भारताचे शेजारी देश पाकिस्तान आणि बांगलादेशमध्ये सोमवारी सामान्य नागरिकांचा संताप रस्त्यावर उतरल्याचे पाहायला मिळाले. पाकिस्तानमधील कराची येथे वीजकपात आणि गॅस टंचाईविरोधात नागरिकांनी आंदोलन केले. तर बांगलादेशमध्ये कापड उद्योगातील हजारो कामगारांनी किमान मासिक वेतन 30 हजार टका करण्याच्या मागणीसाठी महामार्ग रोखले. आंदोलकांना हटवण्यासाठी पोलिसांनी अश्रुधुराच्या नळकांड्या आणि पाण्याच्या फवाऱ्यांचा वापर केला. वाढती महागाई आणि मूलभूत सुविधांचा अभाव यामुळे दोन्ही देशांमध्ये असंतोष वाढताना दिसत आहे.
कराचीमध्ये वीज आणि गॅस टंचाईविरोधात मोर्चा
पाकिस्तानमधील कराची येथे पाकिस्तान पीपल्स पार्टीच्या नेतृत्वाखाली वीज आणि गॅस टंचाईविरोधात आंदोलन करण्यात आले. ‘डॉन’च्या वृत्तानुसार, ल्यारी गेट येथून सुरू झालेल्या मोर्चाची सांगता कराची प्रेस क्लबबाहेर झाली. या आंदोलनात पक्षाचे नेते, कार्यकर्ते, महिला आणि स्थानिक नागरिक सहभागी झाले होते. आंदोलकांनी के-इलेक्ट्रिक आणि सुई सदर्न गॅस कंपनी विरोधात घोषणाबाजी करत वीज आणि गॅसचा पुरवठा नियमित करण्याची मागणी केली. मोर्चाचे नेतृत्व पीपीपीचे दक्षिण जिल्हाध्यक्ष जावेद नागोरी यांनी केले. खासदार सरदार नबील गाबोल यांनीही आंदोलनात सहभाग घेतला. नबील गाबोल यांनी के-इलेक्ट्रिकच्या कामकाजावर प्रश्न उपस्थित केले. ल्यारीमधील काही भागांत दररोज तब्बल 16 तास वीजकपात होत असल्याचा आरोप जावेद नागोरी यांनी केला.
सना: येमेनमध्ये पुन्हा एकदा संघर्षाचा वणवा भडकला असून लाल समुद्राचा किनारा रक्ताने लाल झाला आहे. हुती बंडखोरांनी दिलेल्या माहितीनुसार, सौदी ...
बांगलादेशमध्ये 30 हजार टका वेतनाची मागणी
बांगलादेशची राजधानी ढाका आणि आसपासच्या औद्योगिक भागांत कापड कामगारांचे आंदोलन तीव्र झाले. कामगार सध्या मिळणाऱ्या किमान वेतनात वाढ करून ते 30 हजार टका करण्याची मागणी करत आहेत. सध्याचे किमान वेतन 12,500 टका असल्याचे वृत्त आहे. महागाईमुळे अन्न, घरभाडे, वाहतूक आणि आरोग्यावरील खर्च वाढल्याने कुटुंबाचा उदरनिर्वाह करणे कठीण झाल्याचे कामगारांचे म्हणणे आहे. सोमवारी गाझीपूरमधील कामगारांनी ढाका-टांगाइल महामार्ग रोखला. आशुलिया परिसरातही कामगारांनी नबीनगर-चंद्रा महामार्गावर आंदोलन केले. पोलिसांनी आंदोलकांना हटवण्यासाठी अश्रुधुराचा आणि पाण्याच्या फवाऱ्यांचा वापर केला. काही ठिकाणी पोलिस आणि आंदोलकांमध्ये संघर्ष झाल्याचे वृत्त आहे.
आंदोलनाला हिंसक वळण; वेतन मंडळाची स्थापना
बांगलादेशमध्ये रविवारीही आंदोलनादरम्यान हिंसाचाराच्या घटना घडल्या होत्या. महामार्ग रोखणे, वाहनांची तोडफोड आणि पोलीस चौक्यांना आग लावल्याच्या घटना समोर आल्या. आंदोलनामुळे अनेक कापड कारखान्यांचे कामकाज ठप्प झाले. कामगारांच्या वेतनवाढीच्या मागणीचा विचार करण्यासाठी सरकारने 6 सदस्यीय वेतन मंडळ स्थापन केले आहे. मात्र, मंडळाच्या घोषणेनंतरही आंदोलन थांबलेले नाही. कामगारांच्या मागण्या वेतनवाढीपुरत्या मर्यादित नसून ब्लॅकलिस्टिंगची पद्धत बंद करण्यासह इतर मागण्यांचाही समावेश आहे. दरम्यान, फ्रान्सस्थित ‘जस्टिस मेकर्स बांगलादेश इन फ्रान्स’ या मानवाधिकार संघटनेने कामगारांवरील पोलीस कारवाई आणि अटकसत्राचा निषेध केला आहे. आंदोलनातील घटनांची स्वतंत्र चौकशी करून ताब्यात घेतलेल्या कामगारांच्या सुरक्षेची खात्री करावी, अशी मागणी संघटनेने केली आहे. पाकिस्तानमध्ये मूलभूत सुविधांसाठी नागरिकांचा संघर्ष, तर बांगलादेशमध्ये वाढत्या महागाईच्या पार्श्वभूमीवर कामगारांचा वेतनवाढीसाठी लढा सुरू आहे. दोन्ही देशांतील परिस्थितीमुळे सामान्य नागरिकांच्या जीवनमानाचा प्रश्न पुन्हा ऐरणीवर आला आहे.