Nashik Crime : झटपट श्रीमंत होण्याच्या मोहाचा फायदा घेत सायबर भामट्यांनी नाशिक शहरात फसवणुकीचे जाळे पसरवले आहे. शेअर मार्केटमध्ये मोठा परतावा, ऑनलाइन टास्कद्वारे घरबसल्या कमाई आणि व्यवसायात भागीदारी देण्याचे आमिष दाखवून शहरातील नागरिकांना तब्बल १ कोटी ७ लाख ५९ हजार रुपयांचा गंडा घालण्यात आला आहे. या प्रकरणी गंगापूर, नाशिकरोड आणि सायबर पोलीस ठाण्यांत तीन स्वतंत्र गुन्हे दाखल करण्यात आले आहेत.
शेअर मार्केटमध्ये मोठ्या नफ्याचे आमिष भोवले
शेअर बाजारात गुंतवणूक करून अल्पावधीत मोठा नफा मिळवण्याच्या आमिषाने मखमलाबाद नाका परिसरातील नागरिकांची फसवणूक करण्यात आली. संशयितांनी ‘वैल्थ डिस्कशन २३’ या व्हॉट्सॲप व सोशल मीडिया ग्रुपच्या माध्यमातून तसेच विविध मोबाईल क्रमांकांवरून फिर्यादींशी संपर्क साधला. गुंतवणुकीवर भरघोस परतावा मिळत असल्याचे भासवण्यासाठी सुरुवातीला आभासी नफा दाखवण्यात आला. त्यामुळे विश्वास बसलेल्या फिर्यादी आणि त्यांच्या साथीदारांनी टप्प्याटप्प्याने विविध बँक खात्यांमध्ये एकूण ७५ लाख ९ हजार ६६२ रुपये जमा केले. मात्र, गुंतवलेली रक्कम काढण्याचा प्रयत्न केल्यानंतर फसवणूक झाल्याचे त्यांच्या लक्षात आले. या प्रकरणाचा तपास सायबर पोलीस ठाण्याच्या वरिष्ठ पोलीस निरीक्षक सुशिला कोल्हे करीत आहेत.
Nashik : आगामी सिंहस्थ कुंभमेळ्याच्या पार्श्वभूमीवर त्र्यंबकेश्वरमध्ये सुरू असलेली विकासकामे वेगाने पूर्ण करण्यासाठी महत्त्वाचा पर्याय विचाराधीन आहे. ...
पोल्ट्री व्यवसायातील भागीदारीच्या नावाखाली २५ लाखांचा गंडा
ऑनलाइन फसवणुकीबरोबरच व्यवसायात भागीदारी देण्याच्या बहाण्यानेही नागरिकांची आर्थिक फसवणूक होत असल्याचे नाशिकरोड येथील प्रकरणातून समोर आले आहे. सामनगाव रोड परिसरात राहणारे अविनाश विजय खताळ (वय ३०) यांना संशयित गणेश अंबादास बिडगर आणि अंबादास रुंजा बिडगर (दोघेही रा. दरेगाव, ता. चांदवड) यांनी पोल्ट्री व्यवसायात भागीदारी देण्याचे आमिष दाखवले. पोल्ट्री फार्मचे तिसरे शेड उभारून त्यातून मिळणाऱ्या नफ्यातून दरमहा ५० हजार रुपये देण्याचे आश्वासन देण्यात आले. या व्यवहारासाठी नाशिकरोड येथील जुन्या कोर्टाजवळ नोटरी दस्त करून २५ लाख रुपये घेण्यात आले. मात्र, ही रक्कम पोल्ट्री व्यवसायासाठी वापरण्याऐवजी स्वतःचे वैयक्तिक कर्ज फेडण्यासाठी वापरल्याचा आरोप आहे. खताळ यांनी पैसे परत मागितले असता त्यांना जीवे मारण्याची धमकी देण्यात आल्याचे तक्रारीत नमूद आहे. या प्रकरणाचा तपास उपनिरीक्षक माळी करीत आहेत.
टास्क स्कॅममध्ये नागरिकाची फसवणूक
गंगापूर रोड परिसरातील विश्वजीत सुनील काठे (वय ३३) यांना टेलिग्रामवरून ऑनलाइन कमाईची ऑफर देण्यात आली. गुगल मॅपवर हॉटेल आणि रेस्टॉरंटला पाच स्टार रेटिंग देऊन त्याचे स्क्रीनशॉट पाठवायचे आणि घरबसल्या पैसे कमवायचे, असे त्यांना सांगण्यात आले. सुरुवातीला छोट्या रकमेचा नफा दाखवून त्यांचा विश्वास संपादन करण्यात आला. त्यानंतर बँक ऑफ बडोदातील नूर आलम सुभान अली अन्सारी यांच्या खात्यावर ५० हजार रुपये जमा करण्यास सांगण्यात आले. पैसे पाठवल्यानंतर ‘तुमचा बारकोड चुकला असून रिफंड मिळवण्यासाठी आणखी एक लाख रुपये भरावे लागतील,’ असे सांगून अतिरिक्त रकमेची मागणी करण्यात आली. आपली फसवणूक झाल्याचे लक्षात आल्यानंतर काठे यांनी गंगापूर पोलीस ठाण्यात तक्रार दाखल केली.
Nashik Kumbhmela : नाशिक-त्र्यंबकेश्वर येथे पुढील वर्षी होणाऱ्या सिंहस्थ महाकुंभमेळ्याच्या पार्श्वभूमीवर लाखो भाविक, पर्यटक आणि नागरिकांना सुरक्षित व अखंडित ...
नागरिकांनी सतर्क राहण्याचे आवाहन
अल्पावधीत मोठा नफा, घरबसल्या सहज कमाई किंवा व्यवसायातील निश्चित उत्पन्न अशा आमिषांना बळी पडू नये. कोणत्याही अनोळखी व्यक्तीच्या सांगण्यावरून ऑनलाइन पैसे हस्तांतरित करू नयेत. गुंतवणूक करण्यापूर्वी संबंधित संस्था आणि व्यक्तींची खातरजमा करावी. संशयास्पद आर्थिक व्यवहार किंवा ऑनलाइन फसवणूक झाल्यास तातडीने सायबर पोलिसांशी संपर्क साधावा.
महत्त्वाचे : ऑनलाइन आर्थिक फसवणूक झाल्यास भारतातील सायबर क्राइम हेल्पलाइन क्रमांक १९३० वर त्वरित संपर्क साधता येतो. तसेच "राष्ट्रीय सायबर क्राइम पोर्टल" (https://cybercrime.gov.in/) वर तक्रार नोंदवता येते.
