बेंगळुरू : ज्येष्ठ विचारवंत आणि लेखक एच. व्ही. शेषाद्री (H. V. Sheshadri) यांनी आपले संपूर्ण आयुष्य देशाच्या उभारणीसाठी वेचले. देशाला पुढे न्यायचे असेल तर शिस्तबद्ध, सक्षम आणि समर्पित नागरिकांची गरज असते, हे ओळखून त्यांनी असेच सुजाण नागरिक घडवण्याचे मोठे काम केले, अशा शब्दांत पंतप्रधान नरेंद्र मोदी यांनी त्यांचा गौरव केला. शुक्रवारी बेंगळुरू येथील 'प्रशांती कुटीरम' संस्थेच्या ५० व्या वर्धापन दिनानिमित्त (सुवर्णमहोत्सवी सोहळा) आयोजित कार्यक्रमात ते बोलत होते. या सोहळ्यात बोलताना पंतप्रधान मोदी यांनी शेषाद्री यांच्या कार्याला उजाळा दिला. यंदा प्रशांती कुटीरमचा सुवर्णमहोत्सव साजरा होत असतानाच एच. व्ही. शेषाद्री यांचे जन्मशताब्दी वर्षही सुरू आहे, हा एक मोठा योग आहे. त्यांनी स्थापन केलेल्या संस्थेच्या माध्यमातून आयुष्यभर राष्ट्रनिर्माणाचे कार्य केले, असे सांगून पंतप्रधानांनी त्यांना विनम्र श्रद्धांजली वाहिली.
कर्नाटक : पंतप्रधान नरेंद्र मोदी शुक्रवारी कर्नाटक दौऱ्यावर असून, त्यांचे बंगळूरु येथे आगमन झाले. यावेळी कर्नाटकच्या राज्यपाल सुधा यादव आणि ...
भारताची संस्कृती आणि परंपरा जगासमोर नेण्यासाठी सरकारने केलेल्या कामाचाही पंतप्रधानांनी यावेळी आढावा घेतला. ते म्हणाले की, स्वातंत्र्यलढ्याच्या काळात एकीकडे क्रांतिकारक लढत होते, तर दुसरीकडे स्वामी विवेकानंदांसारख्या महापुरुषांनी तरुणांना योगाचा मार्ग दाखवून देशाची आध्यात्मिक ताकद जागी केली. गेल्या १२ वर्षांत भारताने आपली संस्कृती, ज्ञान आणि विज्ञान अतिशय आत्मविश्वासाने जगासमोर मांडले आहे. भारताच्याच पुढाकारामुळे आज संपूर्ण जग 'आंतरराष्ट्रीय योग दिन' साजरा करत आहे. योगासनांना आता भारतात खेळाचा दर्जा मिळाला असून 'खेलो इंडिया' आणि राष्ट्रीय स्पर्धांमध्ये त्याचा समावेश करण्यात आला आहे. यामुळे या क्षेत्रातील तरुणांना करिअरच्या नवीन संधी मिळत आहेत. यासोबतच सरकारने आयुर्वेदातील संशोधनाला चालना दिली असून, आयुर्वेदिक उत्पादनांच्या पेटंटला प्रोत्साहन दिले आहे. याचा परिणाम म्हणून आज भारताची आयुष आणि हर्बल औषधांची परदेशातील निर्यात वेगाने वाढत असल्याचे पंतप्रधानांनी सांगितले.
एस-व्हीवायएएसए (S-VYASA) विद्यापीठाच्या आवारात संस्थेच्या वतीने या कार्यक्रमाचे आयोजन करण्यात आले होते. एच. व्ही. शेषाद्री हे एक प्रसिद्ध लेखक, समाजसेवक आणि राष्ट्रीय स्वयंसेवक संघाचे ज्येष्ठ नेते होते. त्यांच्या स्मृतीनिमित्त आयोजित या कार्यक्रमाला राष्ट्रीय स्वयंसेवक संघाचे सरकार्यवाह दत्तात्रेय होसबळे प्रमुख पाहुणे म्हणून उपस्थित होते. तत्पूर्वी, पंतप्रधान मोदी बेंगळुरूमध्ये पोहोचल्यावर कर्नाटकचे मुख्यमंत्री डी. के. शिवकुमार आणि राज्यपाल सुधा यादव यांनी त्यांचे स्वागत केले.
बेंगळुरूच्या या दौऱ्यात पंतप्रधान मोदी यांच्या हस्ते १५,६०० कोटी रुपयांहून अधिक किमतीच्या विविध विकास प्रकल्पांचे उद्घाटन आणि भूमिपूजन होणार आहे. यामध्ये 'नम्मा मेट्रो'च्या पिंक लाईनच्या नवीन उड्डाणपूल (Elevated) मार्गाचा समावेश आहे. हा मार्ग सुरू झाल्यामुळे बेंगळुरूमधील मेट्रोचे जाळे पहिल्यांदाच १०० किलोमीटरपेक्षा जास्त लांबीचे होणार आहे. कालेना अग्रहारा ते तावरेकेरे या नवीन मार्गावर कालेना अग्रहारा, हुलीमावू, आयआयएमबी (बिलेकहल्ली), जेपी नगर चौथा टप्पा, जयदेव हॉस्पिटल आणि तावरेकेरे अशी एकूण सहा स्थानके आहेत. या मेट्रो मार्गाची प्रवासी वाहतुकीपूर्वीची अंतिम सुरक्षा तपासणी (CMRS) ८ ऑक्टोबर २०२६ रोजी पूर्ण झाली होती आणि २८ ऑक्टोबर २०२६ रोजी या मार्गाला परवानगीही मिळाली आहे. या प्रकल्पाचा जमिनीखालचा (भूमिगत) टप्पा २०२७ पर्यंत पूर्ण करण्याचे नियोजन आहे. दरम्यान, सरकारचे पुढील धोरण, महत्त्वाचे निर्णय आणि भविष्यातील कामांची दिशा ठरवण्यासाठी पंतप्रधान नरेंद्र मोदी येत्या बुधवारी, १८ नोव्हेंबर रोजी केंद्रीय मंत्रिमंडळाची एक महत्त्वाची बैठक घेणार आहेत.