अंकारा: टर्कीच्या उत्तर भागातून एक अत्यंत धक्कादायक आणि मन हेलावून टाकणारी बातमी समोर आली आहे. काळ्या समुद्राच्या किनाऱ्यावरील झोंगुलदाक प्रांतातील किलिमली शहरात असलेल्या एका कोळशाच्या खाणीत शुक्रवारी भीषण स्फोट झाला. या दुर्घटनेत दोन कामगारांचा दुर्दैवी मृत्यू झाला असून, पाच जण गंभीर जखमी झाले आहेत. स्फोटानंतर खाणीत मोठ्या प्रमाणावर धूर पसरला आणि एकच खळबळ उडाली. खाणीमध्ये अद्याप एक कामगार अडकलेला असून, त्याला सुरक्षित बाहेर काढण्यासाठी बचाव पथकांकडून युद्धपातळीवर शर्थीचे प्रयत्न सुरू आहेत.
बचावकार्य सुरू आणि गंभीर जखमींवर उपचार
घटनास्थळी तातडीने वैद्यकीय पथके आणि बचाव कर्मचारी दाखल झाले आहेत. अधिकाऱ्यांनी दिलेल्या माहितीनुसार, स्फोटानंतर खाणीत अडकलेल्या कामगारांपर्यंत ऑक्सिजनचा पुरवठा सुरळीत ठेवणे हे बचाव पथकांसमोरील सर्वात मोठे आव्हान ठरले आहे. जखमी कामगारांना तातडीने नजीकच्या रुग्णालयात दाखल करण्यात आले आहे. झोंगुलदाकचे राज्यपाल उस्मान हासिबेक्तासोग्लू यांनी दिलेल्या माहितीनुसार, जखमींपैकी दोघांची प्रकृती अत्यंत चिंताजनक आहे. एका गंभीर जखमी कामगाराला उपचारांसाठी तातडीने राजधानी अंकारा येथील मोठ्या रुग्णालयात हलवण्यात आले आहे. दरम्यान, या भीषण स्फोटाचे नेमके कारण अद्याप स्पष्ट झालेले नाही.
ताइपे: तैवानमध्ये 'चांपी' चक्रीवादळाने धडक देण्यापूर्वीच हाहाकार माजवला आहे. ताशी 170 किलोमीटर वेगाने वाहणारे विनाशकारी वारे आणि मुसळधार पावसामुळे ...
टर्कीतील खाणी आणि जुन्या भीषण आठवणी
टर्कीमध्ये कोळशाच्या खाणींमध्ये अशा प्रकारच्या दुर्घटना घडण्याची ही पहिलीच वेळ नाही. येथील खाणकाम नेहमीच धोक्याचे मानले जाते. या देशाच्या इतिहासातील सर्वात भीषण खाण दुर्घटना 2014 मध्ये घडली होती. पश्चिम टर्कीतील सोमा शहरातील एका कोळशाच्या खाणीत लागलेल्या भीषण आगीमुळे 301 कामगारांना आपला जीव गमवावा लागला होता. ताज्या घटनेमुळे संपूर्ण टर्कीमध्ये शोककळा पसरली असून खाणींमधील कामगारांच्या सुरक्षेचा प्रश्न पुन्हा एकदा ऐरणीवर आला आहे.
