शिवराज सिंह चौहान यांनी दिलेल्या माहितीनुसार,ते विमानात तिकिटावर नमूद खुर्चीवर बसण्यासाठी गेले. त्यावेळी खुर्ची मोडकी असल्याचे त्यांच्या लक्षात आले. विमानात काम करणाऱ्या कर्मचाऱ्यांनी खुर्ची सदोष असल्याची माहिती वरिष्ठांना कळवली होती. पण वरिष्ठांनी त्या माहितीकडे दुर्लक्ष केले. यामुळे तिकीट विक्रीच्या वेळी मोडक्या खुर्चीची जागा पण विक्रीसाठी उपलब्ध होती. नेमके त्याच आसनाचे तिकीट खरेदी केल्यामुळे केंद्रीय कृषीमंत्री शिवराजसिंह चौहान यांच्यावर मोडक्या खुर्चीतून प्रवास करण्याची वेळ आली. विमानाच्या तिकिटाचे पैसे मोजूनही मोडकी खुर्ची मिळाल्याबाबत कृषीमंत्र्यांनी नाराजी व्यक्त केली. कंपनीचे व्यवस्थापन टाटा समुहाकडे आहे. यामुळे कारभार सुधारला असेल, अशी आशा होती. पण तसे झाले नसल्याचे ताज्या घटनेवरुन दिसते, अशी पोस्ट केंद्रीय कृषीमंत्री शिवराजसिंह चौहान यांनी केली.
केंद्रीय कृषीमंत्री शिवराजसिंह चौहान यांची पोस्ट बघताच एअर इंडियाच्या सोशल मिडिया टीमने त्यांना तातडीने रिप्लाय केला. झालेल्या त्रासाबद्दल माफी मागितली तसेच विमानांतील सदोष आसने बदलण्याचे काम तातडीने हाती घेतल्याचे जाहीर केले.