देहरादून : उत्तराखंड स्थापना दिनानिमित्त आयोजित एका दिमाखदार सोहळ्यात केंद्रीय गृहमंत्री अमित शाह (Amit Shah) यांनी राज्याला तब्बल १५०८ कोटी रुपयांच्या विकासकामांची मोठी भेट दिली आहे. मुख्यमंत्री पुष्कर सिंह धामी यांच्या प्रमुख उपस्थितीत झालेल्या या कार्यक्रमात विविध प्रकल्पांचे उद्घाटन आणि भूमिपूजन पार पडले. या विशेष सोहळ्यात राज्याच्या प्रगतीत आणि सेवेत उल्लेखनीय योगदान देणाऱ्या १५ प्रतिभावंतांना 'उत्तराखंड गौरव सन्मान', 'लाइफ टाईम अचिव्हमेंट पुरस्कार' आणि 'बाल वीरता पुरस्कार' प्रदान करण्यात आले. या कार्यक्रमात बोलत असताना केंद्रीय गृहमंत्री अमित शाह यांनी विरोधी पक्षनेते राहुल गांधी यांच्यावर जोरदार निशाणा साधला.
राहुल गांधींची 'व्होट बचाओ यात्रा' म्हणजे 'घुसखोर बचाओ यात्रा'
मुंबई: मुख्यमंत्री देवेंद्र फडणवीस आणि दोन्हीही उपमुख्यमंत्री यांच्या हस्ते आज, धनत्रयोदशीच्या मुहूर्तावर मुंबईतील बीडीडी चाळीतील रहिवाशांना ...
काँग्रेस नेते राहुल गांधी यांच्या अलीकडील रॅलींवर कडाडून टीका करताना अमित शाह म्हणाले की, निवडणूक मतदारयाद्यांच्या विशेष पुनरिक्षण (SIR) विरोधात काढण्यात आलेली राहुल बाबांची 'व्होट बचाओ यात्रा' नसून ती सरळ सरळ 'घुसखोर बचाओ यात्रा' आहे. या 'देवभूमीतून' आणि संपूर्ण भारतातून बेकायदेशीर घुसखोरांना हाकलून लावले पाहिजे की नाही? असा थेट सवाल त्यांनी जनतेसमोर उपस्थित केला. काँग्रेस पक्ष आजही आपल्या तुष्टीकरणाच्या राजकारणातून बाहेर आलेला नाही, असा आरोप करत त्यांनी, काँग्रेसने एकेकाळी शुक्रवारच्या नमाजासाठी सुट्टी देण्याचा प्रस्ताव मांडल्याची आठवण करून दिली.
काँग्रेसवर भ्रष्टाचाराचे गंभीर आरोप आणि राम मंदिराचा मुद्दा
काँग्रेस पक्षावर टीकास्त्र सोडताना शाह म्हणाले की, या पक्षाने नेहमीच प्रभू श्री राम मंदिराच्या बांधकामास विरोध केला आणि आपल्या देशामध्ये घुसखोरांना आश्रय दिला. येथील लोकसंख्या बदलण्याचे षड्यंत्र रचले गेले होते, मात्र भारतीय जनता पक्षाने या सर्व गोष्टींना पूर्णपणे आळा घातला आहे. गेल्या १० वर्षांत भाजपने अत्यंत स्वच्छ आणि पारदर्शक कारभार दिला आहे. याच्या विपरीत, काँग्रेसच्या हरीश रावत यांच्या काळात राज्य सचिवालय हे लाचखोरी आणि कमिशनखोरीचे मुख्य केंद्र बनले होते, असा गंभीर दावा त्यांनी केला. एससी/एसटी शिष्यवृत्ती घोटाळा, लिकर पॉलिसी 'स्टिंग' ऑपरेशन आणि कुमाऊं अन्नधान्य पुरवठा घोटाळा यांसारख्या अनेक भ्रष्टाचाराच्या प्रकरणांमध्ये काँग्रेस सरकार सामील असल्याचा घणाघात त्यांनी केला. जनतेने आता भ्रष्टाचाराचा पर्याय निवडायचा की विकासाचा, याचा निर्णय घ्यायचा आहे, असे आवाहन त्यांनी केले.
उत्तराखंडमध्ये विकासाची गंगा आणि पर्यटनात मोठी वाढ
उत्तराखंडच्या प्रगतीचा लेखाजोखा मांडताना अमित शाह म्हणाले की, एकेकाळी काँग्रेसने उत्तराखंडला 'मनी ऑर्डर इकॉनॉमी' आणि स्थलांतराच्या चक्रात अडकवून ठेवले होते. मात्र, भाजपने येथील स्थलांतर रोखण्यासाठी आणि राज्याला उद्योगप्रधान बनवण्यासाठी मोठी पावले उचलली आहेत. राज्यात पर्यटनाचे प्रमाण तब्बल ३८० टक्क्यांनी वाढले आहे. सीमा सुरक्षेवर बोलताना ते म्हणाले की, पूर्वीचे सरकार रस्ते बांधत नव्हते आणि असे म्हणायचे की रस्ते बांधल्यास चीन किंवा शत्रू देश सहज आत येऊ शकतील. मात्र, पंतप्रधान नरेंद्र मोदी यांच्या नेतृत्वाखाली आपण एवढे मजबूत रस्ते जाळे तयार केले आहे की आज भारताच्या सीमेकडे डोकुन पाहण्याची कोणाचीही टाप नाही. ज्यांनी असे दुष्टसाहस केले, त्यांना सर्जिकल स्ट्राईक आणि 'ऑपरेशन सिंदूर'सारख्या कारवाईद्वारे चोख प्रत्युत्तर देण्यात आले आहे.
आगामी निवडणुका आणि राज्याचा प्रवास
२०२२ पासून उत्तराखंडचा GSDP ५० टक्क्यांनी तर प्रतिव्यक्ती उत्पन्न ४० टक्क्यांनी वाढले आहे. राज्यात १ लाख कोटींहून अधिकचे औद्योगिक प्रकल्प प्रत्यक्षात उतरले आहेत. आगामी विधानसभा निवडणुकीत जनता पुन्हा एकदा पूर्ण बहुमताने भाजप सरकार सत्तेवर आणेल, असा ठाम विश्वास त्यांनी व्यक्त केला. राहुल गांधींच्या उत्तराखंड दौऱ्यांमुळे राजकारणावर कोणताही फरक पडणार नाही, असे सांगत पंतप्रधान नरेंद्र मोदींच्या मार्गदर्शनाखाली मुख्यमंत्री पुष्कर सिंह धामी उत्तम प्रकारे राज्याचा विकास करत आहेत, असे गौरवोद्गार त्यांनी काढले.
उत्तराखंडची थोडक्यात पार्श्वभूमी
उत्तराखंड राज्य ९ नोव्हेंबर २००० रोजी उत्तर प्रदेशपासून वेगळे होऊन भारताचे २७ वे राज्य म्हणून अस्तित्वात आले होते. हा प्रदेश त्याच्या नैसर्गिक संपत्तीसाठी, जलस्रोतांसाठी, घनदाट वनांसाठी आणि बर्फाच्छादित हिमालयीन शिखरांसाठी जगप्रसिद्ध आहे. राज्य स्थापनेची २६ वर्षे पूर्ण करत असताना, डोंगराळ भागात पायाभूत सुविधांचा विकास, तरुणांसाठी रोजगाराच्या संधी आणि पर्यटनाला चालना देण्याच्या उद्देशाने सरकार वेगाने पुढे जात आहे.