Gautam Gambhir Viral Post : भारत आणि पाकिस्तान यांच्यात खेळल्या गेलेल्या अंडर-19 आशिया कप 2026 च्या (U19 Asia Cup 2026) अत्यंत रोमांचक आणि अटीतटीच्या अंतिम सामन्यात भारतीय युवा संघाने ऐतिहासिक विजय मिळवला आहे. अंतिम सामन्यात पाकिस्तानचे 338 धावांचे अवाढव्य आव्हान भारताने एका विकेट राखून थरारक पद्धतीने पार केले आणि रेकॉर्ड-ब्रेक नववे आशिया कप विजेतेपद आपल्या नावावर केले. भारताच्या या विजयानंतर संपूर्ण क्रिकेट विश्वात आनंदाचे वातावरण असून, भारतीय संघाचे मुख्य प्रशिक्षक गौतम गंभीर (Gautam Gambhir) यांनी केलेली एक सोशल मीडिया पोस्ट सध्या इंटरनेटवर तुफान व्हायरल होत आहे.
कठीण प्रसंगात भारताचा ऐतिहासिक विजय
338 धावांच्या मोठ्या लक्ष्याचा पाठलाग करताना भारतीय संघाची अवस्था अत्यंत बिकट झाली होती. 42 व्या षटकात 252 धावांवर भारताचे आठ फलंदाज तंबूत परतले होते आणि पाकिस्तानचा विजय निश्चित मानला जात होता. अशा अत्यंत दबावाच्या आणि कठीण प्रसंगात खालच्या फळीतील फलंदाज मनाल (47 धावा) आणि मोहित उल्वा (49 धावा नाबाद) यांनी जिद्दीने खेळत भारताला अविश्वसनीय विजय मिळवून दिला. मोहित उल्वा याने शेवटच्या चेंडूवर चौकार ठोकत सामना भारताच्या झोक्यात टाकला.
Aryavir Sehwag Viral Video : अंडर 19 आशिया कपच्या थरारक अंतिम सामन्यात भारतीय युवा संघाने पाकिस्तानचा पराभव करत ऐतिहासिक जेतेपद पटकावले. भारताचा माजी स्फोटक सलामीवीर ...
गौतम गंभीरची खास पोस्ट चर्चेत
भारताच्या या ऐतिहासिक विजयानंतर मुख्य प्रशिक्षक गौतम गंभीर स्वतःला रोखू शकले नाहीत. त्यांनी एक्स (ट्विटर) वर एक अत्यंत जोशपूर्ण पोस्ट शेअर केली, जी अल्पावधीतच सोशल मीडियावर व्हायरल झाली. गंभीर यांनी आपल्या पोस्टमध्ये लिहिले, "निडर क्रिकेट. अचल विश्वास. जिद्दीला कोणताच फलंदाजीचा क्रम नसतो !! आशियाचे चॅम्पियन! शाब्बास मुलांनो!" गंभीर यांच्या या वक्तव्याने आणि युवा खेळाडूंच्या जिद्दीने देशभरातील क्रिकेटप्रेमींची मने जिंकली आहेत.
Fearless cricket. Unshakable belief. Grit has no batting order !!
Champions of Asia! Well done, boys! 🇮🇳🏆 https://t.co/n2mTAsZPHz — Gautam Gambhir (@GautamGambhir) November 14, 2026
आर्यवीर सेहगाव ठरला 'मॅन ऑफ द मॅच'
या संपूर्ण स्पर्धेत आणि अंतिम सामन्यात माजी स्फोटक फलंदाज वीरेंद्र सेहवागचा मुलगा आर्यवीर सेहवाग याने चमकदार कामगिरी केली. त्याने फायनलमध्ये कर्णधार लक्षय रायचंदानी (80 धावा) सोबत मिळून अवघ्या 17.4 ओव्हरमध्ये 95 धावांची महत्त्वपूर्ण भागीदारी रचली. या धडाकेबाज सुरुवातीमुळेच भारताच्या मोठ्या लक्ष्याचा पाठलाग करणे सोपे झाले. आर्यवीरने संपूर्ण स्पर्धेत 5 डावांत 90.25 च्या जबरदस्त सरासरीने एकूण 361 धावा फटकावल्या. उत्कृष्ट कामगिरीसाठी त्याला 'मॅन ऑफ द मॅच' घोषित करण्यात आले. सामना संपल्यानंतर बोलताना आर्यवीरने सांगितले की, ड्रेसिंग रूममध्ये खेळाडूंमध्ये पूर्ण आत्मविश्वास होता की खेळपट्टी फलंदाजीसाठी अतिशय उत्तम असल्यामुळे हे लक्ष्य सहज गाठता येईल. मोहित आणि मनाल यांनी शेवटी दाखवलेल्या संयमी खेळाचेही त्याने कौतुक केले.
