हम्पी येथे तीन अज्ञात व्यक्तींनी दोन महिला पर्यटकांवर सामूहिक बलात्कार केला. याआधी महिलांसोबत असलेल्या तीन जणांना अज्ञातांनी बेदम मारहाण केली. मारहाणीत जखमी झालेल्या तिघांना अज्ञातांनी तुंगभद्रा नदीच्या कालव्यात फेकून दिले. सामूहिक बलात्कार केल्यानंतर आलेले अज्ञात घटनास्थळावरुन पळून गेले. पीडितांनी धीर करुन जवळचे पोलीस ठाणे गाठले आणि अज्ञातांविरोधात तक्रार नोंदवली. पोलिसांनी माहिती मिळताच घटनास्थळी पथक पाठवले. पीडितांची वैद्यकीय तपासणी करण्यात आली.
पीडितांनी दिलेल्या माहितीआधारे कालव्यात फेकलेल्या तीन जणांचा पाण्यामध्ये शोध सुरू झाला. या मोहिमेदरम्यान महिलांसोबत असलेल्या ३ जणांपैकी एका तरुणाचा मृतदेह पोलिसांना मिळाला आहे. इतर दोन पुरुषांचा शोध सुरू आहे. पीडितांनी दिलेल्या तक्रारीआधारे पोलिसांनी तीन आरोपींच्या शोधासाठी विशेष मोहीम हाती घेतली आहे.
पोलिसांनी दिलेल्या माहितीनुसार एकूण इस्रायलची नागरिक असलेली महिला पर्यटक, होम स्टे संचालिका आणि तीन पुरुष पर्यटक असे पाच जण हम्पी येथे पर्यटनाचा आनंद घेत होते. पुरुष पर्यटकांपैकी एक अमेरिकेचा नागरिक होता तर एक महाराष्ट्रातील रहिवासी आहे. ज्याचा मृतदेह मिळाला, तो ओडिशातील तरुण आहे. अज्ञात तीन जणांनी पुरुष पर्यटकांना बेदम मारहाण करुन कालव्याच्या वाहत्या पाण्यात फेकून दिले आणि महिलांवर सामूहिक बलात्कार केला. या प्रकरणात गंगावती ग्रामीण पोलीस ठाणे तपास करत आहे.
पीडितांनी ज्या अज्ञातांची माहिती दिली ते एका दुचाकीवरुन आले होते. पेट्रोल पंपाची चौकशी करण्याच्या निमित्ताने थोडा वेळ बोलल्यानंतर संधी साधून त्यांनी पुरुष पर्यटकांना मारहाण सुरू केली. अज्ञातांनी त्यांच्याकडे पैशांची मागणी केली. पण पैसे मिळाले नाही म्हणून पुरुषांना मारहाण करुन कालव्याच्या पाण्यात फेकले आणि महिलांवर सामूहिक बलात्कार केला.