मुंबई : मुंबईतील सार्वजनिक वाहतूक व्यवस्था अधिक बळकट आणि प्रवाशांसाठी सोयीस्कर करण्यासाठी बृहन्मुंबई विद्युत पुरवठा आणि परिवहन उपक्रमाने (BEST) एक मोठा निर्णय घेतला आहे. गर्दीच्या मार्गांवर प्रवाशांना गती आणि आरामदायी प्रवास मिळावा यासाठी 'बेस्ट'ने आपल्या ताफ्यात ४४ नव्या वातानुकूलित (AC) इलेक्ट्रिक बसेस समाविष्ट केल्या आहेत.
मागाठाणे आगारातून झाली सुरुवात
१२ मीटर लांबीच्या या नवीन एसी बसेसचे लोकार्पण मागाठाणे आगारात (Magathane Depot) एका विशेष कार्यक्रमात करण्यात आले. या सोहळ्याला 'बेस्ट' समितीच्या अध्यक्षा तृप्ती विश्वासराव यांच्यासह अनेक प्रमुख अधिकारी व मान्यवर उपस्थित होते. या सर्व बसेस मागाठाणे डेपोमधून पाच प्रमुख मार्गांवर चालवल्या जाणार आहेत.
भाडेतत्त्वावर ताफ्यात दाखल झाल्या बसेस
मुंबई (सुहास शेलार ) : जळगाव जिल्हा मध्यवर्ती सहकारी बँकेच्या निवडणुकीत उमेदवारी अर्ज बाद झाल्याने शिवसेनेचे आमदार किशोर पाटील यांचे पुत्र सुमित ...
या नव्या बसेस 'इव्ही ट्रान्स महाराष्ट्र प्रायव्हेट लिमिटेड' (Evey Trans Maharashtra Pvt. Ltd.) या कंपनीमार्फत भाडेतत्त्वावर बेस्ट ताफ्यात दाखल करण्यात आल्या आहेत. सार्वजनिक वाहतूक अधिक सक्षम बनवणे हा यामागचा मुख्य उद्देश आहे. मिळालेल्या माहितीनुसार, या कंपनीला एकूण २४०० पूर्णपणे वातानुकूलित १२ मीटरच्या बसेस भाडेतत्त्वावर चालवण्याचा कंत्राट मिळाला आहे. या नव्या ४४ बसेसच्या समावेशामुळे कंपनीच्या बसेसची ताफ्यातील संख्या आता ९४ वर पोहोचली आहे.
आधुनिक बॅटरी तंत्रज्ञान आणि सुधारित रचना
या नव्या इलेक्ट्रिक बसेसची रचना अधिक आधुनिक करण्यात आली आहे. जुन्या बसेसच्या तुलनेत या बसेसचे वजन सुमारे १६ टक्क्यांनी कमी करण्यात आले आहे. पूर्वी बसेसच्या छतावर बॅटरी बसवली जात असे, मात्र या नव्या मॉडेलमध्ये बॅटरी वाहनाच्या खालच्या भागात ठेवण्यात आली आहे. यामुळे गाडीचा समतोल (Weight Distribution) उत्तम राहण्यास मदत होईल आणि प्रवाशांसाठी बसमध्ये अधिक जागा उपलब्ध होईल.
प्रवाशांच्या सुरक्षेसाठी हायटेक फीचर्स
महिला आणि सर्वसामान्य प्रवाशांच्या सुरक्षेसाठी या बसेसमध्ये विशेष तंत्रज्ञान वापरण्यात आले आहे. बसेसमध्ये अँटी-लॉक ब्रेकिंग सिस्टम (ABS) आणि हायड्रॉलिक पॉवर स्टिअरिंग, सीसीटीव्ही (CCTV) कॅमेरे आणि व्हेईकल ट्रॅकिंग सिस्टम (VTS), आपत्कालीन प्रसंगासाठी पॅनिक बटन्स (Panic Buttons) बसवण्यात आले आहेत. या सर्व आधुनिक सुविधांमुळे प्रवाशांचा प्रवास अधिक सुरक्षित होईल आणि प्रशासनाला बसेसच्या हालचालींवर लक्ष ठेवणे सोपे जाईल.
या मार्गांवर धावणार नव्या बसेस
मागाठाणे डेपोमधून सुरू होणाऱ्या या ४४ नव्या एसी इलेक्ट्रिक बसेसमुळे कांदिवली, बोरीवली, मीरा रोड आणि ठाणे परिसरातील दैनंदिन प्रवाशांना मोठा दिलासा मिळणार आहे. या बसेस प्रामुख्याने कांदिवली बस स्थानक (पूर्व), चांदिवलीतील संघर्ष नगर, समता नगर बस स्थानक (कांदिवली पूर्व), बोरीवली स्टेशन (पूर्व), मीरा रोड स्टेशन (पूर्व) आणि ठाणे स्टेशन (पूर्व) या प्रमुख मार्गांवर धावणार आहेत. या सर्व मार्गांवर दररोज नोकरदार व नागरिकांची मोठी गर्दी असते, त्यामुळे या नव्या बसेसच्या आगमनाने प्रवाशांचा प्रवासाचा वेळ वाचणार असून त्यांना अधिक सुरक्षित, आरामदायी आणि प्रदूषणमुक्त प्रवासाचा अनुभव मिळणार आहे.