Prahaar Marathi News Live: दक्षिण काश्मिरमध्ये लष्कर-ए-तैयबाचा वॉन्टेड कमांडर भारतीय जवानांच्या रडारवर
दक्षिण काश्मीरमधील कुलगाममध्ये सुरक्षा दलामध्ये आणि दहशतवाद्यांमध्ये चकमक सुरू आहे. परिसरात दहशतवादी असल्याची माहिती मिळाल्यानंतर, बुधवार सकाळपासून येथे मोठ्या प्रमाणावर शोधमोहीम आणि दहशतवादविरोधी कारवाई सुरू आहे. प्राथमिक माहितीनुसार, लष्कर-ए-तैयबाचा वॉन्टेड कमांडर लतीफ भट या परिसरामध्ये लपून बसल्याचे वृत्त आहे. या मोहिमेत जम्मू-काश्मीर पोलीस, लष्कर आणि सीआरपीएफचे जवान सहभागी आहेत. सुरक्षा यंत्रणांना संशय आहे की, लतीफ भट कुलगामच्या याच भागात लपला आहे. सुरक्षा दलांच्या कर्मचाऱ्यांनी आणि अधिकार्यांनी संपूर्ण परिसर वेढला असून शोध मोहीम सुरू आहे. चकमकीबाबत अधिक तपशील आणि दहशतवाद्यांचा खात्मा झाल्याची अधिकृत माहिती मिळाली नाही.
Prahaar Marathi News Live: आयफोनच्या EMI वरून वाद, पनवेलमध्ये मित्रानेच मित्राची केली हत्या; आरोपीला अटक
पनवेलमध्ये आयफोनच्या ईएमआयच्या थकित हप्त्यांवरून झालेल्या वादातून एका तरुणाची त्याच्याच मित्राने हत्या केल्याची धक्कादायक घटना समोर आली आहे. प्रतीक अंबवले असे मृत तरुणाचे नाव असून, प्रतीक जाधव असे आरोपीचे नाव आहे. वादातून आरोपीने तरुणाची हत्या करून मृतदेह झुडपांमध्ये टाकल्याचा आरोप आहे. पोलिसांनी तपासाअंती आरोपीला अटक केली असून, न्यायालयाने त्याला पोलीस कोठडी सुनावली आहे.