रायगड : रायगड जिल्ह्यातील ताम्हिणी घाटात भीषण अपघाताची घटना समोर आली आहे. एसटी बस आणि चारचाकी गाडीची जोरदार धडक झाली असून यामध्ये दोघांचा जागीच मृत्यू झाला आहे. तर तीन जण जखमी झाल्याचे समोर आले आहे. घटनेची माहिती मिळताच जखमींना तातडीने रुग्णालयात दाखल करण्यात आले असून पुढील तपास सुरु आहे. (Tamhini Ghat Accident)
मिळालेल्या माहितीनुसार, आज दुपारी दीट वाजेच्या सुमारास ही घटना घडली. खेड-चिंचवड दिशेने जाणाऱ्या एसटी बसला बसला विळे गावाच्या दिशेकडे येणाऱ्या स्विफ्ट कारची धडक बसली. उतार व वेग असल्यामुळे, तसेच गाडीवरील ताबा सुटल्याने स्विफ्ट कार एसटी बसला समोर जाऊन धडकली. ही धडक एवढी जोरदार होती, की यामध्ये स्विफ्ट चालकाच्या बाजूचा भाग बसमध्ये शिरून पूर्ण चेपला गेला आहे. त्यामुळे कारचालक व चालकाच्या पाठीमागे बसलेली ज्येष्ठ महिला
यांचा जागीच मृत्यू झाला. तसेच हे दोन्ही मृतदेह कारमध्येच अडकून पडले.
दरम्यान, दुपारी ३ वाजेच्या सुमारास डकलेले मृतदेह बाहेर काढण्याचे काम सुरु करण्यात आले. तीन जखमींना माणगाव येथील उपजिल्हा रुग्णालयात उपचारासाठी दाखल करण्यात आले आहे. जखमीमध्ये एका लहान मुलीचा देखील समावेश आहे. तर, एसटी मधील कोणीही जखमी झाले नसल्याची प्राथमिक माहिती मिळत आहे. (Tamhini Ghat Accident)