उरणमधील जुना खोपटा पूल तब्बल वर्षभर बंद राहिल्यानंतर अखेर वाहतुकीसाठी खुला करण्यात आला आहे. शनिवारी,14 नोव्हेंबर रोजी या पुलाचे लोकार्पण झाले. या पुलामुळे जवाहरलाल नेहरू बंदर प्राधिकरण, द्रोणागिरी औद्योगिक क्षेत्र आणि आजूबाजूच्या कंटेनर यार्डांना जोडणारा महत्त्वाचा मार्ग पुन्हा सुरू झाला आहे. गेल्या वर्षभरापासून हा पूल बंद असल्यामुळे सर्व वाहतूक शेजारच्या पुलावरून वळवण्यात आली होती. त्यामुळे त्या भागात मोठी वाहतूक कोंडी होत होती. आता जुना पूल सुरू झाल्याने या कोंडीतून मोठा दिलासा मिळणार आहे. 240 मीटर लांबीच्या या पुलाची तब्बल 10 कोटी रुपये खर्चून दुरुस्ती करण्यात आली आहे. आता या पुलावरून हलकी वाहने आणि 16 टनांपर्यंत वजनाची व्यावसायिक वाहने जाऊ शकणार आहेत. यामुळे उरणच्या पूर्व भागातील 25 गावांतील नागरिक आणि प्रवाशांची सोय होणार आहे.
1990 सालचा पूल, वाढत्या वाहतुकीमुळे झाला कमकुवत
हा पूल 1990 मध्ये बांधण्यात आला होता. त्यावेळी तो हलक्या वाहनांसाठी आणि स्थानिक प्रवाशांसाठी तयार करण्यात आला होता. त्याची रुंदी साडेसात मीटर आहे. मात्र नंतर बंदर आणि औद्योगिक काम वाढल्यामुळे या पुलावर जड वाहनांची वाहतूक मोठ्या प्रमाणात वाढली. त्यामुळे पुलाच्या आतील भागात भेगा पडल्या आणि बेअरिंगचे नुकसान झाले. अखेर नोव्हेंबर 2025 मध्ये हा पूल बंद करावा लागला. सार्वजनिक बांधकाम विभागाने डिसेंबर 2025 मध्ये दुरुस्तीचे काम सुरू केले. सुरुवातीला 5 कोटी रुपयांची मंजुरी होती. काम तीन महिन्यांत पूर्ण होईल, असा अंदाज होता. मात्र तपासणीत आतील भागाचे नुकसान जास्त असल्याचे लक्षात आले. त्यामुळे आणखी 5 कोटी रुपये उपलब्ध करून देण्यात आले.
Pune News : पुणेकरांनो लक्ष द्या! गृहमंत्री अमित शाह यांच्या दौऱ्यामुळे दोन दिवस वाहतुकीत बदल; 'या' मार्गांवर नो-पार्किंग
पुणे : केंद्रीय गृहमंत्री अमित शाह यांच्या पुणे दौऱ्याच्या पार्श्वभूमीवर शहरातील वाहतूक व्यवस्थेत महत्त्वाचे बदल करण्यात आले आहेत. रविवारी ...
आधुनिक तंत्रज्ञानाचा वापर
दुरुस्तीच्या कामात पुलाच्या पाचही स्पॅनला बळकटी देण्यात आली. चार मध्यवर्ती हिंज बेअरिंग आणि आठ रोलर रॉकर बेअरिंग बदलण्यात आले. नवीन एक्स्पान्शन जॉइंट बसवण्यात आले आणि डेक स्लॅब पुन्हा बांधण्यात आला. जुने बेअरिंग बाजारात मिळत नसल्यामुळे ते विशेष पद्धतीने तयार करून घेण्यात आले. या कामासाठी अल्ट्रा हाय परफॉर्मन्स फायबर रिइन्फोर्स्ड काँक्रीट या आधुनिक तंत्रज्ञानाचा वापर करण्यात आला. हे तंत्रज्ञान देशात फार कमी ठिकाणी वापरले गेले आहे. डेक स्लॅबसाठी एम-80 दर्जाचे काँक्रीट वापरण्यात आले. काँक्रीटचे तापमान नियंत्रित ठेवण्यासाठी रात्रीच्या वेळी बर्फाचा वापर करून काम करण्यात आले. दरम्यान, उरणमध्ये सध्या रोज सुमारे 7,500 वाहनांची वर्दळ असून भविष्यात ती 15,000 पेक्षा जास्त होण्याचा अंदाज आहे. त्यामुळे वांद्रे-वरळी सी लिंकच्या धर्तीवर नवीन सहा पदरी केबल पूल बांधण्याची गरजही विभागाने व्यक्त केली आहे.