ठाणे : ठाणे जिल्ह्यातील महसूल सेवक (कोतवाल) पदाच्या भरतीची वाट पाहणाऱ्या हजारो तरुणांसाठी एक महत्त्वाची आणि मोठी बातमी समोर आली आहे. प्रशासनाने या भरती प्रक्रियेचे सुधारित वेळापत्रक जाहीर केले असून, आधी ठरलेली तारीख बदलण्यात आली आहे. यामुळे आता उमेदवारांना परीक्षेसाठी आणखी काही काळ मिळाला आहे. ठाणे, कल्याण, मुरबाड, अंबरनाथ, भिवंडी आणि शहापूर या 6 तालुक्यांतील रिक्त पदांसाठी ही भरती प्रक्रिया अत्यंत वेगाने राबविण्यात येत आहे.
शासनाच्या निर्देशानुसार परीक्षा पुढे ढकलली
मिळालेल्या माहितीनुसार, ठाणे जिल्ह्यातील महसूल सेवक (कोतवाल) पदांच्या भरतीसाठी यापूर्वी 15 नोव्हेंबर 2026 रोजी लेखी परीक्षा आयोजित करण्यात आली होती. मात्र, महाराष्ट्र शासनाच्या महसूल व वन विभागाच्या निर्देशानुसार आणि शासनाच्या सहसचिवांनी 12 नोव्हेंबर 2026 रोजी दिलेल्या विशेष पत्रानुसार ही परीक्षा पुढे ढकलण्याचा मोठा निर्णय घेण्यात आला. याबाबत महसूल सेवक निवड समितीचे अध्यक्ष तथा उल्हासनगरचे उपविभागीय अधिकारी विजयानंद शर्मा यांनी सविस्तर माहिती दिली आहे.
BMC Revenue: महापालिकेच्या महसूलात तबबल 815 कोटींनी होणार वाढ
मुंबई (विशेष प्रतिनिधी) : महानगरपालिकेचा महसूल वाढवण्याच्यादृष्टीकोनातून लिलाव पध्दतीने भूखंड भाडेकरारावर देण्याचा निर्णय घेतला असून त्यानुसार ...
भरतीचे सुधारित वेळापत्रक जाहीर
प्रशासनाने जाहीर केलेल्या नव्या आणि सुधारित वेळापत्रकानुसार भरती प्रक्रियेचे टप्पे खालीलप्रमाणे असणार आहेत:
23 ते 30 नोव्हेंबर 2026 या कालावधीत तालुकानिहाय रिक्त जागांची अचूक यादी तयार केली जाईल.
1 ते 15 डिसेंबर दरम्यान रिक्त जागांनुसार बिंदुनामावली (रॉस्टर) तयार करण्याचे काम पार पडेल.
15 डिसेंबर रोजी अधिकृत भरती समितीची स्थापना केली जाणार आहे.
16 ते 31 डिसेंबर या कालावधीत भरतीची नवीन जाहिरात सर्वत्र प्रसिद्ध केली जाईल.
प्राप्त झालेल्या अर्जांची कसून छाननी 1 ते 7 जानेवारी 2027 या कालावधीत केली जाईल.
पात्र उमेदवारांना 8 ते 16 जानेवारी दरम्यान अधिकृत प्रवेशपत्र (Admit Card) उपलब्ध करून दिले जाईल.
सर्व टप्पे पार पडल्यानंतर अखेर 17 जानेवारी 2027 रोजी मुख्य लेखी परीक्षा घेतली जाणार आहे.
निकाल आणि अंतिम नियुक्ती कधी?
केवळ परीक्षेची तारीखच नव्हे, तर निकाल आणि नियुक्तीचे संपूर्ण वेळापत्रकही प्रशासनाने जाहीर केले आहे. लेखी परीक्षेची उत्तरसूची आणि अंतिम निकाल परीक्षा झाल्याबरोबर म्हणजेच 18 जानेवारी 2027 रोजी जाहीर केला जाईल. त्यानंतर 18 ते 24 जानेवारी दरम्यान पात्र उमेदवारांच्या कागदपत्रांची कसून पडताळणी केली जाईल. या सर्व प्रक्रियेनंतर अखेर 27 जानेवारी 2027 रोजी यशस्वी उमेदवारांना अंतिम नियुक्तीपत्रे जारी करण्याचे नियोजन प्रशासनाने केले आहे.
अधिकृत संकेतस्थळाला भेट देण्याचे आवाहन
या संपूर्ण भरती प्रक्रियेसाठी उमेदवारांकडून अर्ज मागविण्यात आले आहेत. सर्व संबंधित आणि आणि उत्सुक उमेदवारांनी या बदललेल्या व सुधारित वेळापत्रकाची गांभीर्याने नोंद घ्यावी. तसेच भरती प्रक्रियेतील आगामी सर्व अपडेट्ससाठी thane.kotwal.org या अधिकृत संकेतस्थळाला वेळोवेळी भेट द्यावी, असे आवाहन प्रशासनाकडून करण्यात आले आहे.