मुंबई : ऑक्टोबर महिना संपताच नोव्हेंबरच्या सुरुवातीलाही महाराष्ट्रातील हवामानात बदल पाहायला मिळत आहे. राज्यातील काही भागांत ढगाळ वातावरणासह अवकाळी पावसाच्या सरी कोसळण्याची शक्यता हवामान विभागाने वर्तवली आहे. विशेषतः विदर्भातील 6 जिल्ह्यांना विजांच्या कडकडाटासह पाऊस आणि वादळी वाऱ्यांचा यलो अलर्ट देण्यात आला आहे. तर कोकणातील बहुतांश भागांत हवामान कोरडे राहण्याचा अंदाज आहे.
विदर्भातील 6 जिल्ह्यांना यलो अलर्ट!
विदर्भात 1 नोव्हेंबर रोजी पावसाची शक्यता अधिक आहे. भंडारा, चंद्रपूर, गडचिरोली, गोंदिया, नागपूर आणि यवतमाळ या 6 जिल्ह्यांमध्ये विजांच्या कडकडाटासह वादळी पाऊस पडण्याचा अंदाज आहे. या भागांत ताशी 30 ते 40 किलोमीटर वेगाने वारे वाहण्याची शक्यता असून, काही ठिकाणी हलक्या ते मध्यम स्वरूपाच्या पावसाच्या सरी कोसळू शकतात. त्यामुळे नागरिकांनी सतर्क राहण्याचे आवाहन करण्यात आले आहे.
कोकणात कुठे पाऊस, कुठे कोरडे हवामान?
मुंबई, ठाणे, पालघर आणि रायगड जिल्ह्यांत हवामान प्रामुख्याने कोरडे राहण्याची शक्यता आहे. मात्र, रत्नागिरी आणि सिंधुदुर्गच्या काही भागांत हलक्या पावसाच्या सरींचा अंदाज आहे. त्यामुळे कोकणातील नागरिकांना सध्या मोठ्या पावसाची शक्यता नाही.
नवी दिल्ली : देशातील पोलीस दल, सुरक्षा यंत्रणा आणि तपास यंत्रणांमधील अधिकारी व कर्मचाऱ्यांच्या उत्कृष्ट कार्याची दखल घेण्यासाठी देण्यात येणाऱ्या ...
पश्चिम महाराष्ट्र आणि उत्तर महाराष्ट्रात कसे असेल हवामान?
पुणे, कोल्हापूर, सातारा आणि सांगली जिल्ह्यांत काही ठिकाणी ढगाळ वातावरणासह हलक्या पावसाची शक्यता आहे. पुणे घाटमाथ्यावरही पावसाच्या सरी कोसळू शकतात. उत्तर महाराष्ट्रातील धुळे, नंदुरबार आणि जळगावमध्ये हवामान कोरडे राहण्याचा अंदाज आहे. नाशिक आणि अहिल्यानगरच्या काही भागांत हलक्या पावसाची शक्यता आहे.
मराठवाड्यातील कोणत्या जिल्ह्यांत पाऊस?
मराठवाड्यात छत्रपती संभाजीनगर, जालना, परभणी, बीड, हिंगोली आणि नांदेडमध्ये प्रामुख्याने कोरडे हवामान राहण्याची शक्यता आहे. तर लातूर आणि धाराशिव जिल्ह्यांत मेघगर्जनेसह हलक्या पावसाच्या सरी पडू शकतात.
एकूणच, नोव्हेंबरच्या सुरुवातीलाच राज्यात हवामानाचे वेगवेगळे रंग पाहायला मिळणार आहेत. विशेषतः विदर्भातील नागरिकांनी वादळी वारे आणि विजांच्या कडकडाटाच्या पार्श्वभूमीवर काळजी घ्यावी. शेतकऱ्यांनीही काढणी केलेल्या पिकांची सुरक्षित ठिकाणी साठवणूक करावी आणि हवामान विभागाच्या ताज्या सूचनांकडे लक्ष द्यावे.