जुन्या पुणे-मुंबई महामार्गावर दोन अपघात; दोन जखमी

पिंपरी-चिंचवड (प्रतिनिधी) : जुन्या पुणे-मुंबई महामार्गावर सकाळपासून दोन वेगवेगळे अपघात झाले. देहूरोड आणि कामशेत परिसरात दोन्ही ठिकाणी कार पलटी झाल्याची घटना घडली आहे. देहूरोड परिसरात पहाटे झालेल्या अपघातात दोन जण किरकोळ जखमी झाले आहेत, तर कामशेत येथील घटनेत सुदैवाने कोणतीही जीवितहानी झाली नाही. पहिल्या अपघातात, जुन्या पुणे-मुंबई महामार्गावर मुंबईकडे जाणाऱ्या एका गाडीने रस्त्याच्या कडेला उभ्या असलेल्या वाहनाला धडक दिली. या धडकेमुळे दोन्ही वाहने पलटी झाली. अपघातात जखमी झालेल्या दोघांना तत्काळ रुग्णालयात दाखल करण्यात आले असून त्यांची प्रकृती स्थिर आहे. दुसऱ्या घटनेमध्ये, कामशेतजवळील जुन्या पुणे-मुंबई महामार्गावर दुपारी सव्वा बाराच्या सुमारास मुंबईच्या दिशेने भरधाव कारवरील चालकाचे नियंत्रण सुटले. यात कार पलटी झाली. अपघातात कुणीही जखमी झाले नाही. काही वेळ महामार्गावरील वाहतूक विस्कळीत झाली होती.