Dhule Crime : रेती वाहतुकीस परवानगी देण्याच्या मोबदल्यात २० हजार रुपयांची लाच स्वीकारताना तलाठ्यासह दोन खासगी इसमांना लाचलुचपत प्रतिबंधक विभागाने (ACB) रंगेहात पकडले. मंगळवारी धुळे शहरातील गांधी पुतळा परिसरात ही कारवाई करण्यात आली. या प्रकरणी आझादनगर पोलीस ठाण्यात भ्रष्टाचार प्रतिबंधक अधिनियमांतर्गत गुन्हा दाखल करण्याची प्रक्रिया सुरू आहे.
तलाठ्यासह दोन खासगी इसम ताब्यात
लाचलुचपत प्रतिबंधक विभागाच्या माहितीनुसार, मोहित बाबासाहेब वारे (३९) हे ग्राम महसूल अधिकारी (सजा कुसुंबा) आहेत.त्यांच्याकडे कौठाळ (ता. धुळे ) येथील अतिरिक्त कार्यभार आहे. याशिवाय प्रदीप विश्वास पाटील (रा. कौठाळ, ता. धुळे) आणि स्वप्निल रामकृष्ण देसले (रा. वाडीभोकर रोड, देवपूर, धुळे) या दोन खासगी इसमांनाही ताब्यात घेण्यात आले आहे.
प्रत्येक वाहनासाठी २५ हजारांची मागणी
तक्रारदार बांधकाम साहित्य वाहतुकीचा व्यवसाय करतात. त्यांच्या दोन मालवाहू वाहनांमधून पांझरा नदीपात्रातून रेती वाहतूक करून अमळनेर येथे नेण्यात येत होती.दरम्यान, सुमारे दीड महिन्यापूर्वी प्रदीप पाटील याने तक्रारदाराची भेट घेऊन आपण तलाठी मोहित वारे यांचे काम पाहत असल्याचे सांगितले. रेती वाहतूक सुरू ठेवायची असल्यास तलाठ्यांशी बोलावे लागेल, अन्यथा वाहनांवर कारवाई होऊ शकते, असे सांगून पैशांची मागणी केल्याचा आरोप तक्रारीत करण्यात आला. त्यानंतर २५ सप्टेंबर रोजी मोहाडी फाटा, कौठाळ येथे प्रदीप पाटील याने तक्रारदाराची भेट घेतली. तलाठी मोहित वारे यांचा निरोप असल्याचे सांगत पांझरा नदीपात्रातून रेती वाहतूक करण्यासाठी प्रत्येक वाहनामागे २५ हजार रुपये देण्याची मागणी केल्याचा आरोप आहे.
Nashik : बहुचर्चित शालार्थ आयडी घोटाळ्याचा तपास आता अधिक व्यापक करण्यात आला असून, नाशिक शहर पोलिसांच्या विशेष तपास पथकाने तपासाची व्याप्ती वाढवली आहे. ...
तडजोडीनंतर २० हजार रुपये स्वीकारण्याचे ठरले
या प्रकारानंतर तक्रारदाराने २८ सप्टेंबर रोजी नाशिक येथील लाचलुचपत प्रतिबंधक विभागाकडे तक्रार दाखल केली. एसीबीने तक्रारीची पडताळणी केली असता तलाठी मोहित वारे यांनी २५ हजार रुपयांची मागणी केल्यानंतर तडजोडीतून २० हजार रुपये स्वीकारण्याचे मान्य केल्याचे प्रथमदर्शनी निष्पन्न झाले. तसेच प्रदीप पाटील याने लाचेची मागणी करण्यासाठी मध्यस्थी केल्याचेही तपासात समोर आले.
गांधी पुतळा परिसरात एसीबीचा सापळा
तक्रारीची पडताळणी झाल्यानंतर एसीबीच्या पथकाने सापळा रचला. गांधी पुतळा परिसरात तक्रारदाराकडून तलाठी मोहित वारे यांनी २० हजार रुपयांची लाच स्वीकारली. त्यानंतर ही रक्कम खासगी इसम स्वप्निल देसले याच्याकडे देण्यात आली. देसले याने रक्कम स्वीकारताच दबा धरून बसलेल्या एसीबीच्या पथकाने तलाठी मोहित वारे, प्रदीप पाटील आणि स्वप्निल देसले या तिघांना ताब्यात घेतले.
सुवर्णा हांडोरे यांच्या नेतृत्वाखाली कारवाई
ही कारवाई लाचलुचपत प्रतिबंधक विभाग, नाशिकच्या पोलीस निरीक्षक सुवर्णा हांडोरे यांच्या नेतृत्वाखाली करण्यात आली. पथकात पोलीस हवालदार संदीप हांडगे आणि पोलीस अंमलदार सुरेश चव्हाण यांचा समावेश होता. या कारवाईचे पर्यवेक्षण लाचलुचपत प्रतिबंधक विभाग, नाशिकचे वाचक पोलीस निरीक्षक स्वप्निल राजपूत यांनी केले. प्रकरणाचा पुढील तपास सुरू आहे.