ग्रेटर नोएडा : दिल्लीहून उत्तर प्रदेशातील (Uttar Pradesh) महोबाकडे जाणाऱ्या एका खाजगी ट्रॅव्हल्सच्या बसला यमुना एक्सप्रेसवेवर (Yamuna Expressway) भीषण आग लागल्याची काळीज पिळवटून टाकणारी घटना घडली आहे. या दुर्दैवी अपघातात एका महिलेसह एकूण ९ प्रवाशांचा जागीच जळून मृत्यू झाला. ही आग लागण्यापूर्वी बसमधून जळण्याचा वास येत असतानाही चालक आणि वाहकाने प्रवाशांच्या सांगण्याकडे दुर्लक्ष केले. "तुम्हाला मरायचं असेल तर मरा, आम्ही गाडी थांबवणार नाही," असा बेजबाबदार आणि उद्दाम सल्ला प्रवाशांना देऊन चालकाने बस पळवत ठेवल्याचे एफआयआर (FIR) मध्ये समोर आले आहे.
नेमकं काय घडलं ?
बुधवारी उशिरा रात्री ११ वाजेच्या सुमारास बिहार पासिंगची एक स्लीपर बस सुमारे ३५ प्रवाशांना घेऊन दिल्लीहून निघून यमुना एक्सप्रेसवेवरून जात होती. ग्रेटर नोएडामधील जेवर हद्दीत असलेल्या दयानातपूर गावाजवळ बस आली असता, प्रवाशांना अचानक काहीतरी जळत असल्याचा तीव्र वास आला. प्रवाशांनी घाबरून तत्काळ चालकाला गाडी बाजूला घेण्याची आणि तपासण्याची विनंती केली. मात्र, प्रवाशांचे प्राण धोक्यात असतानाही चालक आणि वाहकाने त्यांच्याकडे साफ दुर्लक्ष केले आणि उद्दामपणे उत्तर देत गाडी सुसाट धावत ठेवली.
एसीच्या स्फोटाने काही सेकंदांतच बसचा भडका
ग्रेटर नोएडा पोलिसांनी दिलेल्या माहितीनुसार, प्रवाशांच्या इशाऱ्यानंतर काही अंतरावरच बसच्या एसी (AC) यंत्रणेत अचानक ठिणगी पडली अन् जोरदार स्फोट झाला. या स्फोटामुळे इंजिनमधील ल्युब्रिकेटिंग ऑइलने (तेल) लगेच पेट घेतला. पाहता पाहता आगीच्या ज्वालांनी संपूर्ण बसला आपल्या कचाट्यात घेतले. आगीचा भडका इतका वेगवान होता की, आतील प्रवाशांना बाहेर पडण्याची कोणतीही संधी मिळाली नाही.
चालक-वाहक पसार, ९ जणांचा दुर्दैवी अंत
गाडीला आग लागल्याचे समजताच चालक आणि वाहकाने प्रवाशांना वाऱ्यावर सोडत घटनास्थळावरून पोबारा केला. पोलिसांनी दिलेल्या माहितीनुसार, बसमध्ये ३५ प्रवासी प्रवास करत होते. आगीची तीव्रता जास्त असल्याने ९ जणांना बाहेर पडता आले नाही आणि त्यांचा गाडीतच होरपळून दुर्दैवी मृत्यू झाला. घटनेची माहिती मिळताच जेवर पोलीस ठाण्याचे वरिष्ठ पोलीस निरीक्षक (SHO) अजय कुमार सिंह यांच्या पथकाने घटनास्थळी धाव घेतली. सध्या फरार झालेल्या बेजबाबदार चालक आणि वाहकाचा शोध घेण्यासाठी पोलिसांची पथके रवाना करण्यात आली असून त्यांच्यावर कडक कारवाई केली जाणार आहे.