ब्राझील : ब्राझीलच्या राष्ट्राध्यक्षपदाच्या निवडणुकीत विद्यमान राष्ट्राध्यक्ष लुईझ इनासिओ लुला दा सिल्वा यांनी ऐतिहासिक विजय मिळवला आहे. अमेरिकेचे राष्ट्राध्यक्ष डोनाल्ड ट्रम्प यांचे निकटवर्तीय मानले जाणारे उजव्या विचारसरणीचे उमेदवार फ्लाव्हियो बोल्सोनारो यांचा पराभव करत लुला यांनी पुन्हा एकदा राष्ट्राध्यक्षपद मिळवले. या विजयामुळे लॅटिन अमेरिकेतील सर्वात मोठी अर्थव्यवस्था असलेल्या ब्राझीलमध्ये डाव्या विचारसरणीचे नेतृत्व कायम राहणार आहे. रॉयटर्सच्या वृत्तानुसार, लुला यांना 51.75 टक्के, तर फ्लाव्हियो बोल्सोनारो यांना 48.25 टक्के मते मिळाली. या विजयामुळे लुला यांना चौथ्यांदा राष्ट्राध्यक्षपद भूषवण्याची संधी मिळाली आहे.
पहिल्या फेरीत पिछाडी, दुसऱ्या फेरीत ऐतिहासिक विजय
ब्राझीलमधील राष्ट्राध्यक्षपदाची निवडणूक अत्यंत चुरशीची ठरली. निवडणुकीच्या पहिल्या फेरीत फ्लाव्हियो बोल्सोनारो यांनी आघाडी घेतली होती. त्यामुळे अंतिम फेरीत त्यांचे पारडे जड मानले जात होते. मात्र, दुसऱ्या फेरीत लुला यांनी मतदारांचा पाठिंबा मिळवत विजय खेचून आणला. या निकालाचे वैशिष्ट्य म्हणजे पहिल्या फेरीत दुसऱ्या क्रमांकावर राहिलेल्या उमेदवाराने अंतिम फेरीत विजय मिळवला. ब्राझीलच्या लोकशाही इतिहासातील हा महत्त्वाचा राजकीय टप्पा मानला जात आहे.
🇧🇷 Lula celebra reeleição ao lado de aliados. https://t.co/Hnt8eiILGE
— Eixo Político (@eixopolitico) October 26, 2026
कोण आहेत फ्लाव्हियो बोल्सोनारो?
फ्लाव्हियो बोल्सोनारो हे ब्राझीलचे माजी राष्ट्राध्यक्ष जैर बोल्सोनारो यांचे पुत्र आणि सिनेटर आहेत. त्यांनी आपल्या प्रचारात अमेरिकेशी अधिक जवळचे संबंध प्रस्थापित करण्यावर भर दिला होता. डोनाल्ड ट्रम्प यांच्या प्रशासनासोबत व्यापारविषयक चांगले करार करण्याचे आश्वासनही त्यांनी दिले होते. गुन्हेगारीवर कठोर कारवाई, महागाईवर नियंत्रण आणि करांचा भार कमी करणे हे त्यांच्या प्रचारातील प्रमुख मुद्दे होते. मात्र, मतदारांनी अखेर लुला यांच्या बाजूने कौल दिला.
तेहरान : अमेरिका आणि इराण यांच्यातील संघर्ष कमी करण्यासाठी राजनैतिक प्रयत्न सुरू असतानाच इराणने अमेरिकेसोबतच्या चर्चेबाबत कठोर भूमिका घेतली आहे. ...
ट्रम्प प्रशासनाशी संबंध ठरला निवडणुकीतील महत्त्वाचा मुद्दा
या निवडणुकीत ब्राझीलचे अमेरिकेशी असलेले संबंध हा महत्त्वाचा विषय ठरला. डोनाल्ड ट्रम्प यांच्या प्रशासनाने ब्राझीलच्या निर्यातीवर लादलेले शुल्क आणि अंमली पदार्थांच्या तस्करीशी संबंधित संघटनांना दहशतवादी संघटना म्हणून घोषित करण्याच्या निर्णयावर लुला यांनी टीका केली होती. दुसरीकडे, फ्लाव्हियो बोल्सोनारो यांनी अमेरिकेशी अधिक जवळीक साधण्याची भूमिका मांडली. त्यामुळे या निवडणुकीकडे केवळ देशांतर्गत सत्तासंघर्ष म्हणून नव्हे, तर लॅटिन अमेरिकेतील राजकीय समीकरणांच्या दृष्टीनेही पाहिले जात होते.
महागाई, बेरोजगारी आणि सुरक्षेचे प्रश्न चर्चेत
निवडणूक प्रचारादरम्यान वाढता जीवनावश्यक खर्च, गुन्हेगारी आणि आर्थिक परिस्थिती हे मुद्दे केंद्रस्थानी होते. फ्लाव्हियो बोल्सोनारो यांनी गुन्हेगारीविरोधात कठोर भूमिका घेण्याचे आणि खाद्यपदार्थांच्या किमती कमी करण्याचे आश्वासन दिले. लुला यांनी गरीब आणि वंचित घटकांसाठीच्या कल्याणकारी योजनांवर भर दिला. गरिबी कमी करण्यासाठी केलेले प्रयत्न आणि सामाजिक सुरक्षेच्या धोरणांमुळे त्यांना पाठिंबा मिळाल्याचे त्यांच्या समर्थकांचे म्हणणे आहे. भ्रष्टाचाराच्या आरोपांवरून दोन्ही राजकीय गटांमध्ये आरोप-प्रत्यारोपही झाले.
UNA NOCHE HISTÓRICA, UN FUTURO MEJOR 🇧🇷❤️
Lula ganó las elecciones, dejando una lección: nunca hay que rendirse. No hay injerencia extranjera ni campaña de odio que puedan derrotar a un pueblo que defiende su soberanía y su dignidad. Felicitaciones Lula. Gracias, Brasil. ¡HAY OTRO CAMINO! — Axel Kicillof (@Kicillofok) October 26, 2026
विजयाचा जल्लोष; ब्राझीलमध्ये समर्थकांचा उत्साह
निकाल स्पष्ट होताच रिओ दि जानेरो आणि साओ पाउलो यांसारख्या शहरांमध्ये लुला समर्थकांनी आनंदोत्सव साजरा केला. बार, सार्वजनिक ठिकाणे आणि विविध परिसरांमध्ये समर्थक एकत्र येऊन विजयाचा जल्लोष करताना दिसले. लुला यांच्या विजयामुळे ब्राझीलमध्ये डाव्या विचारसरणीचे नेतृत्व कायम राहणार आहे. तसेच, अमेरिकेचे राष्ट्राध्यक्ष डोनाल्ड ट्रम्प यांच्या धोरणांशी जवळीक साधू इच्छिणाऱ्या राजकीय गटांना हा निकाल धक्का मानला जात आहे. ब्राझीलच्या पुढील सरकारसमोर अर्थव्यवस्था, महागाई, सार्वजनिक सुरक्षा, पर्यावरण संरक्षण आणि आंतरराष्ट्रीय व्यापारसंबंध यांसारखी आव्हाने असतील. लुला यांच्या नव्या कार्यकाळात या मुद्द्यांवर कोणती धोरणे राबवली जातात, याकडे आता जगाचे लक्ष लागले आहे.
