आपल्या मैत्रिणीसोबत भारतभर प्रवास करणाऱ्या एका लिथुआनियन पर्यटकाने वंदे भारत एक्सप्रेसमधील आपला पहिला अनुभव शेअर केला आहे. काही अनपेक्षित आव्हाने असूनही हा प्रवास मोलाचा होता, असे तिने म्हटले आहे. आपली मैत्रीण क्रिस्टिनसोबत दुसऱ्यांदा भारताला भेट देणारी करिषा सध्या काश्मीर फिरत आहे. या दोघीजणी आपल्या प्रवासाचे अनुभव चित्रित करून त्याचे व्हिडिओ सोशल मीडियावर शेअर करत आहेत. नुकतेच करिषाने वंदे भारत एक्सप्रेसच्या वातानुकूलित डब्यातील तिच्या पहिल्या प्रवासाचे चित्रण करणारे व्हिडिओ पोस्ट केले. तेव्हापासून या क्लिप्सनी ऑनलाईन लक्ष वेधून घेतले असून सोशल मीडिया वापरकर्ते भारतीय रेल्वे प्रवासाचे त्यांचे स्वतःचे अनुभव शेअर करत आहेत.
पहिल्या व्हिडिओमध्ये करिषा रेल्वे प्लॅटफॉर्मवर उभी असलेली दिसत असून, गर्दी पाहून ती थोडी भारावून गेल्यासारखी वाटत आहे. ट्रेनमध्ये चढण्याची आणि सामानासाठी जागा शोधण्याची धावपळ करतानाचा अनुभव सांगताना तिने याची तुलना 'द हंगर गेम्स' या लोकप्रिय चित्रपट मालिकेशी केली. मात्र सुरुवातीला गोंधळ असूनही हा प्रवास एक सुखद अनुभव ठरला, असे ती म्हणाली. ' वंदे भारत एक्सप्रेसच्या फर्स्ट एसी कोचमध्ये १० तास प्रवास केल्यानंतर मी म्हणू शकते की खर्च केलेला प्रत्येक पैसा वसूल झाला,' असे ती पुढे म्हणाली.
रेल्वे प्लॅटफॉर्मवर चित्रित केलेल्या आणखी एका व्हिडिओमध्ये, करिषाने भारतातील वातानुकूलित (AC) ट्रेन आणि विना-वातानुकूलित (non-AC) ट्रेनमधील प्रवासाची तुलना केली. तिच्या मते, तिकीट दरांमधील फरक फारसा मोठा नव्हता, तरीही तिने वातानुकूलित ट्रेनलाच पसंती दिली. ती म्हणाली, "विना-वातानुकूलित ट्रेनचे तिकीट कदाचित वातानुकूलित डब्याच्या तुलनेत केवळ तीन युरोंनी स्वस्त असेल. पण जर मला निवड करायची असेल, तर मी कधीही विना-वातानुकूलित ट्रेनने प्रवास करणार नाही. 'वंदे भारत'मध्ये प्रवास करणे अधिक सुरक्षित वाटले." तिच्या या टिप्पणीमुळे सोशल मीडिया वापरकर्त्यांमध्ये भारतीय रेल्वेमधील सोयीसुविधा, सुरक्षा आणि प्रवासाच्या अनुभवाबाबत चर्चा सुरू झाली आहे.
नाशिक : नाशिकमधील बहुचर्चित म्हाडा घोटाळ्याची चर्चा सुरुच असतानाच, पाथर्डी शिवारात जमिनीचे बेकायदेशीर पोटहिस्से पाडून म्हाडाचे आरक्षित क्षेत्र आणि ...
तिसऱ्या व्हिडिओमध्ये, करिषाने प्रेक्षकांना ट्रेनमधील स्वच्छतागृहाच्या (टॉयलेट) आतील भागाची झलक दाखवली. तिने तिथल्या स्वच्छतेचे कौतुक केले, परंतु तिथे एक प्रकारचा दुर्गंध येत असल्याचेही नमूद केले. ती म्हणाली, "स्वच्छतागृह खूप स्वच्छ होते, तरीही तिथून दुर्गंध येत होता." तिला स्वच्छतागृहाच्या रचनेबद्दलही आश्चर्य वाटले; तिने गमतीत म्हटले की, आरशाखाली असलेला वॉशबेसिन प्रत्यक्ष टॉयलेट सीटपेक्षाही मोठा दिसत होता.
भारतात महिनाभर फिरण्यासाठी सोडल्या नोकऱ्या
क्रिस्टिनाच्या इंस्टाग्राम प्रोफाइलनुसार, या दोन मैत्रिणी १६ ऑक्टोबर रोजी भारतात पोहोचल्या. त्यांनी आपल्या प्रवासाची सुरुवात नवी दिल्लीतून केली, जिथे त्यांनी ऑटो-रिक्षा आणि मेट्रोने प्रवास केला आणि त्यानंतर आग्य्राकडे प्रस्थान केले. आग्रा फिरल्यानंतर, त्यांनी जम्मू-काश्मीरच्या दिशेने आपला प्रवास सुरू ठेवला. करिषाच्या इंस्टाग्राम प्रोफाइलवरून असे समजते की, या मैत्रिणी भारतात सुमारे एक महिना फिरण्याचे नियोजन करत आहेत. त्यांच्या प्रवास आराखड्यात नवी दिल्ली, आग्रा, जयपूर आणि काश्मीरचा समावेश आहे, तसेच त्या केरळलाही भेट देऊ शकतात. मिळालेल्या माहितीनुसार, या दोन महिलांनी देशातील विविध भागांत फिरण्यासाठी आणि हा प्रदीर्घ प्रवास करण्यासाठी आपापल्या नोकऱ्या सोडल्या आहेत.
