वनमंत्र्यांकडून हिरवा झेंडा
चंद्रपूर : चंद्रपूर शहरातील (Chandrapur News) पर्यटकांना ताडोबा-अंधारी व्याघ्र प्रकल्पात सफारीसाठी (Tadoba Safari) थेट सुविधा उपलब्ध करण्यात येणार आहे. याकरिता शहरातून क्रुझर जिप्सीच्या (Cruiser Gypsy) सेवेला सुरूवात होत आहे. वनमंत्र्यांनी या सेवेला हिरवा झेंडा दाखवला आहे. महिनाभरात सेवा कार्यान्वित करण्याचा निर्णय घेण्यात आला आहे. आमदार किशोर जोरगेवार यांनी, वन विभागाच्या वरिष्ठ अधिकाऱ्यांसोबत या विषयाच्या अनुषंगाने बैठक घेतली आहे. वन मंत्री गणेश नाईक यांची भेट घेत आमदार किशोर जोरगेवार यांनी ही मागणी केली होती. गुरुवारी झालेल्या बैठकीत हा निर्णय घेण्यात आला आहे.
ताडोबा हे देशभरात व्याघ्र प्रकल्पासाठी (Tadoba-Andhari Tiger Reserve) प्रसिद्ध आहे. येथे देश-विदेशातील पर्यटक मोठ्या संख्येने येतात. चंद्रपूर शहरातून ताडोबाला जाण्यासाठी थेट सार्वजनिक वाहतूक सुविधा उपलब्ध नसल्याने पर्यटकांना आणि स्थानिकांची गैरसोय होत होती. त्यामुळे चंद्रपूर शहरातून ताडोबात क्रुझर सेवा सुरू करण्याचा प्रस्ताव आमदार जोरगेवार यांनी राज्याचे वनमंत्री गणेश नाईक यांच्याकडे सादर केला होता. या मागणीला राज्याचे वनमंत्र्यांनी सकारात्मक प्रतिसाद देत या सेवेला हिरवा झेंडा दाखवला आहे.
या बैठकीत क्रुझरच्या मार्गाची वेळापत्रक, तिकीट दर, बुकिंग व्यवस्था आणि इतर तांत्रिक बाबींवर चर्चा झाली. तसेच संजय सब्बनवार यांनी तयार केलेली गोंडकालीन किल्ल्याची लघुप्रतिकृती ताडोबा अंधारी व्याघ्र प्रकल्पात ठेवली जाणार आहे.