Nashik Manisha Jejurkar Case : प्रसिद्ध आयुर्वेदतज्ज्ञ डॉ. मनीषा जेजुरकर यांच्या मृत्यू प्रकरणाला आता महत्त्वाचे वळण मिळाले आहे. पत्नीला आत्महत्येस प्रवृत्त केल्याच्या आरोपाखाली गुन्हा दाखल असलेले त्यांचे पती आणि नाशिक जिल्हा शासकीय रुग्णालयातील (Nashik District Government Hospital) मानसोपचार तज्ज्ञ डॉ. नीलेश दत्तात्रय जेजुरकर यांना शहर गुन्हे शाखेच्या युनिट क्रमांक 1 ने शुक्रवारी ताब्यात घेतले आहे. द्वारका सर्कल परिसरातून पोलिसांनी ही कारवाई केली.
6 मार्चला डॉ. मनीषा यांचा मृत्यू
डॉ. मनीषा जेजुरकर (वय 40) यांचा 6 मार्च 2026 रोजी गंगापूर रोडवरील डी. के. नगर परिसरातील रेवती ब्ल्यू अपार्टमेंटमधील राहत्या घरी मृत्यू झाला होता. सुरुवातीला पोलिसांनी या घटनेची आकस्मिक मृत्यू म्हणून नोंद केली होती. त्यानंतर डॉ. मनीषा यांच्या बहिणीने दिलेल्या तक्रारीनंतर डॉ. नीलेश जेजुरकर यांच्याविरोधात गंगापूर पोलिस ठाण्यात आत्महत्येस प्रवृत्त केल्याचा गुन्हा दाखल करण्यात आला.
अटकपूर्व जामिनासाठी न्यायालयीन लढाई
गुन्हा दाखल झाल्यानंतर डॉ. नीलेश जेजुरकर यांनी अटकपूर्व जामिनासाठी न्यायालयात धाव घेतली. नाशिक जिल्हा व सत्र न्यायालयानंतर (Nashik District and Sessions Court) त्यांनी मुंबई उच्च न्यायालयातही अर्ज केला. मात्र, तेथेही त्यांना दिलासा मिळाला नाही. यानंतर त्यांनी सर्वोच्च न्यायालयात अटकपूर्व जामिनासाठी अर्ज केला. 17 सप्टेंबर रोजी सर्वोच्च न्यायालयानेही त्यांचा अटकपूर्व जामीन अर्ज फेटाळल्याची माहिती आहे.
मुंबई : गणेशोत्सवाच्या उत्साहात मुंबईतील लालबागच्या राजाच्या दर्शनासाठी देशभरातून भाविक येत आहेत. मात्र, बाप्पाच्या दर्शनासाठी जळगावहून मुंबईत ...
पोलिसांसमोर शरण न आल्याने ताब्यात
सर्वोच्च न्यायालयाच्या आदेशानंतरही डॉ. नीलेश जेजुरकर पोलिसांसमोर शरण आले नसल्याचे समोर आले. त्यानंतर शहर गुन्हे शाखेच्या युनिट क्रमांक 1 ने त्यांचा शोध सुरू केला. अखेर शुक्रवारी द्वारका सर्कल परिसरातून पोलिसांनी त्यांना ताब्यात घेतले. सध्या त्यांच्याकडे चौकशी सुरू असून, पुढील कायदेशीर प्रक्रिया पूर्ण केल्यानंतर त्यांना न्यायालयात हजर केले जाणार असल्याची माहिती आहे.
कुटुंबीयांनी केले होते गंभीर आरोप
डॉ. मनीषा यांच्या कुटुंबीयांनी दिलेल्या तक्रारीनुसार, डॉ. नीलेश हे 2021 पासून पत्नीच्या भावना आणि गरजांकडे दुर्लक्ष करत असल्याचा आरोप आहे. तसेच कौटुंबिक निर्णय घेताना ते अन्य एका महिला डॉक्टरचा सल्ला घेत असल्याचेही तक्रारीत नमूद करण्यात आले होते. या कारणांमुळे पती-पत्नीमध्ये वाद आणि विसंवाद वाढला असून, मनीषा यांना मानसिक त्रास सहन करावा लागल्याचा आरोप कुटुंबीयांनी केला आहे. जानेवारी 2026 मध्ये संबंधित महिला डॉक्टरने मनीषा यांना फोन करून अपमानास्पद वक्तव्य केल्याचा आरोपही फिर्यादी पक्षाकडून न्यायालयात करण्यात आला होता. हे सर्व आरोप असून, त्यांची सत्यता तपासातून आणि पुढील न्यायालयीन प्रक्रियेत स्पष्ट होणार आहे.
आता तपासात कोणते प्रश्न समोर येणार?
डॉ. नीलेश जेजुरकर पोलिसांच्या ताब्यात आल्याने या प्रकरणातील तपासाला महत्त्वाची दिशा मिळण्याची शक्यता आहे. घटनेपूर्वी पती-पत्नीमध्ये नेमका काय वाद झाला होता, मृत्यूच्या वेळी घरातील परिस्थिती काय होती आणि उपलब्ध इलेक्ट्रॉनिक व वैद्यकीय पुराव्यांतून काय समोर येते, याचा तपास पोलिसांकडून केला जाणार आहे. आता या प्रकरणातील पुढील पोलिस तपास आणि न्यायालयीन कार्यवाहीकडे लक्ष लागले आहे.
