Nashik : नाशिक महापालिकेतील पाच विषय समित्यांच्या बिनविरोध निवडीचा मार्ग मोकळा, विरोधकांकडून एकही अर्ज नाही

Nashik : नाशिक महानगरपालिकेतील पाच महत्त्वाच्या विषय समित्यांच्या सभापती आणि उपसभापतीपदांच्या निवडी बिनविरोध होण्याचा मार्ग मोकळा झाला आहे. मंगळवारी (६ ऑक्टोबर) नामनिर्देशनपत्र दाखल करण्याच्या अंतिम मुदतीपर्यंत विरोधकांकडून एकाही पदासाठी अर्ज दाखल करण्यात आला नाही. त्यामुळे ८ आणि ९ ऑक्टोबर रोजी होणारी निवड प्रक्रिया केवळ औपचारिक ठरणार आहे. सत्ताधारी भाजपने निश्चित केलेल्या सत्तावाटपाच्या फॉर्म्युल्यानुसार पाचपैकी तीन समित्यांची सभापतीपदे भाजपकडे, तर दोन सभापतीपदे मित्रपक्षांना देण्यात आली आहेत.

महिला व बालकल्याण समितीवर भाजपचे वर्चस्व

महिला व बालकल्याण समितीच्या सभापतीपदासाठी भाजपच्या अॅड. कोमल मेहरोलिया यांनी, तर उपसभापतीपदासाठी चित्रा तांदळे यांनी अर्ज दाखल केला आहे. विरोधकांकडून अर्ज नसल्याने या दोन्ही पदांवर भाजपचेच उमेदवार विराजमान होणार हे स्पष्ट झाले आहे. शहर सुधारणा समितीच्या सभापतीपदासाठी राष्ट्रवादी काँग्रेसच्या अजित पवार गटाच्या जागृती गांगुर्डे यांनी अर्ज दाखल केला आहे. तर उपसभापतीपदासाठी भाजपचे जयंत जाचक रिंगणात आहेत. सत्तावाटपाच्या फॉर्म्युल्यानुसार या समितीचे सभापतीपद मित्रपक्षाला देण्यात आले आहे.

आरोग्य समितीचे सभापतीपद शिवसेनेकडे

वैद्यकीय सहाय्य व आरोग्य समितीच्या सभापतीपदासाठी शिवसेनेच्या डॉ. पूनम महाले यांनी अर्ज दाखल केला आहे. उपसभापतीपदासाठी भाजपचे सतीश निकम यांनी अर्ज केला आहे. त्यामुळे सभापतीपद शिवसेनेकडे , तर उपसभापतीपद भाजपकडे जाणार आहे. विधी समितीच्या सभापतीपदासाठी भाजपच्या जुई शिंदे यांनी, तर उपसभापतीपदासाठी अंकिता शिंदे यांनी अर्ज दाखल केला आहे.शिक्षण समितीच्या सभापतीपदासाठी प्रा. शरद मोरे, तर उपसभापतीपदासाठी सोनाली भंदूरे यांनी अर्ज दाखल केले आहेत. या दोन्ही समित्यांवरही सत्ताधारी गटाचेच उमेदवार निवडून येणार आहेत.

विरोधकांकडून एकही अर्ज नाही

पाचही समित्यांच्या सभापती आणि उपसभापतीपदांसाठी सत्ताधारी गटातील उमेदवारांचेच अर्ज दाखल झाले आहेत. विरोधकांनी एकाही पदासाठी अर्ज न केल्याने प्रत्यक्ष निवडणुकीची शक्यता संपुष्टात आली आहे. त्यामुळे संबंधित समित्यांच्या बैठकीत निवडीची औपचारिक घोषणा केली जाणार आहे.

भाजपकडून मित्रपक्षांना प्रतिनिधित्व

महापालिकेतील संख्याबळाच्या जोरावर भाजपला पाचही समित्यांची सभापतीपदे मिळविणे शक्य असतानाही सत्तेतील मित्रपक्षांना प्रतिनिधित्व देण्यात आले आहे. सत्तावाटपानुसार महिला व बालकल्याण, विधी आणि शिक्षण समित्या भाजपकडे, तर शहर सुधारणा समिती राष्ट्रवादी काँग्रेस अजित पवार गटाकडे आणि वैद्यकीय सहाय्य व आरोग्य समिती शिवसेनेकडे देण्यात आली आहे. उपसभापतीपदांमध्ये मात्र भाजपला अधिक प्रतिनिधित्व मिळाले आहे. त्यामुळे विषय समित्यांच्या वाटपातून सत्ताधारी आघाडीतील समन्वयाचा फॉर्म्युला स्पष्ट झाला आहे.

८ आणि ९ ऑक्टोबरला निवडी

पाचही समित्यांच्या सभापती आणि उपसभापतीपदांची निवड प्रक्रिया ८ आणि ९ ऑक्टोबर रोजी पार पडणार आहे. जिल्हाधिकारी आयुष प्रसाद हे पीठासीन अधिकारी म्हणून काम पाहणार आहेत. ८ ऑक्टोबरला महिला व बालकल्याण आणि शिक्षण समितीच्या निवडी, तर ९ ऑक्टोबरला शहर सुधारणा, विधी तसेच वैद्यकीय सहाय्य व आरोग्य समितीच्या निवडी होणार आहेत. विरोधकांकडून एकही अर्ज दाखल न झाल्याने पाचही समित्यांच्या सभापती आणि उपसभापतीपदांच्या निवडी बिनविरोध होणार हे जवळपास निश्चित झाले आहे.