Nirma University Viral Video : 'जल्दी बोल, कल सुबह पनवेल निकलना है'; विद्यार्थ्याच्या वक्तव्यावर प्राध्यापक संतापले, स्टेजवर कॉलर पकडून...

अहमदाबाद : अहमदाबादमधील निरमा विद्यापीठात आयोजित करण्यात आलेल्या स्टँड-अप कॉमेडी शोदरम्यान घडलेल्या एका प्रकाराचा व्हिडिओ सोशल मीडियावर चर्चेत आला आहे. 'टेक्नोफोरा 2026' या वार्षिक तांत्रिक महोत्सवाचा हा कार्यक्रम होता. इलेक्ट्रॉनिक्स आणि इन्स्ट्रुमेंटेशन इंजिनिअरिंग विभागाकडून या कार्यक्रमाचे आयोजन करण्यात आले होते. कॉमेडियन रजत सूद यांच्या सादरीकरणादरम्यान एका विद्यार्थ्याच्या वक्तव्यामुळे हा प्रकार घडल्याचे सांगितले जात आहे. (Nirma University Viral Video) व्हायरल व्हिडिओशी संबंधित वृत्तांनुसार, विभागप्रमुख असल्याचे सांगितले जाणारे एक प्राध्यापक विद्यार्थ्यांशी संवाद साधत असताना प्रेक्षकांमधील एका विद्यार्थ्याने 'गोलमाल' चित्रपटातील प्रसिद्ध संवादाचा संदर्भ देत जल्दी बोल, कल सुबह पनवेल निकलना है असे म्हटले. त्यावर प्राध्यापकांनी विद्यार्थ्याला उत्तर दिले. यानंतर प्राध्यापकांनी त्या विद्यार्थ्याला मंचावर बोलावले. व्हिडिओमध्ये प्राध्यापक विद्यार्थ्याला जाब विचारताना आणि त्याला ताकीद देताना दिसत आहेत. काही वृत्तांमध्ये प्राध्यापकांनी विद्यार्थ्याची कॉलर पकडल्याचा दावाही करण्यात आला आहे. तसेच, विद्यापीठातील कोणत्याही प्राध्यापकाचा अपमान सहन केला जाणार नाही, अशा आशयाचे वक्तव्य त्यांनी केल्याचे व्हिडिओमध्ये ऐकू येत असल्याचे सांगितले जात आहे.

Nirma University professor snatched students collar and threatened a student on a mere light joke in front of the whole event and even the comedian Rajat Sood.#ahmedabad pic.twitter.com/uEZ0iqJtOb

— Manan Trivedi (@itsurbunny7) September 24, 2026

या घटनेनंतर विद्यार्थी संघटनेने प्रकरणाची चौकशी करण्याची मागणी केली आहे. काँग्रेसशी संबंधित नॅशनल स्टुडंट्स युनियन ऑफ इंडिया (NSUI) कडून प्राध्यापकांनी विद्यार्थ्याची माफी मागावी आणि विद्यापीठाने या घटनेची निष्पक्ष चौकशी करावी, अशी मागणी करण्यात आली आहे. NSUI चे राज्य उपाध्यक्ष वेदांत तोमर यांनीही याबाबत प्रतिक्रिया दिल्याचे 'टाइम्स ऑफ इंडिया'ने वृत्त दिले आहे. दरम्यान, सोशल मीडियावर या घटनेवर वेगवेगळ्या प्रतिक्रिया उमटत आहेत. काही जणांनी विद्यार्थ्याने कार्यक्रमादरम्यान शिस्त पाळणे आवश्यक असल्याचे म्हटले आहे. तर काही जणांनी प्राध्यापकांनी विद्यार्थ्याशी अशा पद्धतीने वागणे योग्य आहे का, याबाबत प्रश्न उपस्थित केले आहेत. या प्रकरणी विद्यापीठाकडून अधिकृतपणे काय भूमिका घेतली जाते, याकडे आता लक्ष लागले आहे.   ..