Virat Kohli dropped catch : भारत आणि न्यूझीलंड यांच्यात सुरू असलेल्या 5 सामन्यांच्या वनडे मालिकेतील पाचव्या आणि अत्यंत निर्णायक सामन्यात टीम इंडियाची अवस्था अतिशय बिकट झाली आहे. या सामन्यात भारतीय संघाच्या फलंदाजीचा पूर्णपणे भांडाफोड झाला असून, बॅटिंग ऑर्डर पत्त्याच्या बंगल्याप्रमाणे कोसळली. फलंदाजीनंतर गोलंदाजीतही भारताला सुरुवातीचे यश मिळूनही मोठी कमाल दाखवता आली नाही. मात्र, या संपूर्ण सामन्यात सर्वात जास्त चर्चा रंगली ती मैदानावर घडलेल्या एका अविश्वसनीय घटनेची! जगातील सर्वोत्तम फिल्डर्सपैकी एक आणि 'फिल्डिंगचा बादशाह' म्हणून ओळखल्या जाणाऱ्या विराट कोहलीने स्लिपमध्ये एक अगदी साधा-सोपा कॅच सोडला आणि मैदानावरील सर्वच खेळाडूंना अन् चाहत्यांना आश्चर्याचा धक्का दिला.
विराट कोहलीची ती एक घोडचूक अन् सामन्याचं चित्र बदललं
प्रथम फलंदाजी करताना भारतीय संघाचा डाव 42.1 ओव्हरमध्ये अवघ्या 209 धावांवर संपुष्टात आला. त्यामुळे न्यूझीलंडसमोर विजयासाठी 210 धावांचे अतिशय माफक आव्हान होते. या छोट्या लक्ष्याचा पाठलाग करताना किवी संघाची सुरुवात मात्र अत्यंत अडखळत झाली. भारतीय वेगवान गोलंदाजांनी सुरुवातीपासूनच आक्रमक पवित्रा घेत न्यूझीलंडच्या आघाडीच्या फलंदाजांवर जोरदार दडपण निर्माण केले. वेगवान गोलंदाज मोहम्मद सिराज आणि अर्शदीप सिंग यांनी भेदक मारा करत न्यूझीलंडचे सुरुवातीचे महत्त्वाचे गडी झटपट बाद केले आणि सामन्यात भारतीय संघाचे जोरदार पुनरागमन घडवून आणले होते. मात्र, नेमक्या अशा निर्णायक क्षणी विराट कोहलीच्या हातून एक मोठी घोडचूक झाली.
IND vs NZ, 5th ODI : न्यूझीलंडविरुद्ध टीम इंडियाची फलंदाजी ढेपाळली! रोहित-विराट फ्लॉप, 2013 नंतर पुन्हा तेच घडलं
न्यूझीलंडविरुद्ध सुरू असलेल्या पाचव्या एकदिवसीय सामन्यात भारताची सुरुवात अत्यंत खराब झाली आहे. भारतीय संघाचा अनुभवी सलामीवीर रोहित शर्माला मॅथ्यू ...
श्रेयस अय्यरची रणनीती अन् गंभीरची व्हायरल रिएक्शन
कमी धावसंख्येचा बचाव करण्यासाठी कर्णधार श्रेयस अय्यरने सुरुवातीपासूनच आक्रमक गोलंदाजी लावली. त्याने अर्शदीप सिंग आणि मोहम्मद सिराज या दोन्ही प्रमुख गोलंदाजांचे 8 ओव्हर पहिल्याच स्पेलमध्ये पूर्ण करून घेतले. भारतीय संघाला विकेट्सची नितांत गरज असताना श्रेयसने स्लिपमध्ये दोन सर्वात अनुभवी आणि स्टार खेळाडू तैनात केले होते. यातील एक म्हणजे विराट कोहली आणि दुसरा म्हणजे रोहित शर्मा. विशेष म्हणजे, रोहित शर्माने यापूर्वीच एक कॅच सोडला होता. त्या धक्क्यातून संघ सावरतो न सावरतो तोच विराटने फॉक्सक्राईफ्ट याचा स्लिपमध्ये आलेला एक अत्यंत सिंपल कॅच हातातून निसटू दिला. विराटसारख्या चपळ खेळाडूकडून अशी चूक झाल्याने ड्रेसिंग रूममध्ये बसलेले मुख्य प्रशिक्षक गौतम गंभीर कमालीचे अस्वस्थ आणि नाराज झाले. गंभीरच्या चेहऱ्यावरील राग आणि निराशेची ही रिएक्शन कॅमेऱ्यात कैद झाली असून, तिचा व्हिडिओ सध्या सोशल मीडियावर वाऱ्याच्या वेगाने व्हायरल होत आहे.
भारतीय फलंदाजीची दाणादाण, 209 धावांवर डाव आटोपला
तत्पूर्वी, या सामन्यात न्यूझीलंड संघाने नाणेफेक (टॉस) जिंकून प्रथम गोलंदाजी करण्याचा निर्णय घेतला, जो त्यांच्या गोलंदाजांनी पूर्णपणे सार्थ ठरवला. प्रथम फलंदाजीसाठी मैदानात उतरलेल्या भारतीय संघाला 50 ओव्हरही पूर्ण खेळता आल्या नाहीत. संपूर्ण भारतीय संघ 42.1 ओव्हरमध्ये सर्वबाद 209 धावांवर गारद झाला. भारताकडून मधल्या फळीत अक्षर पटेल आणि यष्टिरक्षक फलंदाज ईशान किशन यांनी प्रत्येकी 46 धावांची झुंजार आणि महत्त्वपूर्ण खेळी करत संघाला 200 धावांचा टप्पा गाठून दिला. कर्णधार श्रेयस अय्यरने 22 धावांचे योगदान दिले, मात्र इतर दिग्गज फलंदाजांना न्यूझीलंडच्या शिस्तबद्ध गोलंदाजीसमोर मोठी धावसंख्या उभारता आली नाही. किवी संघाकडून मॅथ्यू फिशर, कर्णधार मिचेल सँटनर आणि जेकब डफी या त्रिकुटाने अचूक टप्प्यावर गोलंदाजी करत प्रत्येकी 3 बळी टिपले आणि भारतीय फलंदाजीचे कंबरडे मोडले.