Nashik Kumbh Mela : 31 ऑक्टोबरला ध्वजारोहण आणि गोदा आरतीसाठी नाशिक पोलिसांचा मूव्हमेंट प्लॅन जाहीर ! बंद राहणारे रस्ते आणि पार्किंगची ठिकाणे जाणून घ्या

1/12 नाशिक : नाशिक-त्र्यंबकेश्वर सिंहस्थ महाकुंभमेळा २०२७ च्या ३१ ऑक्टोबर २०२६, शनिवार रोजी होणाऱ्या ध्वजारोहण कार्यक्रमासाठी नाशिक शहर पोलीस आयुक्तालयाने मूव्हमेंट प्लॅन जाहीर केला आहे. सकाळी ध्वजारोहण आणि सायंकाळी गोदा आरती या दोन्ही कार्यक्रमांसाठी भाविकांची ये-जा, आरती करणाऱ्या ट्रूपचा मार्ग, नागरिकांसाठी बंद राहणारे रस्ते आणि पार्किंगची ठिकाणे या प्लॅनमध्ये निश्चित करण्यात आली आहेत. 2/12 सकाळच्या ध्वजारोहणासाठी गांधी तलाव यशवंत महाराज पटांगण येथे येणाऱ्या भाविकांसाठी पाच पार्किंग मार्ग दिले आहेत. गंगापूर रोड, गुरांचा दवाखाना, सिद्धेश्वर मंदिर मार्गे संभाजी महाराज गार्डन येथे वाहने पार्क करून अहिल्यादेवी होळकर पुलाखालून एकमुखी दत्त घाट मार्गे गांधी तलाव गाठता येईल. अशोक स्तंभ, रविवार कारंजा येथे पार्किंग करून सराफ बाजार, सरकारवाडा पोलीस चौकी, भांडी बाजार, बालाजी मंदिर, निळकंठेश्वर घाट मार्गे गांधी तलावाकडे जाता येईल. छत्रपती शिवाजी महाराज स्टेडियम पार्किंगहून रेडक्रॉस सिग्नल, धुमाळ टी पॉइंट, नेहरू चौक, दिल्ली दरवाजा मार्गे रोकडोबा मैदानाकडे जाण्याचा मार्ग निश्चित केला आहे.