींचा एकदिवसीय महाराष्ट्र दौरा
केंद्रीय मंत्री पीयूष गोयल यांच्यासह दिग्गजांची हजेरी
गणेशोत्सवाच्या या पवित्र काळात लालबागच्या राजाच्या दर्शनासाठी राजकीय, सामाजिक आणि मनोरंजन क्षेत्रातील अनेक बड्या हस्ती हजेरी लावत आहेत. शुक्रवारी सकाळी उपराष्ट्रपतींच्या आगमनापूर्वी केंद्रीय मंत्री पीयूष गोयल यांनी आपल्या कुटुंबासह राजाच्या चरणी माथा टेकवला. याआधी केंद्रीय गृहमंत्री अमित शाह, महाराष्ट्राचे मुख्यमंत्री देवेंद्र फडणवीस, माजी मुख्यमंत्री उद्धव ठाकरे तसेच भारतातील अमेरिकेचे राजदूत सर्जिओ गोर यांनीही लालबागच्या राजाचे दर्शन घेतले आहे.
९३ व्या वर्षात पदार्पण; भाविकांचा अलोट उत्साह
यंदा लालबागच्या राजा गणेशोत्सवाचे ९३ वे वर्ष आहे. १४ सप्टेंबरपासून सुरू झालेल्या या उत्सवात दररोज लाखो भाविक तासंतास रांगेत उभे राहून बाप्पाच्या दर्शनाचा आनंद घेत आहेत. या १० दिवसांच्या सोहळ्याची सांगता २५ सप्टेंबर रोजी अनंत चतुर्दशीच्या दिवशी होणाऱ्या भव्य आणि नयनरम्य विसर्जन मिरवणुकीने होणार आहे.